كـارثة كوستا المهندسين جامعة الدول العربيه.مش المصرى الى يفضل فى ذل ومعامله غير آدميه
http://www.nilemotors.net/Nile/<a hr...3641432901.jpg[/IMG]
دورنـــا كـمــصــريين التوعيه .. مش المصرى اللى يفضل فى الذل وانـــتــهاك آدميته.
الموضوع منشور على الفيس وموثق بفيديو على يوتيوب . اليكم التالى
للأسف حدث معي ...
الثلاثاء 11مساءا ( تعديل - الأربعاء )
- كوستا كوفي - فرع سور نادي الزمالك بالمهندسين
20.3.2013
بلطجة محل راقي ...
رحت اقابل اصدقائي ( عم امام عبده - محمد قاسم - مينا منصور ) واقعد معاهم في فرع كوستا جامعة الدول - رحت لقيتهم جالهم عصير - جزر بالبرتقال - وبيقولولي دوقه
شميته لقيته بايظ - دقته لقيته طعمه حامض وبايظ
بلغوا مدير الفرع " مكانش موجود كان الموجود نائب المدير "
وفعلا أقر ان العصير فاسد - رغم ان صلاحيته لسه فاضل عليها يوم ..
اعتذر لهم وشاله من الفاتورة - بس العصير لسه معانا.
فكرنا لقينا ان سكوتنا ده شيء سلبي ولازم نصعد الموضوع
عشان نوعي الناس بالمكان المحترم النضيف اللي كله بيجي ياكل ويشرب فيه ومش مخون ...
إتصلنا بالنجدة 13 مرة او اكثر - عشان تيجي تثبت حالة
ردوا ثلاث مرات - وقالوا هنبعت لكم حد
مر ساعتين من 10 ل 12 مفيش حد جه
كلمناهم تاني - قالك تعالى اعمل محضر في قسم العجوزة
قلنا لهم لو خدنا الإزازة البايظة معانا هيقولوا لينا اننا لاعبين فيها ..
كلمنا الصحة - قالت هاتوا الأزازة ومحضر
ومحدش راضي ييجي يثبت حالة
كلمنا خدمة عملاء كوستا كوفي .. وصلوا الشكوى وخلوا مدير الفرع يتصل من اجازته
اتصل واعتذر - قلنا له عاوزين حقنا احنا بنجيب اولادنا - واحفادنا هنا " كلام عم امام " - وبيشربوا العصاير دي - احنا كبار وخدنا بالنا من العصير الفاسد - الطفل كان هيشرب ويتسمم !!!!
المهم طب عاوزين ايه ..
فكرنا احنا وترابيزة كانت جنبنا فيها 7 افراد محترمين وافقونا ان ده فساد وكانوا مؤيدين لما نقوم به
فكرنا سوا ولقينا حل - تفاوضي مناسب - - اننا نقول لهم يتبرعوا ب 50 علبة انسولين لمستشفى القصر العيني قسم السكر - ويبعتوها بإسم كوستا كوفي مش اسمنا واحنا هنتنازل عن المحضر والعصير ونسيب الموضوع وخلاص - - قلنا ناخد تعويضنا - لله مش لينا
مدير الفرع قال طيب عيني - طب ادوني 10 دقائق
اتصل بعد 10 دقائق - يماطل ومش عاجبه
هددناه اننا هنفضح المحل - اننا بكل ادب هنعدي على كل ترابيزة في المحل ونوعيها ان العصير فاسد
وشوية ولقينا ترابيزة جنبنا بينزل لها عصير !!!!!
اتجننا - وقمنا عليهم بسرعة واستأذناهم وقلنا لهم معانا عصير شمه وشوفوه - بايظ- خلي بالكم
الست مسكت العصير بتاعها ( وهي مش مصرية ) وشمته لقت ريحته برده متغيرة بس مش زي بتاعنا - قرفت وسابت العصير وجم شالوه
وبدأنا جولتنا وانا شخصيا بدأت توثيق الواقعة بتصوير عم امام وهو بيعدي على ترابيزة ترابيزة - نستأذنهم بكل ادب اولا اننا هنقول لهم حاجة و كانوا ماشاء الله كلهم متعاونين ومتعاطفين معانا- واكثر من 5 شموا العصير ومنهم اللي داقه ولاقاه فعلا بايظ
ونائب المدير ماشي ورانا - هو والعمال - بيحاولوا ياخدوا الكاميرا وبالقوة في بعض الأوقات ومنعي من التصوير
في الوقت ده - مينا منصور لقى تحش الموظفين بينا - قال انا هروح اجيب الشرطة بنفسي .. ومشي
وكان كل كلام نائب المدير والموظفين هنعمل ايه - دي مشكلة الشركة اللي بتورد لينا العصير مش احنا - بنقول له هوا احنا شاريين العصير ده من الرصيف ؟؟؟
ده عليه اسمكم ومتبرشم وعليه تاريخ صلاحية ساري !!! وثمنه 15 جنيه
فضلوا يحاولوا منعنا لكن انهينا التصوير واعتذرنا للزباين ومحدش كان متضايق بالعكس كانوا مبسوطين من ايجابيتنا
شوية ونائب المدير - خطف العصير من عم امام - وقاله دي اللي مضايقاك
وقام فاتحها ومفضيها على الأرض " في الدور الثاني "
امام كل الزباين والموظفين
لمينا نفسنا وقلنا خلاص نمشي
واحنا خارجين من المحل
نائب المدير بيقول - علينا - قلة ادب ووساخة !!!
يعلم الله مطلعش مننا كلمة شتيمه او اهانة لا لكوستا ولا لأي عامل هناك لعلمنا ان ملهومش ذنب في قصة العصير ...
رد عليه قاسم زميلي - قاله عيب كده - ده راجل كبير ... مكملش الكلمة
لقى واحد مش لابس زي كوستا ضربه باللبونية في وشه مرتين وسحب قاسم بره المحل ونزل ضرب فيه
كنت انا خارج المحل
العمال كلهم اتجمعوا على قاسم -منهم اللي يفضوا الخناقة بطريقة سلبية - سايبين الولد يضرب في قاسم - الا من رحم ربي - او داخل يضرب في قاسم.
دخلت ومواطنين من الشارع دخلوا وفضوا الموضوع
قاسم نظارته اتكسرت ومنخيره جابت دم :(
قلنا لهم شكرا - بتسلطوا علينا بلطجية يا شوية بلطجية
عملوا نفسهم ميعرفوش مين الولد ده والولد خرج جري وهرب واختفى
مينا ساعتها رجع ومعهوش الشرطة
خير ايه اللي حصل - قال انا لقيت دورية ماشية وقفتها
وقال لهم ان فيه مشكلة في كوستا جامعة الدول وصحابي هناك وهيتضربوا وكده ...
اعتذروا له وقالوله روح القسم - احنا عندنا كمين رايحين عليه !!!
شوية ولقيت تليفوني بيتصل - مين - المدير الأقليمي لكوستا كوفي
قلت له اهلا بيك - ايه البلطجية اللي في المحل دول !!!
قالي اهدى بس - قلت له اهدى ايه - - مشغلين نائب مدير وعمال بيجيبوا بلطجية يضربوا الزباين عشان بنصور فساد
قالي هو التصوير ممنوع فعلا - قلت له وانك تديني عصير فاسد سام ممنوع وكون اني بصور - ممكن تتصل بالشرطة تيجي تمنعني مش عمالك يضربونا !!! احنا مش في غابة
وممكن بحكم منصب حضرتك تجيب فيديو كاميرات المراقبة تشوف كل تسلسل الأحداث ولو شفت اننا تعدينا على اي حد - احنا تحت امرك
وقالي انا تحت امرك وقلت له على اننا بالفعل لما الموضوع كان هادي ومؤدب ومحترم - قلنا ناخد تعويض - مش لينا - للمرضى وانتوا ابعتوه - والمدير شبه وافق ثم ماطل ...
قالي يافندم ربنا يبارك لكم انا تحت امرك - اساهم معاك طبعا في الخير ده
قلت له ده كان زمان - دلوقتي الموضوع قلب بتعدي اخر علينا وضربنا واهانتنا من مكان محترم
قالي يعني مش عاوز تساعد في الخير !!! قلت له الخير حضرتك ممكن تعمله لوحدك خلاص مش لازم انا
قالي ما انا مش هعرف اعمل اللي انت بتعمله " قصده توزيع الدواء او كده "
خلي القانون ياخد مجراه ...
خدنا بعضنا كلنا ومشينا من قدام المحل بعد تجمهر المواطنين امام المحل بسبب ما يحدث
راح عم امام ومينا وقاسم - عملوا محضر في قسم العجوزة ومنها على المستشفى لأنفه لتوثيق الجريمة
ومشينا -
اليوم 21-3-2013
اتصالات من مدير اقليمي امريكانا - كوستا كوفي طلع واخد توكيله امريكانا
واتصالات ومحايلات من مديرة وصاحبة شركة الشهاب " الشركة اللي مورده للعصير الفاسد "
واتصالات من زوجها - صاحب المصنع
قلت لهم ربنا يبارك لكم - الموضوع خرج من ايدي
-------
إنتهى
أنشر ..
انتشر وافضح كوستا وغيره عشان لو الموضوع ده كان حصل لحد من ولادنا وجاله تسمم في مكان كلنا نثق فيه :(
إنشر وافضح تقاعس الداخلية وعدم الرد اكثر من 13 مرة على رقم 112 و 911 من الموبايل ولما ردوا وعدوا بإرسال حد - وقعدوا ساعتين ولغايت ما اضطرينا نصعد الموضوع بطريقتنا البدائية وحصل البلطجة دي
أنشر وافضح كوستا انه بيشتري العصائر من شركات تحت السلم او مصانع مفيهاش كواليتي مقابل ثمن ما يدفع ( 15 ج ) في عصير - فعليا ثمنه بنشربه في اي مكان عادي شعبي ب 3 ج.
أنشر وافضح ان كوستا اول ما اشتكينا - قالك مالناش دعوة ده المصنع !!!
مع العلم العلبة عليها الشعار بتاعهم وكل حاجة.
أنشر وافضح اد ايه عاوزين المصري يفضل سلبي ورخيص بسوء الخدمة في انضف اماكن في مصر في المجال ده..
أنشر عشان محدش يثق في اي مكان مهما يكون راقي وانك لازم تاخد بالك وتدوق وتشم الحاجة وتتحرى النظافة فيها ليك ولأولادك حتى لو كنت داخل طيارة راقية وشركة راقية.
أنشر عشان حق قاسم اللي اتضرب ومرضيناش نكبر الموضوع وناخد حقنا بدراعنا في ظل قوانين الغابة الي عايشين فيها برعاية - الشرطة .
أنشر عشان نظارة قاسم اللي اتكسرت واتدشدشت
أنشر عشان خدوا مننا الدليل على ادانتهم امام وزارة الصحة وافرغ ازازة العصير الفاسد على الأرض امام كل الناس.
أنشر عشان يطلعوا فيديوهات الكاميرات بتاعتهم ويشوفوا مين اللي كان متعدي ومين اللي كان لغاية اخر لحظة محترم :(
أنشر عشان كوستا تسلط علينا بلطجية تاخدنا من داخل المحل تخرجنا بره وتعتدي علينا :(
أنشر عشان كوستا كوفي ما تعرف اننا معانا عصير فاسد وعاملين مشكلة عليه وشكوى ومنتظرين الشرطة - - ينزلوا عصير برده لزبون تاني !!! مش حتى يوقفوا نزوله لكل الزباين لغايت ما يتأكدوا ان كل الصرفية سليمة ...
أنشر لو عاوز تعمل حاجة ايجابية وانت في مكانك ...
عذرا للإطالة
محمد البحراوي
كنت في الواقعة وانا اللي صورت وواحد ممن تم اهانتهم من هذا المكان القذر.
[youtube]http://www.youtube.com/watch?v=7flX7rRGCFY&feature=youtube_gdata_player[/youtube]
===============
تحديث 22.3.2013
جزء من الفيديو تم وضعه - ليس كله لكن لتأكيد الكلام
https://www.facebook.com/76mohamed/p...96143220450242
شــــيـيـر وافضح اى واحد مش عايز المصرى يعيش بعزة ونضافه وآدميه. وتكون راسه مرفوعه بمصر.
