عندما يهدأ التسونامي الكوري (ترويض النفس علي الطريق)

**Samir Elshahawy** · 21-03-2013 10:53 PM

الاخوة و الأخوات الكرام / مالكي و محبي هيونداي

أسعد الله أوقاتكم ...

النهاردة جاي و معايا تجربة جديدة لقيادة الألنترا MD (التسونامي الكوري)

طبعا أنا هلكت خلال الايام اللي فاتت من كتر السفر و المشاوير لدرجة أني مش قادر أدوس بنزين من كتر الالام اللي بأعاني منها في رجلي اليمين و الشمال

تخيلوا قطعت أكثر من 1200 كم في يومين 2 فقط و مونت أكثر 100 لتر بنزين بتكلفة قاربت ال 200 جنيه

طبعا خلال اليومين الماضيين تركزت معظم السفريات علي طريق القاهرة / السويس / الادبية و العكس و كنت تحت ضغط و عامل الوقت فكانت سرعتي لاتقل عن ال 140 كم/س و ده السبب في رفع معدلات الاستهلاك بسبب الحرق الزائد و الذي لم أعتاد عليه بهذا الشكل

المهم أمبارح كنت راجع بعد منتصف الليل و في غاية الاجهاد و كان مطلوب مني أن أكون النهاردة بالاسماعيلية في تمام التاسعة صباحا طبها لم أستطع الاستيقاظ مبكرا و لما صحيت كنت تعبان جدا لكن لازك أروح هناك و فعلا تحركت في تمام التاسعة و النصف بعد ماأرسلت رسالة قصيرة بأعتذر فيها عن التأخير و أني هأكون موجود خلال ساعتين علي اقصي تقدير

و فعلا تحركت متخذا طريق السويس حتي مدينة الشروق و دخلت محطة أويليبيا كملت التانك و بعد كده كملت

طبعا بسبب ظروف الاجهاد ماكنتش قادر أجري زي الايام اللي فاتت و لم تزد سرعتي عن 120 كم/ س في افضل الحالات و معظم الطريق سواء و أنا رايح و أنا راجع متوسطات السرعة كانت 100 - 110 كم/س و فعلا الجي بي أس سجل أعلي سرعة كانت 124 كم / س في رحلة العودة

.... أهم مميزات ترويض التسونامي :
بداية سرعة 120 كم/س كحد أقصي أنا شايف أنها سرعة مثالية جدا و مناسبة جدا للألنترا MD و ده للأسباب التالية :

1- أستهلاك البنزين أقل مايمكن و سجلت قراءة الكمبيوتر 6.3 لتر / 100 كم (طبعا لازم نأخد في الاعتبار الدخول و الخروج من الاسماعيلية و التوقفات ببعض المناطق المزدحمة نظرا للحالة المرورية علي الطريق)
2- صوت الموتور هادي جدا و لا تشعر بوجوده نظرا لأن عدد لفات المحرك لايزيد عن 3,000 لفة.دقيقة
3- قدرة كاملة في التحكم في العربية و أستجابة افضل للفرامل
4- راحة بال و هدوء و تركيز أفضل مع الطريق

و بالرغم من وجود عدة مغريات للجري و الشد
- طريق كويس
- سيراتو / لانسر / ألنترا HD / فيرنا و غيره و كله كان بيجري و شادد

لكني نفضت لهم جميعا و كنت ماسك نفسي تماما و هو ده بقي ترويض النفس علي الطريق

بصراحة مافيش أحلي من السواقة الهادية و الاستمتاع بالطريق (ده علي أعتبار أن عندنا طرق نستمتع بيها)

و أشوفكوا علي خير في تقرير قادم أن شاء الله

**mahmoud_afifi** · 21-03-2013 11:28 PM

الف سلامه عليك يا كبيرنا

المشي الهادي حماده والجري حماده تاني خااالص.
بصراحه انا بستمتع بالمشي الهادي لما الطريق يبقى فاضي انما لما في ناس بتستفزني وتزنق عليا ويفتكروني لقمه سهله بعلمهم الادب كلهم :d

**horas3000** · 21-03-2013 11:41 PM

مهو لو الناس تحترم القوانين كله يعيش مبسوط
يعني لو النقل لزم يمينه و سرعته
و اللي عايز يجري يمسك شماله و يوسع للي اسرع منه
و يبقي فيه حارة او اتنين في النص لاصحاب المزاج

مش تبقي الدنيا فل فل ؟؟؟؟
اييييييييه لنا الله

**Nashaat Rady** · 22-03-2013 01:17 AM

المشاركة الأصلية كتبت بواسطة horas3000

مهو لو الناس تحترم القوانين كله يعيش مبسوط
يعني لو النقل لزم يمينه و سرعته
و اللي عايز يجري يمسك شماله و يوسع للي اسرع منه
و يبقي فيه حارة او اتنين في النص لاصحاب المزاج

مش تبقي الدنيا فل فل ؟؟؟؟
اييييييييه لنا الله

يعني،، لو ابتادينا نحاول نظبط الطرق انهارده.... ممكن ان شاء الله في خلال ١٥٠ سنة تشوف اللي انت بتقول عليه في مصر ام الدنيا

يديلك الصحة و طولة العمر يا رب

**Nashaat Rady** · 22-03-2013 01:32 AM

المشاركة الأصلية كتبت بواسطة lanos2004

انا عربيتى بتعمل 5 لتر فى 100 كيلو صدق اولا تصدق بشرط 90 على الغيار الخامس

لانوس!!!! لا اصدق.... كان معايا ٩٨ اول دفعة و ٢٠٠٩ منصور.. حريقة بنزييييييين الجوز.... انا مش عارف بيجيلها نفس تأكل كل البنزين ده كله ازاي...

**Nashaat Rady** · 22-03-2013 01:37 AM

ما فيش أحلي من السلانسيه..... بس المشكله انك كل شوية تلاقي حد يعكر مزاجج بكسرة كده ولا غرزة غشيمة.

**Nashaat Rady** · 22-03-2013 01:58 AM

المشاركة الأصلية كتبت بواسطة lanos2004

لانوص 16 صباب اتنين كامه دة ماتور موفر بطريقه غريبه جدا جدا لو عدد لفات الماتور معدتش 3000 لفه
ودة كان واخد افضل ماتور 1500 فى العالم ولا زال اقوى ماتور 1500 حتى الان
الى فى لانوس 8 صباب دة مش ماتور دة خلاط 5 غيارات

ههههه بظبط كده، ١٥٠٠ سي سي و ٨٦ حصان!!!! و حريقة بنزين،،، يعني كوكتيل جوافه..

انت عربيتك منطقة حرة ولا ايه؟؟؟