اقتباس المشاركة الأصلية كتبت بواسطة help4me مشاهدة المشاركة
السلام عليكم اخوانى فى الله
انا مدرسة لغة انجليزية خريجة تربية عين شمس و عاملة دبلومة فى اللغويات و معايا icdl & toefl
بعد المقدمة دى كلها انا شغالة فى الحكومة و مرتبى صغير
انا عايزة ازود دخلى و فى نفس الوقت اشتغل فى مجال احسن
كان حلم حياتى اشتغل فى بنك , يا ترى ينفع و ايه البنوك اللى ممكن اقدم فيها و لا كله برده بالواسطة؟؟؟
قريبتى قالت لى دورى على مدارس الانترناشونال , طيب فين و المرتبات فى حدود كام ؟؟
و بعدين هدانى تفكيرى لمجال الترجمة , بس اقدم فين و ازاى ؟؟
انا عايزة حد يدلنى و يكون له خبرة فى بلدنا يقوللى اعمل ايه و ايه الح ؟؟
و لا ارضى باللى انا فيه و خلاص و ربنا يسهل و المرتبات و المعاشات تزيد ؟؟
و لو سمحتوا ما حدش يقوللى ادى دروس , انا فعلا بادى بس مرهقة جدا و بتاكل اليوم و الصحة و كمان فلوسها منظورة جدا و فيها قلة قيمة غير طبيعية .
انا الحمد لله باحب التدريس و الكل بيشكر فيا , بس موضوع الدروس ده تاعبنى نفسيا و قرفاتة منه .
اسفة للاطالة و ربنا يبارك فيكم
انا زيك بالظبط...و للاسف شغال مدرس انجليزى فى مدرسه تجريبى حكومه بعقد ادارة بمرتب مخزى...و انا اتخنأت من جو الدروس الخصوصيه و اللف على البيوت....ربنا بجد يعدلنا الحال...للاسف احنا المفروض من اعلى الوظائف تقديرا و دخلا فى اى مكان فى العالم....لكن للاسف :( و نصيحتى ليكى، لو انتى فعلا متمكنه من التدريس، عليكى و على المراكز اللى بتعلم لغات، طبعا مش مراكز الدروس الخصوصيه، انا اصدى المراكز اللى بتدى كورسات لغات، انا لسه مخلص تمهيدى كورس TEFL كانو عملين عرض ليه لمده اسبوع، و اتعرفت على الناس اللى جات و حتى المحاضرين، كانو كلهم شباب و سألتهم ابتدو ازاى فى الكارير ده و فوجئت ان ولا واحد ولا واحده فيهم كان عايش بره او خريج جامعه امريكيه !! مع ان اللهجه بتاعتهم ممتازه قريبه جدا من لهجه اهل اللغه نفسهم!!! و منهم بنت شابه فى العشرينات، قالتلنا انها ابتدت عن طريق حبها للغه...كانت بتدرس فى تجاره عين شمس و مكنتش حباها عشان كان نفسها فى كليه تانيه بس المجموع خانها على اجزاء من ميه!!! ، كانت حابه الشغل اكتر و اختارت تجاره عشان مش مهم الحضور فيها، و ابتدت فى الكوول سنتر بتاع موبينيل و بعدين فودافون يو كيه و اماكن كده تانيه مش فاكرها...و ابتديت فى كارير التدريس عن طريق بيرلتز...ادمت فيه و قبلوها و دى كانت بدايتها، و من بيرلتز لمركز Not Courses بس مكملتش فيه لانو مركز شبه نصاب ( وانا فوجئت بكده الحقيقه ) و بعدين خدت كورس TOT و ربنا اكرمها و بقيت تدرس للناس business english و اتعرفت و بقيت تدرس للناس فى كذا مكان!! انا بصراحه بئا عندى امل و طموح انى ادخل السكه دى...انا فعلا ابتديت فيها عن طريق مركز رساله، اتطوعت معاهم لوجه الله و عشان اخد ثقه فى نفسى...كان اول مره الحقيقه انى اشرح لناس كبار و شباب...بس فعلا استفدت كتير من التجربه دى. و بعد كده تابعت الاعلانات اللى فى الوسيط عن المراكز اللى طالبه محاضرين انجليزى و قدمت و متوفقتش كذا مره لغايت ما ربنا اراد و اتقبلت فى مركز و اشتغلت فتره فيه و الحمد لله الناس كانت بتشكر فيا. انتى كمان حاولى تفكرى فى كلامى كويس و سيبك من نبره التشائم و الناس السلبيه اللى ممكن تهبط عزيمتك....عموما احنا عاملين صداقات على الفيس بووك للمدرسين و الناس اللى مهتمه بمجال انهم يدرسو فى مدارس دوليه او يكونو محاضرين. لو حابه تكونى فى الدايره بتاعتنا و نتبادل الخبرات و الاخبار ممكن تبعتيلى الايميل و انا اضيفك و اعرفك بباقى زمايلنا.
ياترى عملتى ايه؟ و عرفتى تلائى المجال اللى انتى عايزاه؟كمان ياريت تقوليلى عملتى الدبلومه دى فين بتاعت اللغويات لانى حابب اطور من نفسى.