الموضوع: تقرير مبيعات السيارات في مصر النصف الأول 2008

المشاركة الأصلية كتبت بواسطة wawoo

عجيب قوى التقرير دة :

-مبيعات متسوبيشى نزلت الى النصف , غريبة فعلا ان المتسوبيشى مبيعتها تنزل فجائة كدة , يترى الناس بتبعد عن الانسر على حساب تويوتا ولا اية الحكاية , الموضوع دة جدير بالبحث .

لألألأ مش كده خالص..
الناس مسابتش ميتسوبيشي عشان تويوتا..
بس اللانسر القديمة بعد ما بقي سعرها مبالغ فيه بدرجة كبيرة..
و مهما كان مبالغ فيه.. فهو احسن بتكير من سعر الكورولا الجديدة..
و النيسان بصراحة انا مبسوط عشان التطور ده.. ده حقها الطبيعي.. و لسة هتعلي عن كده..

بس كويس ان تويوتا فى الترتيب الثالث لسيارات الركوب مع ان لديها الياريس فقط والكورولا يعنى تقريبا عربيتين فقط دون الاخذ فى الاعتبار العربية افانزا

هيونداى لديها عربيات اكثر تنوعا ثم شيفروليه ثم تويوتا

بس فعلا دول اكثر 3 انواع سيارات منتشر الآن

فيه جزء مهم انا تاجر سيارات وكل يوم بيكلمنى ناس كتير وبيسال ناس اكتر الكل بيسال عن اشياء معينه لما نرجع للزمن لمده سنه واحده يس كانت الاسئله مختلفه يعنى اليوم مش فارق السعر لانه بيدفع قسط ولو زادت السياره 5000 جنيه معنى كده ان القسط حيزيد 83 ج فى الشهر بس وده بالنسبه لناس كتير مش مهم
من سنه كانت دى مشكله والزبون بيهرب علشان سيارة فيها زياده 1000 ج مش 5000ج
من شهر كان العميل لا يسال عن البنك الممول الان العميل بيطلب بنك معين للتعامل معه
يعنى كل يوم فيه تغيير لكن بعض الوكلاء غير مهتمين بذلك وبالتالى نجد تغير فى الخريطه من توكيل الى توكيل
النقطه التانيه ان البنوك علشان تاخد حصه من التورته اللى هيه السيارات بدات تدى لمندوب البيع عموله علشان تحفزه ولازم التوكيلات تدخل تحفز مندوب الشركة لان 90% من الزبائن مشتتين ومن تنوع المعروض مش عارف يشترى ايه انا عندى ناس بتشترى منى كل يوم برأى بل كل ساعه بقرار واول ما بيوصل اى معرض بيكون غير قراره وكمان نصهم بعد ما بيدفع المقدم بيغير تانى رايه وبيحاول يغير العربيه
كدهتبقى البنوك اللى مش فنيه فى السيارات دخلت السوق بدراسات واثرت على الزبون فى قرار التمويل والعكس بالنسبه للوكلاء لم يكن لهم وجود يذكر فى قرار العميل القرار فى يد مندوب البيع وتوجهات صاحب المعرض بمعنى ان فيه سياره معينه سعرها جميل وشكلها اجمل وقطع غيارها متوفره ولكن العميل مش راغب فيها للاسباب التى ذكرت بعض منها والمفروض ان العميل قبل ما ياخد قرار الشراء يكون له راى 80% فى السيارة اللى حياخدها والبنك اللى حيموله وبعد ذلك ياتى اقناع المندوب فى المعرض بالسيارة ولكن الان العكس هوه الموجود وده لان الوكيل بيعمل دعايه مش ما بيعملش لكن مش بتاثر فى العميل بدرجه كبيره والدليل انه بيغير رايه كذا مره بعد ما بيكون اتخذ قرار شبه نهائى
النقطه التالته بدات مشاكل الاستيراد من الخارج تظهرولم تتكيف بعض التوكيلات مع التغير اللى حصل فى السوق بمعنى ان الاستيراد مربوط بتاجر وهوه وشطارته انه يجيب السيارة من الخارج ويدخلها فى مصر فى وقت معين وتكون النوعيه دى مطلوبه او يخزنها الى ان تتاح له الفرصه ببيعها بالسعر المناسب له ودى مشكلة التوكيلات ان سعرها مغالى فيه وكمان السياره مش موجوده طول الوقت يعنى بالحجز ومرات الحجز بيطول الى 6 اشهر لان الوكيل غالبا لا توجدعنده السياره ولا توجد عنده دراسه لاحتياجات السوق او الدراسه موجوده بس مش دقيقه
النقطه الرابعه وهى خاصه بالسيارة لانسر من متسوبيشى ان الشكل الجديد لم تعلن عنه الشركة بالشكل الكافى وبالتالى الزبون لا يرغب فيه لانه شكل غريب شويه بخلاف التيوتا الكرولا اعلن عنها الوكيل بشكل جيد والشكل الجديد اكثر قابليه على المدى القصير من الشكل القديم وبالتالى ذادت مبيعاته من الوكيل ومن الاستيراديعنى لو العكس حصل من شركة متسوبشى كان اتغير الميزان لصالحها بس مش كتير وزى ما قلت قبل كده ان فرق ال 5000ج بالنسبه للعميل لا يمثل مشكله وبالتالى حتى لو الفرق بين تويوتا وبين لانسر 10000ج حيبقى القرار لصالح تويوتا لان شكلها احسن واسمها اقوى عالميا
اما السيارات الصغيرة فبدون منافس الى الان السياره الماروتى تتربع على القمه لعدم وجود المنافس فى السعر او قابلية الشكل او القرارات الجديدة المدعمه لها من الدوله
مع اقتراب السياره البيكانتو رغم فرق السعر ولكن مع وكيل قوى يرغب فى تعديل الخريطه لصالحه وبدون ضجيج وبمساعده من الشركه الام فى كوريا بالنسبه للدعايه والاسعار
النقطه الاخيره وهى السياره الصينيه وهى تتقدم بخطوات متعثرة فى السوق بعيدا عن الاسبرانزا بوكيلها الشاب التى تتقدم بخطوات كبيره نظرا لتنوع الموديلات مع التحميل على السيارات الدايو والتى توقف نموها منذ اكثر من سنتين
اما السيارات الفاخره فانقلب الحال الى صالح بى ام دبليو وفولكس فاجن خصما من المرسيدس وذلك لفروق السعر الواضحه وتقبل الشكل الجديد بالنسبه للمشترين
واتمنى ان اكون اختصرت المداخله بما يخدم مستخدمى المنتدى وامنيتى هى اعداد دراسه بسيطه لنشرها على المنتدى لنناقشها سويا ونستفيد منها بائعين ومشترين فى القريب العاجل باذن الله