العربية سخنت عالاخر

**katoba** · 25-03-2013 08:44 PM

السلام عليكم

العربية من شوية وانا ماشى عالطريق السريع بتاع مصر اسكندرية

سخنت جامد ومؤشر الحرارة نور

وديتها لاقرب ميكانيكى لقينا قربة المية الى لسة مغيرها فى الضمان فيها شرخ كبير جدا وكل المية عالارض

الى لاحظته وانا سايق لما المؤشر نور ان السحب بتاع العربية قل جدا والتصقيف زاد اوى اوى

هل دة له علاقة بموضوع السخونه

ارجو الافادة من حضراتكم قبل ماروح التوكيل بكرة

**hugan** · 25-03-2013 08:55 PM

ربنا يستر وما يكونش حصل حاجه
شوف الزيت اخباره ايه
ان شاء الله خير

**mohamed_selim** · 25-03-2013 11:49 PM

لما العربيه تسخن قوى المروحه شغاله على طول و العربيه كهربتها بتتبرجل و كانها عايزه تكفى
ده طبيعي و هيروح مجرد ما تظبط دورة التبريد
المشكله ايه اللى شرخ القربه؟

**katoba** · 25-03-2013 11:53 PM

والله تفسيرك منطقى جدا بخصوص موضوع الكهربا واتمنى تضبط مع دورة التبريد وبالنسبة للقربة انا بقول يمكن بسبب مطب اكلته من يومين مثلا والشرخ زاد مع الوقت

**mohamed_selim** · 26-03-2013 12:15 AM

اصل القصه دى حصلتلى على طريق سفر بس خبطت كلب كسر الرادياتير فالعربيه سخنت و اتبرجلت و كنت خايف يطلع حاجه تانيه مع الرادياتير بس كان فى ميكانيكى قالى متقلقش اظبط الرادياتير و كله هيظبط و ان المروحه شغاله على اقصى سرعه و مبتفصلش و ده مبرجل العربيه
اتاكد بس من موضوع المطب عشان متكونش فى حاجه فى دورة التبريد سببت سخونه خلت القربه اتكسرت ... خليهم يكبسو ميه فى الدوره لما تغير القربه عشان تتاكد ان مفيش تسريب و ان الدوره سالكه

**katoba** · 26-03-2013 04:27 PM

الحمدلله تم حل المشكله فى التوكيل وطلع السبب من الكوع الموصل من الرديتاتير وقربة الميه اتفك وبينزل المية كلها عالارض وفية شرخ كمان فى القربة دة بعيدا عن الردياتير

ضبطو الكوتشة دى وحذرنى الفني هناك من مشكله كبيرة وهيا ان لما المؤشر كان عالنص وانا كنت فرحان وبقول ان

الخطر مش كبير اوى لان لسة موصلش للخطر واعلى درجة للمؤشر دة معناه انه كان فى اقصى درجاته لان مفيش ميه فبالتالى مفيش مؤشر يقدر يحدد المدى بتاع الحرارة فبيبقى عالنص

حبيت اقولكم الى حصل معايا وشكرا اخي الفاضل mohamed_selim على التحليل المنطقى والافادة