ازاي تحسب المساحه الصافيه للشقه ؟

**shaddadfalcon1** · 25-03-2013 01:58 PM

السلام عليكم

لو رايح تشتري شقه والراجل بيقولك مثلا الشقه 100 متر او 200 متر وطبعا دي بتبقي المساحه الكليه
شوية اساله بقي:

1- بتدفع المساحه الكليه ولا الصافي؟
2- كيفية حساب الصافي؟
3- ايه النسبه للفاقد اللي بعدها يبقي خساره ليك تشتريها؟ يعني مثلا لو الشقه 100 متر في العقد المفروض الصافي ميقلش عن كام متر؟ 80 مثلا او 90؟

ولو حد يعرف حاجه عن التمويل العقاري يقولي وهل في شركات تمويل عقاري بتحاسبك زي البنوك بمعني انك لو اخدت 100 الف منهم بفايده مثلا 10% يعني المفروض المبلع اللي ترده 110 الف
لو دفعت 10 الاف الاول وبعدها حبيت تسدد المبلغ الكامل هل ساعتها هيقولك ال 10 اللي انت دفعتهم دوول الفوايد ولازم تدفع بقي ال 100 الف كلهم ولا هيخصم من ال 10 اللي دفعتهم قيمة الفايده وتدفع الباقي وخلاص؟

شكرا جزيلا

**wardet** · 25-03-2013 02:29 PM

بص ياباشا اللى اعرفه انك بتقيس الشقة بالمتر
يعنى كل اوضه طول فى عرض وتكتب المساحة كام بالمتر المربع وتجمعهم
هو غالبا الشقة لو مثلاَ 150 متر مربع بتصفي على 125 او 120
شوف بقى انت النسبة واحسبها على المساحة اللى انت عاوزها

**mohamed_selim** · 25-03-2013 02:30 PM

بتدفع على المساحه الكليه اللى فى العقد و دى اللى بتحددلك نصيبك من الارض
الفاقد بيختلف حسب رسمة العماره و شطارة المهندس .... الطبيعى من 15-20 % (و ممكن تزيد لحد 22-23%) لو الارض فيها جزء ميتبنيش عليه ...
فى ناس معندهاش ضمير و شفت شقق فيها فاقد وصل ل 38% !
الصافى بيتحسب بالامتار ... تجيب متر و تحسب مساحة كل غرفه و الطرق و بلكونات ....
ممكن تزود عليه سمك الحيطان الداخليه لو عايز تحسب بالظبط المتر يقف عليك كام

**hanyemad123** · 25-03-2013 02:42 PM

زى ما قال الاخوه تحسب فراغات الشقه طول فى عرض و تتوقع على كروكى
و ما نتساش تحط الحوائط (بين كل فراغ و التانى ) كل حيطه بسمكها
و بعدين ترسم الشقه على اوتوكاد و فى امر فى البرنامج بيحسب المساحه الكليه