يا جماعة احنا فين من اتفاقية الجات ؟؟؟؟

**ZIMOFOX** · 07-08-2008 11:29 AM

السلام عليكم
اخوانى الافاضل
منذ نعومة اظافرنا ونحن نسمع عن اتفاقية تسمى الجات
تقريبا بقت فى احلامنا
انا بصراحة خايف اشتري سيارة جديدة وعلى حظى الزفت تطبق مع العلم انى احتمال اشتريها تقسيط
يعنى عندم هندم
والى متى الاسعار فى ارتفاع بالرغم من ارتفاع سعر البنزين حد يفهمنى اللعبة
اشترى ولا انتظر؟؟؟
مع العلم ان اي تغيير فى السعر هتبقى سلخه وتعويرة كبيرة

**D . a .\ AYMAN** · 07-08-2008 12:46 PM

ياباشا اشتري ومتقلقش لأن اتفاقية الجات كل سنة بيأجلوها يعني هية كان المفروض كانت تتنفذ بالنسبة للعربيات سنة 2005 وبعدين أجلوها لسنة 2008 وبعدين أجلوها لسنة 2010 وأكيد سنة 2010 هايأجلوها برضة

وبعدين حتى لو مأجلوهاش والجمارك على العربيات اتلغت (مع أن ده من رابع المستحيلات) هايلاقوا طرق تانية يغلوا بيها العربيات زي الرسوم الإدارية والضرائب وما الى ذلك لأن همة استحالة ينزلوا سعر العربية وتبقى زي اللى برة لأن كده العربيات المحلية هاتبقى أغلى وأوحش بكتير من المستوردة (يعني هايتفضحوا) وفي نفس الوقت مش هايعرفوا يسرقوا منيين فأكيد سعرها هايفضل زي ماهو ده إذا ماغليش .... سواء بقى تحت مسمى جمارك أو ضرائب أو رسوم أو .... أو ....

وكمان هما كانوا أعلنوا مرة في الجرنال ان حتى لو لغوا جمارك العربيات مش هايلغوها مرة واحدة ... لأ .... هاتبقى على مراحل من غير مايتحس بيها ومعرفش ليه

**kemoelord** · 07-08-2008 12:51 PM

معلش يا جماعه عذرا يعني هي اتفاقيه " الجات " دي بسمع عنها كتيرر لكن لا اعرف
ماذا تنص او ايه شروطها والي اعرفه بس انها بالاتفاق مع دول زي سرائيل وامريكا تقريبا ,,,,,,,,,,,

**Zazoksh** · 09-08-2008 06:02 PM

إتفاقية الجات تعنى للشعب المصرى ما يلى:

جاتنا نيلة فى حظنا الهباب

وبس

Zazoksh - Cairo, EGYPT

**MoToRiZeR** · 09-08-2008 06:04 PM

مصر في إتفاقية الجات .. زي ما راحت .. زي ما "جات" !

**PRO-DRIVE** · 09-08-2008 08:18 PM

لما اوروبا تطبقها الاول

نبقي نطبقها هنا :)

**kemoelord** · 10-08-2008 12:49 AM

لا الحقيقه افدتوني كتيــــــــــــــــــــــ ـــــــــــــــــــر

**دموع الثلج** · 10-08-2008 05:52 AM

اهى اتفافيه الجات دى بالذات جات ولا ماجات ادينا صابرين

**Chicco** · 10-08-2008 07:05 AM

المشاركة الأصلية كتبت بواسطة kemoelord

معلش يا جماعه عذرا يعني هي اتفاقيه " الجات " دي بسمع عنها كتيرر لكن لا اعرف
ماذا تنص او ايه شروطها والي اعرفه بس انها بالاتفاق مع دول زي سرائيل وامريكا تقريبا ,,,,,,,,,,,

الجات GATT هي أتفاقية دولية لتنظيم التجارة و التعرفة الجمركية بين الدول ....هدفها ضمان سريان التجارة الحرة بين الدول و ازالة العوائق اللي ممكن توقف التبادل ده

لو أطبقت بحذافيرها مفروض الدول تشيل كتير من الجمارك و رسوم الحماية اللي بتتحط على السلع المستوردة و منها العربيات

في الحقيقة ما فيش حد بيعمل كده و الكل بيحمي صناعته الوطنية قدام المستورد و كل شوية بيحصل نزاع و شكاوي و تحكيم دولي ما بين دعاوي اغراق أو دعاوي حماية داخلية زيادة

مصر مشتركة في الأتفاقية انما واخدة استثناء (كوسة ) انها ما تنفذهاش في الوقت الراهن ....و اطمن حتى لو أتنفذت حيطلعوا دشليون رسم و ضريبة و جمرك تخلي الأسعار ذي ما هي ....و على المتضرر

**tutankhamoun** · 10-08-2008 07:23 AM

و الله أنتوا ناس طيبين قوي

حتى لو إتفاقية الجات أطبقت في مصر و بقول حتى !!

سيتم إلغاء الدعم عن البنزين نهائيا
و عندها برضه مش هاتبقى العربيات رخيصة لأن مصاريف تشغيلها هاتبقى غالية

و أنا شخصيا شايف إن الجمارك و الضرائب دي منفعة للدولة الناس مش واخدة بالها منها
دخل إضافي للبلاد
الشعب في زيادة مستمرة
تخيلوا بقى
كل بني آدم غير منظم من البلد دي بقى عنده عربية !!!!
طبعا كمية تلوث فظيعة
زحام شديد ......... و أختناقات مرورية فظيعة

أنا مع المواصلات العامة ........... المواصلات العامة
التي أرى أن الحكومة لا تعطيها أي أهمية نهائي في البلد دي
لو الحكومة أهتمت شوية بالمواصلات العامة هاتحل أزمات كتيرة من أزمات المرور في مصر و خصوصا في القاهرة التي تختنق يوميا بسبب كثرة السيارات و غياب النظام و إنتشار الهمجية و الفوضى

أتوبيسات نظيفة .......... و بسعر مناسب حتى تستطيع الإستمرار في الخدمة
و أخرى بسعر مدعم للأقل دخلا
و تغطي كل الخطوط ........... و يجب إلغاء الميكروبصات في القاهرة الكبرى أساسا و إستبدالها بأتوبيسات محترمة حتى يعود الوجه الحضاري و النظام إلى هذه المدينة التي ندمرها نحن أهلها يوميا بسلوكيتنا الزفت
المهم أن أنا خرجت عن الموضوع خالص

أنا شايف إن الضرائب و الجمارك واجبة و لكن بنسب معقولة تحقق دخل للبلاد ........ و لا تقلل فرص المواطنين في إقتناء سيارات بأسعار مناسبة و يا سلام لو أهتموا بالصناعة المحلية و أنتجوا سيارات زي ماليزيا أو كوريا أو الدول اللي أتعلمت من الدول الكبرى و أصبح لها صناعة محلية تعتمد عليها
و تحيا ج ع ع

الموضوع: يا جماعة احنا فين من اتفاقية الجات ؟؟؟؟

LinkBack

أدوات الموضوع

عرض

-

-

-

-

-

-

-

المواضيع المتشابهه

يا جماعة احنا طلعنا فهمنا الديموقراطية غلط!!!!

يا جماعة احنا رايحين على فين بعد كدة (فيديو)

كلام كتير عن العربيات و اتفاقية الجات علي 2010

اتفاقية الجات

الكلمات الدلالية لهذا الموضوع

المفضلات

المفضلات

ضوابط المشاركة