الموضوع: اعلان قانون المرور الجديد جامد اوى

المشاركة الأصلية كتبت بواسطة Chicco

كلام جميل و مثالي انما بالتجربة العملية غير موجود
تاريخ الحكومة مع اختراع قوانين و تمريرها من مجلس الشعب و عدم تطبيقها بعدالة أو مساواه واضح للجميع
المشكلة مش عدم وجد قوانين ...المشكلة في تنفيذ القوانين ......العدل و المساواة ...لا ده موجود و لا ده موجود

تمام يا استاذ شيكو أتفق معك بشدة.(هى ايه الحكاية:)؟)
مثلا لما احب احاسب الناس على الركنة صف تانى يبقى الأول لازم ألزم كل مول تجارى أو محل أكل أو اى مبنى يفترض تكدس السيارات امامه انو يعمل جراج بأسعار معقولة أو مكان لانتظار السيارات,
الكلام ده مشفتوش الا فى سيتى ستارز فى مصر لكن الى هيركن فى الجراج بتاعه هيتخرب بيته (ده غير طبعا الأسعار المولعة بداخله), على ما اذكر انى ركنت مرة بداخله (و كانت أول و اخر مرة) و دفعت ما يقارب ال20 جنيه فى ساعتين(مش فاكر المبلغ بالضبط بس كنت بتألم و انا بدفعه).
لكن طبعا البهوات الى بيفتحوا المراكز التجارية مش هيسيبوا قانون زى ده يعدى و يلزمهم بتوفير اماكن للسيارات.
مثال جميل كان محمد صبحى الممثل الهزلى بيقوله فى برنامج ما على قناة روتانا, المذيعة فى نهاية البرنامج سألته عن قانون المرور الجديد, فقالها أنا عجبتنى حاجة واحدة فى مرور فرنسا, و أشار انو ساعات بيبقى زحمة و فيه سائقين كتير همج زى مصر,لكن اللى عجبه انو الرادار موجود بشكل واضح و ظاهر و بيحطوا لافتات تحذيرية قبليه, و فى اماكن متكررة, فبتكون النتيجة انو السائق مبيلحقش يجرى بين رادار و رادار, اما فى مصر, فبيخبوا الرادار ورا الجبل, ليه؟ عشان هو عايزك متشوفش الرادار و تجرى و بعد كده يقفشك و انت بتجرى, هو فى مصر عايزك تجرى و بعدين ياخد منك فلوس, لكن فى فرنسا مش عايزين فلوس هو مش عايزك تجرى عشان سلامتك.