تقرير بعد 100 الف كم للسيراتو وشوية تفاصيل تانيا
السلام عليكم
اتمنى ان كل الرجالة بخير
الحمد لله العربية سيراتو 2011 شاريها اكتوبر 2010كاملة بدون بصمة اتمت ال 100000 كم بنجاح وتمام الصحة
انطباعى وتقريرى كالاتى :
هنتكلم على الحاجات اللى اتغيرت ف العربية بخلاف الصيانات الدورية
1- كاوتش فولدا المانى على 45000 واداءه كان كويس لغايط 30000 كم بعد كده نشف بغباء وكان بيرزع وكان اقل حاجة تخرمه
2- تيل فرامل امامى على 80الف كم اصلى وكان لسه فيه تلته
3- تيل خلفى على 90 الف كم
4- كاوتش اكليز ATR Sport ممتاز ف كل حاجة بس انا شايف ان اداء الفرامل فيه احسن منه لكن مميزاته (سيلنت -- طري - شفتين - مواصفاته رياضيه- -احسن من الفولدا ف الملفات والهاندلينج )
5- ازاز امامى وده وارد يعنى مش حاجة مهمة
6- بطارية على 95000 بعد سنتين ونص وللاسف اكتشفت انها سليمة بعد مغيرتها ،لانى كنت سايب العربية يومين ونور الصالون كنت ناسيه ،،
اداء العربية :
الحمد لله راضى جداا جداا ومش محتاج حاجة زيادة رغم انى باخد كل اداءها يعنى مش سواقه حريمي ولا بمشى 60 سواقتى طول الوقت رياضية ،،
النشوفيه مش اللى يستاهل البوليكا اللى الناس عاملاها (انا جنط 16 )
،،
عيوب العربية من وجهة نظري
متهيألى مفيش زيادة عن المعروف بس نقوله
مشوار المساعد الخلفى قصير
بارات الاسكاترا مش محملة زى الالمانى واليبانى وكذلك المقصات وده بينعكس على احساسك بالمطب
المساعدين الامامين كان فيه دفعة كبيرة من العربية دى فيهم مشاكل من وهيا زيرو انا عندى ظهرت مشكلة ف اليمين بعد 100000 كم فكتر خيره والحوار كله يتلخص ف طقه رخمة بتيجي ف المدقات الخفيفة اوى ،،
الكوبلن الداخلى ناس كتير اشتكت منه بس الحمد لله انا لأ
- درااع الفوج
----------------------------------------------------------
بالنسبة للاداء مختلفش الحمد لله عن وهيا زيرو
من الحجات اللى اتفاجأت من اداءها وفايدتها (الشحم الابيض الاسبراي سواء Apro او فالفوين )
استخداماته كالاتى : بيترش على المفصلات بتاعة الابواب علشان يمنع اى صوت تزييق ف المطبات الهضاب
-- بيترش على جلب العفشة كلها ماعدا قاعدة الفتيس والماتور بيفرق جامد قوى ..
انصح طبعا باستخدامه
شوية نصايح على الماشى لمن يتقبلها
1- متغيرش تيل غير الاصلى
2- متهملش ف اى صوت تسمعه لازم تعرف سببه واضراره
3 - متستخدمش الفلش ،وبتاع الاوكتان والسيراتك ولا ليهم لازمة (ممكن بتاع الرشاشات ده مرة ف العمر ولا حاجة )
4- متتعاملش مع التوكيلات ولا مراكز الخدمة المعتمدة ف تشخيص عيوب ،،لو حد تعرفه وتثق فيه يبقا افضل .
5- متركبش كاوتش كورى ولو اضطريت ركب اى حاجة بشفتين طبعا كلامى للمعاه 16 فيما فوق
6- واخيرا استمتعو بعربياتكو وحاولو متطلبوش منها اكتر من طاقتها ودى نصيحة لنفسي كمان بس هيا العادة كده نجيب العربية ب الف ونطلب اللى تعمله عربية ب 200 الف
ودمتم شموعا سوداء ،،،
:fun_36_3_4[1]: