بص يا معلم ..
الطلبات دى جمعها وهخليها دايما عندك فى الجراج !!
المقادير :-
1 - جردل بلاستيك
2 - فرشه ناعمه (( مقشه )) ..
3 - قطعه مربعه من الاسفنج
4 - فوطه أو قطعة قماش من القطن (( فانله داخليه من الأخر )) بس تكون نضيفه جدا (للتلميع) ركز
5 - فوطه زفره (( عليها جاز واتحطت فى الشمس لحد ما الجاز نشف )) دى كمان للتلميع بس هشرحلك تحت
6 - أكياس بريل لكل غسله لا يقل عن كيسين (( الكيس بنص جنيه )) متبخلش
يارب مكونش ناسى حاجه وتعالا بقى أقولك تتعامل ازاى ..
طريقة الغسيل :-
* هات الخرطوم وافتحه عالاخر ورش الموتوسيكل تنزل التراب مش أكتر والمهم تبله بالكامل ..
* افرغ أكياس الصابون فى الجردل واملاه تلات أربع وحاول تخلى الصابون يعمل رغوه
* امسك الفرشه ( المقشه ) وقلب بيها الميه بصابون وابدأ ادعك بيها البايك وركز على اماكن تكون الطينه وبصمات الكلاب والقطط .. ولازم الفرشه تكون ناعمه عشان متجرحش الفيبر او الألوان ..
* بعد لما تخلص كرر نفس العمليه بس بالأسفنج ..
وأخيرا أدلق اللى اتبقى من الميه بصابون على الموتوسيكل وافتح الخرطوم وأشطف الموتوسيكل بس شطفه حلوه من اللى قلبك يحبها ..
* هات الفانله القديمه وابدأ نشف البايك بس يستحسن تسيبه ينزل جزء من الميه قبل التنشيف ولازم تكون الفوطه دى نضيفه تماما أنضف من خدومك عشان متجيرش
.................................................. .................................................. ........................
تنبيه :-
اوعى تخلى الميه تدخل جوا الشكمان او تييجى على البوجيه لو اسلام الكهربه عشان التلميسات .. يعنى اتعامل عادى بس متركزش الخرطوم على فتحة الشكمان او العدادات او الكهربه ..
بالنسبه للفوطه الزفره دى لما يكون فى تراب خفيف مش محتاج غسيل ..
وأخيراً .. لو عاوز البايك يلمع ويبقى أكنه لسه جاى من المعرض اسأل على علبة زى الكريم ( بولش ) ده اسمها
ولو جبتها اسأل بتستخدم ازاى لأنها حوار تانى
وأى خدمه
المفضلات