مبادرة لحل الأزمة المرورية
السلام عليكم ورحمة الله وبركاته
من فترة كبيرة بيراودني حلم وهو ( مبادرة نايل موتورز لحل الأزمة المرورية ) وكل مرة أقول هدخل وأكتب وأعمل وفى الآخر بتاخدني مشاكل الحياة
الموضوع اني بجد أتخنقت من الزحمة والسلبية والغباء فى السواقة
والكارثة بالنسبة ليا اني لقيت نفسي بتغير فعلا للأسوأ ، أنا زمان كنت بقف وأخلي العربيات تعدي مكاني وكنت محترم أوي فى السواقة ، بس للأسف حاليا بقيت مش محترم فى السواقة (الى حد ما يعني :120146b) يعني بقيت بلزق فى اللى قدامي علشان محدش يدخل أدامي ، وأوقات بقول لنفسي وهو إية اللى هيحصل لو دخل قدامي !!!!
عموما أنا شايف إن المشكلة بتتفاقم ، ولازم يكون لينا دور (كمجتمع مدني) بعيدا عن دور الحكومة ، لحل الأزمة
أحنا الحمد لله منتدى كبير بيضم 137,011 مشترك عندهم عربيات غير الزوار ، والحمد لله أغلبنا بيمشي فى الشوارع وعارف أسباب المشكلة وازاي ممكن تتحل (انا مثلا حافظ النقط اللى بتسبب زحمة فى جسر السويس )
أحنا 137,011 عضو النشيطين منهم 13,017 ، والنظرية بتقول ان 20 % من الشعب هو اللى بيقوم بالتغيير فهنقول اننا عندنا 2603.4 عضو ممكن ينضموا للمبادرة وده رقم كبير جدا :bravo:
فشايف اننا لازم يكون لينا دور لحل المشكلة عن طريق عدة محاور
1 - أسباب الزحام الفنية ( زي مثلا شارع متصمم غلط أو ملف المفروض يكون أبعد شوية و و و و )
وفى النقطة دي ممكن نتوجه للحكومة فى المعاونة فى حل الأزمة (لو حاجه كبيرة) أو مساهمة فردية (لو مثلا هنخلي شوارع أتجاه واحد بالتعاون مع أهل المنطقة)
2 - توعية للسائقين ( عن طريق الإعلام والراديو والفيس بوك ويفط فى الشارع )
وأعتقد أننا كمنتدى كبير ممكن نعمل عرض تقديمي محترم ونتوجه بيه للبرامج الإزاعية فى الراديو والتليفزيون ونخليهم ينضموا معانا للحملة ( عن تجربة سابقة كنا بنظم مهرجان أسمة أجازة بجد والناس كانت بتتعاون جدا )
وممكن كمان نشرك معانا مدارس تعليم السواقة ونحط يفط فى الشارع للتوعية
3 - توعية السائقين النقل العام والميكروباص والتاكسي
ودي ممكن عن طريق اننا ننزل المواقف ونشوف الريس بتاع الموقف ونتكلم معاه ونكلم السواقين ، السواقين دول بيحلوا أزمة ، وهم بيشكلوا أزمة ، فلو عرفنا نوعيهم ونفهمهم هنبقى حلينا أزمة المرور وكمان ساهمنا فى حل أزمة المواصلات
(وشوفوا مثلا موقف حلوان ومايو بتاع العباسية ، تجربة ناجحة وشغالة)
فأنا شايف اننا بجد نقدر نحل جزء كبير جدا من المشكلة ، أغلبنا عندة مهارات وخبرات هتفيد فى الحملة ، هنلاقي معانا اللى بيشتغل فى الإزاعة وممكن يساهم فى الجانب التوعية ، هنلاقي معانا مهندسين تخطيط وعمارة يشتغلوا فى حل مشكلة الشوارع ، و و و و
كلنا بنحترم فى الغرب تقدمهم ، بس فى الغرب عندهم موضوع العمل التطوعي ده جزء مهم جدا فى حياتهم ، وإحنا لازم إحنا كمان نشتغل ونحل المشكلة
صعبة الحياة والحل بسيط ........ حبة تخطيط
مين قال هيساهم