الجنط الاسبور الأصلي بتاع العربية أخف وزنا من الجنط الحديد بتاعها ..وبالتالي هو بالتأكيد أفضل من الحديد ... أنا معرفش طبعا الجنط الاسبور الـ 16 اللى كان راكب ده نوعه إيه ... بس بتكلم عن الجنط الأصلي الاسبور بتاعها ... ده خسارة أن الواحد يغيره ويجيب مكانه حديد
الحسبة اللى حضرتك حسبتها فيها شيئ ناقص ... لأن العبرة بالوزن مش بمرونة الجنط ... الوزن الأخف هايكون مرن أكتر في إنه ياخد ويدي مع المساعد حتى لو كانت مادته أقسى من الجنط الثقيل
نشرحها على الشوكة الرنانة زي ما حضرتك قلت
الشوكة الرنانة لو كانت مادتها غير مرنة عن المادة المعتادة وحضرتك ماسكها بإيدك ... هاتكون كل الذبذبات اللى هاتصدر عنها .. إيدك انت اللى هاتضطر تمتصها لأن الشوكة غير مرنة .. طيب لو في الحالة دي الشوكة غير مرنة ووزنها تقيل جدا هاتلاقي إيدك تعبت جدا على ما امتصت الذبذبات بتاعتها لغاية الآخر .. لأن الشوكة تقيلة وغير متجاوبة مع الذبذبات
لكن لو كانت الشوكة الغير مرنة دي خفيفة جدا إيدك هاتمتص ذبذباتها بسهولة بدون تعب لأن وزنها خفيف برغم إنها غير مرنة لكن إيدك هاتقدر توقف ذبذباتها بسهولة لأنها خفيفة
الشوكة لما تكون مرنة وبتمتص هى الذبذبات برغم إن إيدك مش هاتتعب معاها لكنها هاتكون عرضة مع الوقت إنها تنثني وتتلوى عن شكلها الأصلي
إيدك هاتكون هي المساعد والشوكة هي الجنط ...
لازم الجنط يبقى قاسي عشان ما يمتصش الذبذبات الناتجة عن النقر والمطبات وإلا ها يتلوح ويفقد دائريته بسهولة مع النقر والمطبات ... لكن في نفس الوقت لازم يكون وزنه خفيف عشان المساعد اللى شايله ما يتعبش ويتعب اللى قاعد جوة العربية
عشان كدة كل ما كان الجنط من مادة أقسى وغير مرنة يكون أفضل ... وكل ما كان أخف في الوزن يكون أفضل