الموضوع: مدرسة انجليزى و عايزة ازود دخلى

المشاركة الأصلية كتبت بواسطة ahmedteam

مدارس الانترناشيونال موجوده فى القاهره الجديده و طريق الاسماعيليه و اكتوبر

ايوة انا عارفة و عارفة اماكنها كمان
بس المرتبات فيها كام
و بالصراحة خايفة لاماتكونش فارقة عن الحكومة

المشاركة الأصلية كتبت بواسطة abo malek

ربنا يوفقك لما يحب ويرضى.

اللهم امين
و جزاكم الله كل خير على مرورك الكريم

المشاركة الأصلية كتبت بواسطة amaamas

بالنسبة للمدراس الدولية معظمها المدرسات بيبقوا اجنبيات او مصريين عاشوا برة و معاهم جنسية اجنبية و المصريين (احنا الغلابة) بيبقوا مدرس مساعد (ليهم طبعا ) و دة بدءا من الحضانة حتى المراحل الاخيرة وبالنسبة للرواتب بتبقى 1500 وانتى طالع والزيادة السنوية بتبقى ملموسة :) و ميزة الموضوع دخل +حجم و مسئوليات العمل حلوة و الادارات فيها عناصر اجنبية فالعملية بتبقى مظبوطة بدءا من الالف حتى الياء و اما عيبه ممكن يبقى غير مناسب لبعض طموحات الناس (هاتفضلى مدرس مساعد )

اما البنوك
اقدامك كول سنتر او خدمة العملاء فى البنوك مثل hsbc مثلا والرواتب بتبقى عاليه و ايضا عيب الموضوع (لازم تبقى مدمنة برود و صبر اعلى من الجمل (مينفعش تنفجرى :))

و الاهم من دة كله الوصول للحاجات دى عايزة من المرء حمله توزيع ال cv باليد و الايميل لهذة الاماكن ترليون مرة دون كلل او ملل او فقد امل وبالاضافة لشركات التوظيف الللى على النت و اللى لها برضوا امكان و ا تقدمى واعملى مقابلات لوطائف مش عايزة تتقدمى ليها عشان تكتسبى احتكاك وخبرة فى المواضيع المقابالات

و نصيحة اخيرة ابعدى عن و طائف الكول سنتر و خدمة العملاء فى قطاع شركات الاتصالات (المحمول) مثل فودافون يو كية رغم الدخل الكويس لان نظام العمل شيفتات متغيرة وبالتالى الاجازة الاسبوعية متغيرة بطريقة متستفزة و الدورة الزمنية للموظفين و المديرين قصيرة جدا (الناس بتهرب منهم) و حتى لو الشفت اتثبت معاده الاجازة تطلع يوم الاثنين مثلا ؟! و اسف للاطاله

جزاكم الله كل خير على ردك الوافى
و فعلا انا لازم اسعى و اعمل c.v. و اقدمها فى كذا مكان و ربنا ييسر الخير من عنده
و على فكرة ماعنديش مانع من كونى مدرس مساعد اطلاقا
فعلى الرغم من ان التدريس من اسمى المهن بس للاسف على الواقع مجال مقرف (سامحنى يا رب )
الطلبة مش عايزة تتعلم و لا تتعب و الموضة يقوللك حاعمل ايه بالشهادة
يا ميس بصى لنفسك و مرتبك و اديكى مدرسة انجليزى
هى منظومة خربة للاسف و ربنا وحده عنده الفرج
انا لله و انا اليه راجعون
اللهم اجرنى فى مصيبتى و اخلفنى خيرا منها

المشاركة الأصلية كتبت بواسطة shaddadfalcon1

المدارس اللغات ممكن تقدمي فيها ومرتباتها حلوه قوي لاني اصلا مصاريفها عاليه يعني 15 الف للطالب وطالع

اسمع عن واحده زميله في الشغل كانت مبرمجه وسابت الشعل واشتغلت في مدرسة من دوول والمرتب كان تقريبا 3000 جنيه يعني احسن من الشغل مليون مره

اعملي بحث عن المدارس في القاهره كانك هتقدمي لطالب مثلا وروحي اسالي فيها علي شغل

جزاكم الله كل خير
و باذن الله حادور فى المدارس و انا اساسا جبت عناوينهم و رقم التليفون
و ربنا ييسر الخير من عنده

المشاركة الأصلية كتبت بواسطة beshomilan

غريبه جدا انا اختى مدرسه فى مدرسة امريكان كبيره جدا ليها فرع فى الزمالك وفالمهندسين ومرتبها ميعديش الالف!!!!والمدرسين شكلهم غريب جدا ومش اجانب وعايشين بره زى مابيتقال!!
والطلبه عندها بتدفع بال 20 الف فى ابتدائى فمش عارف فين الارقام اللى بتقولوا عليها دى!!!

الكول سنتر ممتازة جدا وبتبتدى من 3000 لفوق واعتقد شيفتات البنات الصبح والضهر فقط واتوبيس من باب البيت للشغل والعكس وتأمين صحى واجتماعى
البنوك كذلك برضه وريسبشن الفنادق
عندك كمان تدريس الانجلش فى مركز التدريب بتتحاسبى بالساعة وبتكون حسب شطارتك فى التدريس ومبتقلش عن 30 جنيه وبتوصل ل 100 جنيه واكتر طبعا فى الساعة فتخيلى بقى كام كورس يطلعولك كام

ادخلى amcham.com فى قسم ال recruitment هتلاقى حاجات جامده كتير وتابعيه كل يوم ومش هتندمى ابدا..وهتدعيلى

واى سى فى يتبعت على الميل فقط ..واى كلام غير كده مش صحيح ولا تلفى ولا اى حاجه
انا رحت اكتر من 50 انترفيو فى حياتى الوظيفيه بدءا من الشركات العالميه حتى الشركات الصغيره جدا وعارف كلامى كويس

ربنا يبارك فيك و جزاكم الله كل خير على ردك الكريم
و باذن الله ادخل على الموقع ده و ربنا ييسر الخير
ربنا يكرمك و يبارك فيك

المشاركة الأصلية كتبت بواسطة wael30003

اقولك حاجة احسن حلجة تدعى ربنا يرزقك بالزوج الصالح

الشغل للست بهدلة مهما كان

ولو اشتغلت قبل الزواج مش هتقدرى تسيبى الشغل بعد الزواج لانك اتعودتى على مستوى دخل معين مش هتقدرى تنزلى عنه

الشغل للست العاملة استهلاك لادميتها رهيب وانا شايف اما عينى زميلات فى الشغل بقول الله يكون فى عونهم

جزاكم الله كل خير
و و الله ( بعقد الهاء ) انا مؤمنة بالكلام ده,و مين يكره كده ؟؟
و ربنا العالم بالحال
و سعيي على الشغل و زيادة الدخل لظروف خارجة عن ارادتى انا اتحطيت فيها و مش بمزاجى و ما ينفعش اتملص منها
ديننا جميل و كرم المراة بس للاسف مجتمعنا بهدلها و ربنا عنده العفو
و على كل يا ريت تفتكرنى فى دعائك و ان ربنا يرزقنى الزوج الصالح و نعين بعض على امر ديننا و دنيانا
و جزاكم الله كل خير مرة تانية

المشاركة الأصلية كتبت بواسطة dede_dodo88

مراكز التدريب أقتراح كويس خصوصاً أنك بتقولي بتحبي التدريس.. على ما أتذكر في berlitz ده كويس ممكن تجربي تقدمي فيه..

و جربي برضه قدمي في بنوك مش هتخسري حاجة, بس الموضوع بيحتاج بال طويل أوي لأن التعيين في البنوك بيتم على نار هادية..

جزاكم الله كل خير و ربنا يبارك فيك
و باذن الله ادور و ربنا يقدم ما فيه الخير