الموضوع: حادثة بسيطه و اسئلكم المشورة

النهاردة و ان فى الطريق الى الشغل كنت في شارع عمومي على سرعة 30:40 كم و فجأة خرج توكتوك من حارة مزنوقة قصدي جانبية ليعبر الطريق بالعرض كانت المسافة بيني و بينه حوالي 5 متر طبعا الفرامل عملت اللي تقدر عليه لكن المسافة كانت قريبة جدا و حصل تصادم.
الحمد لله مفيش حد اصيب و سواق التوكتوك و ركابه و التوكتوك نفسه بخير.
المشكلة عندي انا في جينا 2007
- الاكصدام الامامي اتكسر من النص و غالبا كل كلبساته.
- بار حديد خلف الاكصدام اتكبس لغايت ما ضغط على الراديتير و خلعه من مكانه.
- الكبود اتفعص من النص و نطر من الجوانب نتيجه لتغير مكان القفل بتاعه.
- كلبسات الفوانيس الامامية اتكسرت و اصبحت مثبتة من الاطراف الخارجية فقط.
- كلبسات الشبكتين الاماميتين اتكسروا تماما.
- لمبه حساس الايرباج منورة (الحمد لله انها مضربتش).
- مثبت السرعة عطل و لا يستجيب(غالبا له علاقة بعطل الايرباج).
السؤال دلوقتي اروح لسمكري عادي يلم العربية (برجاء ترشيح حد لو تعرفوا حد كويس) و بعدين اروح التوكيل يراجع اعطال الحساسات؟
ولا اروح لعصام الصفا على طول و اشوف هيغير ايه و يصلح ايه؟
افيدونا افادكم الله.

اولا : شكرا لكل الاعضاء اللي مروا و اللي ردوا على تفاعلهم معايا

ثانيا : اسف على التأخير فى الرد تم الاصلاح و الحمد لله اخويا الصغير وصلني بشخص متعود يتعامل معاه فى المواقف دي في منطقة العشرين بعين شمس استلم العربية و رجعها تاني يوم سليمة بتكلفة 1500جم
- الاكصدام اتلحم فيبر و اترش
- الشبك البلاستيك اتلحم و اتثبت
- الكبود اترد على البارد بصعوبة شديدة بس النتيجة مقبولة بنسبة 85%
- صدر العربية اتظبط بزرجينة
- بار حديد خلف الاكصدام اتسحب على مكبس و اتظبط
- ودان بلاستيك تثبيت الفوانيس اتلحمت فيبر و اتركبت
وبكده يكون مش باقي غير موضوع الكلوك سبرينج و ده له قصة تاني.