الكهرباء...و سنينها!

**NaderNabil** · 06-08-2008 04:36 PM

من حوالي 5 شهور...الساعة 3 الفجر البيت كله نايم و انا باكل رز مع الملايكة...

فجأه أسمع بوووم و بعديها تششششششششش في الأوضة....و ريحة بشعة....طبعا انا قلت يا اما بحلم حلم عنيف شوية...يأما الحرب العالمية التالتة بدأت...و صارخ دخل الأوضة عندي....

المهم من كتر ما انا مش فاهم ايه اللي بيحصل...كملت نوم....بس لاقيت الراوتر بيفتح و يقفل لوحده و ريحة الشياط عماله تزيد...و سمعت اختي بتجري من أوضيتها.....قلت يا واد يا نادر قوم....يمكن يكون فيه حاجة....قمت و فتحت النور لاقيت الأوضه كأني قاعد في غرزة معتبرة ...دخان طالع من الكومبيوتر و ريحة مقززة...و الراوتر فصل تماما...و الصاب ووفر برده...أطلع علي أختي ألاقيها بتقلي اللابتوب فصل مرة واحدة ......طب ايه يا جدعااان...فيه ايه؟؟؟؟

اتاري بقي الكهرباء عليت مرة واحدة ووصلت مش أقل من 300 فولت...و اخدت في طرقها كل الأجهزة الضعيفة...

الخسائر كالتالي:
أدابتر اللابتوب...غيرت مقاومة ب 5 جنيه
باور سابلاي الكومبيوتر...غيرت مقاومة برده ب 5 جنيه
الريسيفر...نفس المقاومة ب 5 جنيه:)

بقيه الحاجات الحمد لله مكانتش باظت أول ما وصلتها اشتغلت تاني....بس طبعا بقت عرضه أكتر للخطر...و صوت البوم الجامد ده طلع الصب ووفر..اما الكهربة زادت قام اداني حته بيز من اللي هي....و التشششش المقاومة بتاعة الكومبيوتر و هي بتتحرق:)

نسيت الموضوع...و عايش حياتي عادي...بس واحد صاحبي كان دايما بيحذرني من موضوع الكهرباء و كان بيتحايل عليا اننا نجيب ستابليزر في البيت..بس نفضت...لكن(و اه من لكن).... بعدها ب 3 شهور.....نفس السيناريو يتكرر....بس شدته أكبر....و الخسائر أكبر....

أدابتر اللابتوب تاني:)....غيرتله المقاومة بواحدة أكبر عشان يستحمل...ب 7 جنيه
أدابتر الراوتر...اشتريت واحد جديد ب 12 جنيه
أدابتر الصب ووفر...مش لاقيه لحد دلوقتي عشان AC مش DC...و لازم يتفصل.
أدابتر البرينتر...مسحيل يتصلح و مستحيل أجيبه جديد عشان مفيش منه...قمت جبت تاع البرينتر القديم ووفقته عليه...و شغال زي الفل بس بقي أسرع كمان...عشان فولته أكتر
الريسيفر تاني...و بابا أخده صلحة ب 50 جنيه ..مع انها نفس المقاومة ام 5 جنيه:(

يوميها لاقينا الجيران بتخبط علينا و بيقولولنا اقفلوا الكهرباء...شدوا الفيش...و حاله من الذعر..كله بيجري علي السلم كأن العمارة هاتقع... اتصلنا بطوارئ الكهرباء و جم في 5 دقايق...و قعدنا لحد 5 الفجر في الشارع...و طلعنا نمنا عشان مكانوش لاقوا السبب فين و كانت الناس عندها أشغال و امتحانات...عايز أقولكم ان 4 لومض في السلم طرقعوا...و وحدة تانية كانت بطلة...فضلت مستحمله الكهرباء و اما كنا بنفتح النور تحس ان الشمس طلعت...و شغالة لحد دلوقتي

الفييلا الي جنبينا جالهم خسائر تكييف سبليت و تلاجه و اللمض كلها:(

بعد ما الموضوع هدي شوية...قلنا نشوف موضوع الستابليزر...لاقينا ان شقتنا محتاجة واحد 10000 كيلو....و ده تمنه 3000 جنيه...أول ما قلت الرقم ده لأبويا قلي ملعون أبو الأجهزة...يكش تتحرق

قمت انا عملت زيه و قلت انا مالي...هو انا اللي هدفع؟

________________________________

طبعا هاتفتكروا اني خلصت.....لألألألألألألألألأ� �ألأ...

أول ما الصيف بدأ و تحديدا في أخر شهر 6...كان عندي مشكله كبيرة في النت...و هي ان الراوتر مش بيلقط السيجنال و لمبة النت مش بتنور ...غير في أوقات معينة.....يعني مثلا من 7 الصبح لحد 2 الضهر النت شغال زي الفل و مافيهوش أي مشكلة...لكن عد كده..لو عرفت تاخد 5 دقائق علي بعض تبقي بطل.....غير كده بقي الراوتر نفسه كان بيعمل ريستارت لوحده كده من ذات نفسه

اتصل ب تي اي داتا...يقولي الخط مافهوش اي حاجة...و جرب و اعمل....عملت كل حاجة و برده مافيش فايدة....

انا ربط الموضوع ان كان ساعتها الأجازة لسه بادئة.... والشاب بيخشوا كتير علي النت...فالحمل كتر علي الشبكة...و كنت مقتنع تماما بكده...و تي اي داتا يقوللي مافيش أي مشكلة

قمت قلت دي مشكلة راوتر أكيد...و كويس انه لسه في الضمان هاروح أرجعه...س قبلها قلت أجرب راوتر صاحبي عندي....و فعلا جربناه...و لاقينا نفس المشكله!!!!!!!!!!!!!!!!!!!!و بردو بيعمل ريستارت لوحده....ايه يا جدعان؟؟؟؟

طقت في دماغ صاحبي فكرة....قالي احنا نجيب الستابليزر الصغير بتاع الالات الموسيقية بتاعتنا (1000 كيلو) و نجيب أفو ميتر....و نيجي نجرب في الشقة..

نزلنا جبنا الحاجات دي من المخزن و أول حاجة عملنها قسنا الفولت اللي في فيش الشقة....تخيلوا طلع كام؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟

181 فولت.....أيون.....181 فوت....يعني أقل من المفروض ب 40 فولت كاملة.....يا سنة سسوخة....امال احنا عايشين ازاي؟؟؟؟

حطينا الستابليزر...و طبعا قسنا الخارج بتاعه 220 فولت بالتمام و الكمال....وصلنا الراوتر...زي الفل ...مافيش أي مشاكل و الكونيكشن صاروخ و ثابته...قلنا نسيبه كده لحد اخر اليوم و نشوف...و فعلا سبناه اسبوع و مكنش فيه أي مشاكل....طبعا المشكلة كده وضحت...الراوتر مش واصله كهربة كفاية انه يقدر يفهم الكونيكشن اللي داخلاله

و من هنا يا أصدقاء....قررت ان أحلق لبقية الشقة و اشتري ستابليزر خاص بي فقط....1000 كيلو....سعره 225 جنيه بضمان سنتين...و ماليش دعوة بقي....

و من ساعتها و الحمد لله...معنديش أي مشاكل في الكهرباء و الأمن مستتب..

بس مازل دور علي أدابتور الصب...(ماحدش له صرفة في واحد؟:()

دوشتكم معايا...بس كان لازم أحكي القصة دي...يمكن تفيد ناس و لازم انبهكوا لأخطار الكهرباء...سواء عالية أو واطية

**M!NA** · 06-08-2008 05:17 PM

استغربت أوي ان الراوتر مكنش شغال صح بسبب قلة الvoltage اللي داخلله

بس بجد شكرا جدا عالموضوع ده

دا انتا حقك تحطه في المنتدى التعليمي :)

**دموع الثلج** · 06-08-2008 08:56 PM

كنت مره عند واحده صحبتى وحاطه شاحن الموبيل النوكيا والجهاز بيشحن شويه والنور قطع
كنا الظهر لما رجعت الكهرباء بعد شويه قبل ما اللمبات تنور
سمعنا صوت فرقعه جامده وريحه شياط قعدنا ندور لحد ما لقينا شاحن الموبيل ووووووولع واتحرق وطبعا الموبيل مبينطقش قطع النفس من ساعتها وانا بفصل كل الاجهزه غير المستخدمه وانا مش موجوده ولما لنور بيقطع بشيل كل الفيش بتاعه الاجهزه وبرجعها لما تستقر الكهرباء

**fahd_628** · 06-08-2008 10:48 PM

يا ساتر يا رب

بجد ربنا معاكم

بس انت عجبتنى اوى بموضوع الستابليزر لأوضتك بس :) فكرة جامدة جدا :D :D :d

**مصراوي جدا** · 06-08-2008 11:28 PM

الكلام ده كان منتشر جدا في السبعينات في مصر .. قصدي ضعف عام للكهرباء في القاهرة .. وكان في رمضان وبالذات وقت الفزورة صورة التلفزيون تبقى صغيرة من كتر ما فيه حمل كهرباء والناس كلها بتستهلك كهرباء بعد الفطار.. والشبكة ضعيفة وكان عندنا في البيت استبليزر للشقة كلها

وبعدين نسينا الكلام ده في الثمانينات والتسعينات والالفينات

وها نحن نعود للوراء

عودا حميدا

**Noha.M** · 07-08-2008 12:22 AM

المشاركة الأصلية كتبت بواسطة مصراوي جدا

الكلام ده كان منتشر جدا في السبعينات في مصر .. قصدي ضعف عام للكهرباء في القاهرة .. وكان في رمضان وبالذات وقت الفزورة صورة التلفزيون تبقى صغيرة من كتر ما فيه حمل كهرباء والناس كلها بتستهلك كهرباء بعد الفطار.. والشبكة ضعيفة وكان عندنا في البيت استبليزر للشقة كلها

وبعدين نسينا الكلام ده في الثمانينات والتسعينات والالفينات

وها نحن نعود للوراء

عودا حميدا

على رايك والله يا باشمهندس :(

حاجة نزعل والله

**osama** · 07-08-2008 09:20 AM

اعتقد انة يوجد جهاز منظم لدخول التيار مع الحفاظ علية حتي بعد الانقطاع التيار 15 دقيقة
دة ممكن تركبة وتريح دماغك وتاكل رز مع الملايكة

**bee** · 07-08-2008 12:31 PM

يا بشمهندس
يا ريتنا لحقنا الايام د كان فيه ضعف كهرباء بس مش نفوس كمان :)
والله لو على لمبة جاز ومن غير تليفزيون اصلا ... اكيييييييد احسن من دلوقتي
*******************
Osama باشا
حضرتك تقصد ال UPS
بس ده very expensive
هو الحل بتاع نادر كويس جدا
******************
وبالمناسبة يا نادر عندي حل ظريف بردو
وهو تستعمل مشترك داخله فيوز للاجهزة الي مع بعض زي الريسيفر والتليفزيون ..

انت الصب بتاعك نوعه ايه او هاتلي الداتا الي انت محتاجها وإن شاء الله اساعدك في موضوعك ده ..

تحياتي

-

الموضوع: الكهرباء...و سنينها!

LinkBack

أدوات الموضوع

عرض

الكهرباء...و سنينها! - انشر الموضوع فى :

-

-

-

-

-

-

-

المواضيع المتشابهه

طرمبة البنزين و سنينها

الفرق بين الاسبراتير الكهرباء والعادى وينفع يركب الكهرباء على الفليشيا ولا لا

الرشاشات و سنينها

البطارية و سنينها

لبارومة و سنينها!!!!

الكلمات الدلالية لهذا الموضوع

المفضلات

المفضلات

ضوابط المشاركة