جهاز حماية المستهلك -قمة ألأحترام
تجربة جميله و تستحق الكتابة عنها مع جهاز حماية المستهلك, القصة باختصار أنى للأسف أشتريت سخان يونيفرسال غاز و طبعا غاز فتم التركيب عن طريق شركة الغاز طبقا للقانون لضمانات ألأمن و السلامه و بعد أقل من سنة حصل عطل فى السخان و كلمت شركة يونيفرسال و بعد ما دوخونى الفنى جه و فتح السخان و قاللى أن مجموعة المياه بايظة و قام بتغييرها و بعد كده طلب منى 160 جنيه! ليه يا عم...قاللى الجهاز خرج من الضمان طالما التركيب ما تمش عن طريق الشركة! شرحتله موضوع شركة الغاز و خصوصا هنا فى جنوب سينا شركة الغز بتطبق معايير ألأمن و السلامة بنسبة 100% و كان رده أنه عارف ده و عارف أن ده عطل عيب صناعة بس النظام فى الشركة كده! ماعملتش مشاكل معاه لأنه مش ذنبه و دفعت و بعدين أكلم الشركة مرة و أتنين و تلاتة و كل مرة أستفزاز فى الردود و مفيش غير أن الجهاز خرج من الضمان!
بعت ايميل لجهاز حماية المستهلك و فى نفس اليوم كلمونى و بلغونى أن شركة يونيفرسال هايتصلوا بيا لحل المشكلة و فعلا لقيت الفنى و كبير المهندسين بيتصلوا بيا ورا بعض و ماشى دلوقتى فى اجراءات رد قيمة مجموعة المياه. عموما ده برضه تحذير من شركة يونيفرسال. منتهى التعنت و عدم احترام العميل و أكل حق العميل و توبه أنى أشترى الماركة ديه تانى. و تحيه لجهاز حماية المستهلك.