الطبيعي في الدول اللي جوها صافي ونقي ان الهواء يكون بيتاخد من برة
لكن نظراً لحلاوة شمسنا وخفة ضلنا والجو اللي عندنا هباب طول السنة .... فمعظم الناس بيخلوا دورة الهواء من جوة بس
دور الفلتر بيقتصر على فلترة الهواء اللي معدي على الكويل - الجزء الأساسي المتسبب في التبريد - سواءً كان مصدر الهواء داخلي أو خارجي , لأن كدة كدة العربية فيها دواسات ورمل وتراب وبيتشال ده كله في الفلتر
آه الفلتر بيقلل شوية من سرعة تبريد الهواء علشان هو أصلاً بيقلل سرعة تدفق الهواء - علشان بالطبع محتاج يتفلتر الأول قبل مايعدي - لكن بنسبة بسيطة
كمان كفاءة التبريد بتكون أقل بشكل كبير لو كان مصدر الهواء من برة , يعني اللي عايز يبرد الهواء بسرعة بيخلي الدورة داخلية فقط علشان الهواء اللي تم تبريده يتم تبريده تاني وبكدة يضمن سرعة وصول درجة الحرارة للدرجة المقبولة
امتى تفتح الدورة وتجيب هواء من برة ؟ :
1- لما العربية يكون فيها ركاب كتير ونفس ويحصل كتمة وممكن يزيد معدل ثاني اكسيد الكربون , ساعتها هاتحس ان صدرك ضاق وممكن تدوخ والناس اللي عندهم حساسية هايجيلهم نوبة كحة على طول
2- لما تكون راكن العربية لازم تخلي الهوا يدخل من برة علشان يعمل تهوية بدل الهوا اللي كان مكتوم جوة العربية فترة طويلة
3- في أيام البرد الشديد والرطوبة انت محتاج تقفله شوية وتفتحه شوية علشان لو سبته مفتوح هايدخل هواء مشبع ببخار الماء وهايعمل ضباب على الزجاج من جوة
4- في القيادة العادية لازم تفتح الدورة وتجيب هواء من برة على الأقل كل ساعة مرة تستمر لمدة خمس دقايق علشان تغير هواء المقصورة الداخلية وتسبب الشعور بالانتعاش ...لأن الهواء هايتكتم ويخلص منه الأكسجين وهايخليك حاسس بالخمول والخنقة وصدرك هايضيق
كدة كدة فيه طريقة أسرع لتغيير الهواء - إذا كنت ضامن سلامة الطريق وقت فتح الشبابيك - انك تفتح كل الشبابيك لمدة دقيقتين هاتغير الهواء بسرعة وتقفلهم تاني .... كدة أسرع وأفضل من فتح بوابة سحب الهواء من برة
الفلتر ده اختيار شخصي ممكن تحطه وممكن لأ ...لكن في الأجواء الترابية والطينية لازم تخليه موجود علشان تحافظ على مروحة التبريد وأجزاء التكييف الداخلية من التلف بسبب تراكم التراب عليها
المفضلات