هو تقسيط المصرية بمقدم كام............؟؟

السلام عليكم يا اهل المنتدى الكرام

هوالتقسيك اللى نازل فى الجرايد ده فى اعلانات المصرية
بمقدم كام

انا كنت فى المصرية امبارح
و الموظف لغبطنى على الاخر

يعنى اما كنت بسأله علة السيتى ال 1300 اللى هى ب 84000
قالى ان المقدم يبقى 60فى المية من تمن العربية
دا على اساس ان القسط زى ما هم كاتبين 588 جنيع شهريا

و بعدين اما قولتله انى عايز ادفع 700 جنيه فى الشهر قال يبقى المقدم 54000

و بعدين سألته على النظام بتاع خمس سنين بدون فواد و بدون مقدم
قال لازم يكون فى و ديعة بكامل تمن العربية فى البنك


لو حد فاهم حاجة يفهمنى

المصرية دول مش مظبوطين ما تتعاملش معاهم ، يكتبوا فى الجرنان قسط 500 جنيه ولما تروح يقولك دة لما تدفع 60% من تمن العربية أو مقدم 10000 لعربية تمنها 120 الف وتروح علشان تسأل على القسط تلاقيه يوصل 3000 جنيه ، يعنى كله جر رجل الزبون. بالنسبة لنظام الخمس سنين بدون فائدة ، هو المفروض بتكون حاطط وديعة بتمن العربية ودى انت بتاخد عليها فايدة وفى نفس الوقت بتدفع فايدة على القسط فهو لما بيقسط بوديعة بيدخل فائدة القسط فى فايدة الوديعة ويفهمك انك مقسط بدون فوائد ، أحيانا فائدة الوديعة بتكون أكبر من فائدة القسط علشان كدة تلاقى إعلانات تقولك قسط بدون فوائد وخد فلوس.

تم التعديل بواسطتى : انت عايزهم يرفعوا قضية سب علنى علينا ولا ايه يا ابو سيف ؟ :)
Abdallah

شكرا يا أفندم على ردك
بس سيادتك متعرفش ممكن أقسط منين بأسعار معقولة

كل المعارض بتقسط مع البنوك ، وفائدة البنك بتكون فى حدود 8 أو 9% سنويا من المبلغ اللى هاتقسطوا يعنى مثلا لو عاوز تشترى عربية ب 70 الف وانت هاتدفع 20 الف مقدم يبقى المبلغ اللى هايتقسط 50 الف تضربه فى الفائدة ولتكن 9% وبعدين تضرب فى عدد سنين القسط وليكن مثلا 5 سنين وبعدين نجمع عليهم المبلغ الأصلى اللى هو فى الحالة دى 50 الف:

يبقى 50000 * 0.09 * 5 + 50000 = 72500
نقسم بقى المبلغ دة على 60 شهر يديك القسط اللى هاتدفعه يبقى 72500 ÷ 60 = 1210 جنيه فى الشهر تقريبا
روح لأى معرض وهو هايقولك على أنظمة التقسيط اللى عنده ، انما لو عاوز تقسيط مباشر مع المعارض فدى بصراحة معنديش فكرة عنها ، وبالتوفيق ان شاء الله.

فغلا المصرية دول نص كم، انا لما كنت بشترى رحتلهم قالولى ان احنا مبنبعش كاش :shock: :shock: ، قلتله ماشى ادفع 75% والباقى على سنة بدون فوائد زى ما بيكتبوا قاللى ما فيش حاجة من غير فوايد :roll: و الظريف ان الواد البجح ده بيقوللى ايه يعنى لما تدفع شوية فوائد، ده يدوبك تمن الهدايا اللى بنديهالك :D

انا اتصلت بيهم مرة بعض المعرض عشان اسئل على التخفيضات اللى عملنها بمناسبة المعرض , و هما حطين رقم فى الجريدة , ردت علية واحدة كدة مش فاهمة حاجة و حولت اسئل على التخفيضات المزعومة اللى هما عملنها دى , قالتلى معرفش اى حاجة , وتعلى المعرض و اسئل بنفسك , بصراحة خدمة ممتازة , يعنى حطين رقم و بيوقلك اتصل و لما تتصل يقولك تعلى , امال هما اخترعو التليفون لية ههههه , قولتلها طيب انتو حطين التليفون لية قالت التليفون دة عشان خدمة العملاء
حاجة عجيبة فعلا اكن التخفيض دة سر عسكرى ميتقلش فى التليفون لازم فى ودانك على طول ,
مش عارف لية ليسة فى ناس بتفكر بتفكير السبعينات ؟؟؟؟؟؟ و عمار يا مصرية ...هههههه

شكرا لكم جمسعا على ردودكم.....
و أخص بالذكر استاذ ابو سيف على الشرح
جزاكم الله خيرا

كريم باشا

احسن مكان تقسط منه هو كونتاكت

مقدم يبدأ من 25% و تقسط على حد اقصى 5 سنين

أشكرك يا زميل الكفاح العزيز :D

اقتباس:

---

المشاركة الأصلية كتبت بواسطة Kareem

شكرا لكم جمسعا على ردودكم.....
و أخص بالذكر استاذ ابو سيف على الشرح
جزاكم الله خيرا

---

العفو يا دكتور كريم :) وان شاء الله ربنا يوفقك وتجيب أحلى عربية

اقتباس:

---

تم التعديل بواسطتى : انت عايزهم يرفعوا قضية سب علنى علينا ولا ايه يا ابو سيف ؟

---

على رأيك مش طالبة محاكم :lol: :lol:

باركليز او عودة هما الكويسين الى وحدين الى مبيخدوش توكيل او مفتاح

أنا رأيي بنك اسكندرية ممتاز

ابعد عن المصريه لان كلامهم شئ و بيعملو ئ تاني خلص و بيدفعوك اكتر بكتير.
كونتاكت ممتازين و عن تجربه.\

أبعد عن المصرية خالص
جماعة غير أمناء بالمرة
أسأل فى البنك الأهلى المصرى الفائدة عندهم قليلة تقريباً 8%
وبنك ناصر الإجتماعى أقل بنك 6 % فقط ولكن إجراءات روتينية شوية
وتحتاج ضامن
لكن حذار التعامل مع المصرية