عيييب بجد .. اللى بيحصل .. وانتم كدا بتخـلونا ننصرف عن خدمة الاعضاء

الكلام الغير موزون فى النقد وطرح المشكلة وكل واحد فاكر ان اللى بيكتب ده وهو قاعد فى بيتهم وماسك كيبورد يبقا بياخد حقه منا او من غيرنا .. عيببببب جداااا

ومحدش يقولى هو الناس كدا .. ودى طريقة طبيعتها

لاننا كمان عندنا احساس وطبيعة .. وطالما الناس عايزة تستفاد .. يبقا عيب اللى بيقوله

بصراحة بالاسلوب اللى بيحصل ده فى قسم نيسان

يبقا قريب جدا حنسحب بجد من نايل موتورز واعضاء قدامى ومتعاونين كتير حينسحبه هما كمان
ومش حيتم تكوين تيم نيسان .. ولا اى عضو قديم حيرد ولا حيشارك على اى عضو بيحكى مشكلة له ولا على اى استفسار

لان مش كل شوية عضو يدخل يقولنا انتوا بتدافعوا عن المركز الفلانى
مش كل ما حنختلف معاه فى الراى وطريقة النقاش .. يتزنق ويقولنا اصل لكم بتدافعوا

حندافع ليه !!!!!!!!!! .. راجع نفسك فى الكلام ده .. وبص على مشاركات الاعضاء القدامى .. قد ايييه فى القسم .. وانت تعرف اللى بتقوله ده عيبببب .. وانكم مدانيين باعتذار للاعضاء اللى بترموا عليهم كلام بالباطل وعيب

فبلاش كلام غير منطقى
وراعوا احساس الناس اللى متواجدة هنا عشان مصلحتكم
وبتعمل موضوعات تفيدكم
وبتروح مراكز الخدمة عشان تحل مشاكلم
غير الاعضاء اللى بتعمل صيانة وبتفكر فى اخوانها وبتسال على مشاكلهم بالمرةوهى متواجدة فى مركز الخدمة
كل الناس دى بتدور على مصالحكم مش بتدافع عن حد

فعيب الكلام اللى بتقوله

واى عضو حيتكلم بالاسلوب ده ملوش مكانة عندنا ابدا
وحنقاطع موضوعاته

احنا بننقض باحترام .. اى سلبية
مش باسلوب ساخر ولا اهتزاء
لان فى كمان ناس كبار محترمة بتقرا .. وفيه سيدات بتقرا واخواتنا .. فعيب الكلام الخارج الملتوى او السخرية المستفزة لى حد بيقرا

والحمد لله جعلنا التوكيل نفسه ومراكز الخدمة انها تدخل تقرا
فلازم يكون عندنا اسلوب واعى لابداء النصيحة .. والنقد

احنا مش قاعدين فى شارع ياجماعة .. احنا فى موقع محترم جدا .. واعضاء ناس محترمين
ومنهم اللى بيخدموا لوجه الله .. ولمصلحتنا .. حتى لو شارك بكلمة واحدة

فياريت نرتقى باسلوبنا .. ونعرف اننا علينا مسئولية فى الكلام والنصيحة وابداء الراى .. وحتى النقاش فى السلبيات

فى حاجة اسمها كافيه .. نقدر نتقابل .. ونهزر ونتكلم براحتنا .. لكن
طالما معانا منبر نوصل بيه صوتنا .. يبقا نلتزم حرية التعبير باحترام ..
ونواجه اى مركز خدمة بسلبياته .. باسلوب بعيد عن التجريح
وانا قولت قبل كدا مفيش حد كامل .. واى مكان وارد جدا حيخرج منه خطا .. المهم حنتعامل معاه ازاى
وقولت ان فى مدير صيانة لكل مركز خدمة .. لو مش عاجبك حاجة ادخله واطلب مقابلته

ياريت لو سمحتم .. لما ننقض ننقض بوزن وباحترام المكانة اللى وصل ليها اعضاء قسم نيسان نايل فى توكيل نيسان ..

اكتب .. انقض .. قول اللى حصل معاك .. وقول انهم غلطانين من اول ما دخلت البوابة لغاية ما خرجت
لكن باسلوب يكون مفهوم .. ووضح كل السلبيات
وياريت برقم الحجز بتاعك وباول اربع ارقام او خمس ارقام تليفونك المسجل عندهم .. لان لعل وعسى يكلموك لما يقرا الموضوع عشان يحل مشاكلك .. ويعرفوا من الشخص اللى بيكتب وصاحب اى عربية .. لان اسمائكم فى الموقع لا تدل احيانا عن صاحب المشكلة ..

فساعدوا انفسكم

لكن مش باسلوب مبهم وغامض .. ومفيش فيه اى بيانات
وكمان مش باسلوب ساخر تضيع حقك فيه

عايزين نصلح .. مش عايزين نتسامر ونتسلى ونكححح من الضحك على الناس اللى قصرت فى شغلها .. لان بالطريقة دى احنا مش بنساعدهم ونقوهم .. احنا بنحبطهم .. وبنخليهم ياخدوا فكرة وانطباع عن الاعضاء مش ظريف

ارجوكم مزيد من العقلانية شوية
حتى لو حتكتب بهجوم .. بس مش خارج عن قواعد الادب .. وبعقل .. وبدون استهزاء

عشان نقدر نساعدك احنا كمان ونحل مشكلتك .. ونطور اى سلبية بنقع فيها

ارجوكم
ساعدونى
لان الامور مش مستحملة
مش عايزين نكره تواجدنا معاكم


تحياتى للاعضاء القدامى اللى حتساعدنا مع التيم
وتحياتى للتيم .. اللى قريب جدا حيتم اعلانه من ادارة المنتدى

والكل عليه مسئولية كبيرة هنا
لان المكان اصبح مسئولية كبيرة .. لانه قسم خدمى من الدرجة الاولى

واخيرا
اتمنى ان الكل يستوعب ما له وما عليه تجاه نفسه وتجاه الاخرين وتجاه هذا المكان باعضائه

ويارب الظاهرة السيئة دى تختفى .. والا نحن فعلا سوف نختفى

احمد مصطفى

اهدا شويه يا عم احمد انا معاك في كل اللي قولته بس مش لدرجه ديه و ياعم في بعض النفوس التعبانه ده الواحد في القسم ده ما بيعملش حاجه اللي لما ياخد رائيك انت و باقي الاعضاء و الاعضاء كلها عرفه مين بيتكلم بموضوعيه و مين لا و ياباشا متزعلش قوي كده و تزعل نفسك ده الواحد بيزعل علي زعلك

ياراجل تسيب المنتدى ليه بس ده انا من كتر حبي في قسم نيسان بالمنتدى ومشاركته الفعاله وفي اغلب المواضيع بفكر انضم لهذا القسم قسم الصقور
وبعد ما شفت موضوعكم عن نيسان قشقاي بفكر اشتريها وكون واحد منكم
استعذ بالله من الشطان الرجيم واعلم انه هناك من يريد الهدم وخلاص

الموضوع بسيط ,,,,,, الناس اللى بتتكلم باحترام ليهم كل احترام و تقدير اى حاجة غير كده , كبر دماغك انت مش مجبر تجاريه ف اسلوبه ,,,,, انساه

هو حصل آه ؟؟

لا حول ولا قوة الا بالله
مالك يا اخ احمد بس,,, ليه متضايق قوي ... متاخدش الكلام على اعصابك وتضايق نفسك لأن فعلاً في ناس لا تستحق انك تتنرفز علشانها ابداً

ايه اللى باخده من ورا كل ده ..
لما اروح مركز خدمة او اى عضو قديم راح مخصوص عشان عضو زميل ليه هنا ويعرض مشكلته على المسئولين .. ونتكلم مع الناس هناك عشان نحل مشكلة لحد .. والاقى المهندسين بتهاجمنا وبتكلمنا باسلوب مش كويس .. عشان تم نقدهم باسلوب خارج ..

حد يقولى ... حيعود علينا بايه .. واحنا ناس محترمة ولينا مكانا فى المجتمع .. والمسئولين يقابلونا مقابلة مش ظريفة .. حيكون وضعنا ايه

اللى بيكون فى وش المدفع دايما احنا .. مش اللى بيكتب .. ومع ذلك بنقف معاه .. وفى الاخر الاعضاء كمان تهاجمنا

بتنرفز من اللى بشوفه هنا وبره المنتدى


بره المنتدى مش مهم .. بس جوة المنتدى توصل اننا بنهاجم بعض !


انا مش بدافع عن حد .. ولا عضو قديم هنا بيدافع عن حد .. لاننا كلنا ناس محترمة
فى اعضاء قدامى فعلا انصرفوا عن قسم نيسان كتير بسبب اللى بيحصل

مهندس الخدمة لما بقابله او بقابل اى مسئول فى المركز .. بيشن عليه هجوم .. بيقولوا انتم بتهاجموا باسلوب خارج .. مش لازم يكون خارج وصريح .. لكن ملتوى ..

وبيقولوا والله احنا بنقبل النقد .. عشان نطور الخدمة ونطور فى مستونا
لكن مش كدا

وعارفين انكم بتساعدونا ومش نلاقى شكر دايما .ز اكيد عندنا سلبيات .. بس نعرفها باسلوب ميقتلش من عزيمة الواحد .. يساعدنا على تدارك السلبية وتطورها .. ده دايما كلام المهندسين ومراكز الخدمة

المهم

انا ولا غيرى من الاعضاء معندناش استعداد نتحط تحت ضغط تانى .. وكلام مالوش لزمة سواء داخل المنتدى او خارجه

وكلنا بنعمل كل ده تطوعى للمنتدى وللاعضاء او حتى لمراكز الخدمة
بنخدم الجميع عشان كل واحد يصل الى هدفه

وهدفى وهدف غير من الاعضاء اللى بتحب المكان واعضائه الحمد لله واضح للجميع
ارضاء ربنا ومساعدة كل ما يحتاج الى مساعدة سواء للمكان اللى احنا فيه ووصوله الى افضل مكانة
او مساعدة الاعضاء وحل مشاكلها
اومساعدة توكيل نيسان ومراكز خدمته لتحسين مستوى الخدمة عشان يعود علينا بالنفع

واحنا فعلا مش مسئولين عن رأى اى عضو .. لان اكيد رائه يخصه .. بس بردوا انطباع اى مكان لما بيشاهد اعضائه بينقدوا بالطريقة دى .. فى الاخر بيتحكم علينا كلنا

زى لما بتروحوا مركز خدمة ووجدته ان اى شخص تعامل معكم بالشكل الغير مناسب .. بتاخده حكم عام ان المكان بافراده سيئين

واحنا مش حنسمح بكدا فى مكانا هنا

احنا بندور على مصلحة الجميع
وقولنا ان القسم الوحيد اللى بيتعامل مع التوكيل ومراكز خدماته وبياخد خدمة محترمة .. واحيانا بنساعد على التغير وحل المشكلات هو قسم نيسان

وعشان كدا وجب اننا نوضح لكم

ومش معنى الكلام ان موجه لشخص بعينه

الكلام ده بقوله لانه زاد الفترة الاخيرة جدا

ولو كل واحد بص بالعقل وقراء وتواجد فى القسم .. وخرج منه وتعامل مع مراكز الخدمة بتعته بالعقل وخدم اعضائه ودخل فى نقاشات مع مسئولين حيفهم كلامى صح


ويكفى ان احيانا بسبب نقدنا المحترم .. حلينا مشكلة لعضو وكانت قطع الغيار اللى ناقصة فى السوق جبنلهاله من خط الانتاج نفسه

وكل ده عشان بنوصل اسلوبنا بطريقة بنائة ومحترمة

ولو حد قالى لا .. الناس اتحركت وحلت المشكلة لان دى سمعة وكيل
حقوله ماشى .. بس كان ابسط شيئ .. انهم كانوا قاله للعميل وقتها ينتظر زى اى عميل لان وقتها كانت مشكلة عامة.. واحنا حركناها بالادب والاحترام وقولنا انه كان عامل حادثة

وكان ممكن ابسط شيئ بردوا التوكيل يدفن راسه فى الارض .. زيه زى اى توكيل منافس .. وانتوا عارفين ان فى توكيلات منافسة كتير .. اسعار عربيتها غالية .. ومع ذلك بيدفعوا العملاء ويشتروا سياراتهم.. لكن مش بياخدوا خدمة ما بعد البيع محترمة وعلى مستوى اللى دفعوه فى عربياتهم

ومع ذلك
بنقول اكتبوا
واحكوا
واشرحوا المشاكل اللى عندكم
وجربوا بدل المركز 18 مركز لنيسان على مستوى الجمهورية
وقولوا السلبيات اللى وقعتوا فيها عشان نبلغها عشان نحلها ونوصلها لمراكز الخدمة

لكن بسلوب اللى بيسمعه يتقبله


هديك مثل

" ينفع انت لو محاسب او بشتغل اى مهنة .. اجى اقول ده احمد مش بيفهم وبيستهبل وحمار فى شغله او او من هذا القبيل .. اكيد احمد لما يوصله الكلام ده .. حقول ايه .. خالى راسه تخبط فى الحيط واللى عنده يعمله "

لكن ..

" لما اقول انا عندى مشكلة .. وروحت لاحمد ومش عملها .. ولقيته مقصر فى شغله .. وبطيئ .. وعيوبه انه مش مركز .. وانه فى بعض المعلومات غايبه عنه .. انقد باسلوب محترم .. اكيد احمد .. حيراجع نفسه ويقبل النقد .. وممكن احمد يقوله هاتلى العميل ده عشان اسمع مه عيوبى عشان اطورها .. "

ده المقصود

لازم نحكى ونتكلم .. بس نعبر باسلوب مسئول .. عشان نطور .. ونستفاد جميعا

لاننا كلنا راع .. وكل راع مسئول عن راعيته

اتمنى اكون وضحت وجهة نظرى

لان قسم نيسان مش قسم دردشة .. قسم خاص بمشاكل السيارات .. والاستفادة من المعلومات
واصبح الفترة الاخيرة له دور فى معالجة الاخطاء وتطويرمستوى الخدمة لنا فى مراكز خدمة نيسان

فلا نريد التجريح فى بعض مهما اختلفنا

تحياتى

بهدووووووووووووووء
حصل خير

طب نفهم ايه المشكله

الناس اللي مستغربة من كلام الاستاذ أحمد
معاشوش فالمنتدي اد اللي عاشه هو والاعضاء القدامى
كلنا نفسنا يكون بيتنا أحسن بيت فالدنيا وشرف في كل مكان سواء كان في المنتدى والانترنت او في الخارج من مراكز خدمة وخلافه
انا مع الاستاذ أحمد في كل كلمة كتبهاااااااااااا
ويارب توصلكو اللغة الشديدة اللي بيتكلم بيها وهتقدرو تعيشوها وتجسوها من خلال تعبه و تواجده وتوبيكاته ومشاركاته هو والناس القدام
تحياتي

هو ليه الموضوع لو كلامه مش تمام ميتمسحش خالص عن طريق المشرفين او انه يكون في طريقة ابلاغ عن مشاركه غير لائقه ولو وصلت لعدد معين يتلغي الموضوع ويتنسي بكل الللي فيه وبالتالي اي حد يتكلم بطريقه بعيده عن اللائق يتم مسح مشاركته او موضوعه وده من خلال اراء الاعضاء فيه مش عن طريق حد بعينه

معااااااك كل الحق فى اللى انت قولته......والله الواحد بيحس ان المنتدى وبالذات قسم نيسان بيته التانى وان الناس هنا كلهم اخواتى و بجد الناس هنا بتساعد من غير مقابل وربنا شاهد على كده وده انا لمسته هنا ا/احمد وغيره بيساعدوا من غير ما يبقى فى سابق معرفة صراحة جزاكم الله كل خير ...ان كان فى حد جديد مش عارف كده فده مشكلته هوا ولازم يعرف القواعد الللى مشينا بيها هنا

أخي العزيز الفاضل / أحمد بك مصطفي
لا أتخيل هذا المنتدي بدونك
فحقا أشعر أنه بيتي الثاني و لا أهنأ حتي أتداخل و أتواصل و أقرأ كل ما يتم تدوينه و ذلك لأنه يحوي نخبة من الشخصيات المحترمة الودودة التي تتفاني في خدمة أشقاءها
و أنت يا سيدي الفاضل
لا أنسي إستقبالك لي عند وصولي من أسوان و مدي حفاوة الإستقبال و كرم لقاءك و الذي زادك عندي قيمة و قامة
فليكن صدرك واسعا
فوجودكم في هذا المنتدي أصبح بمثابة التكليف منا إليكم ولا نتخيله لحظة بدونكم
تحياتي العطرة لكم و لكل من يقدم جهده وعونه للغير بدون إنتظار حتي كلمة شكر
وحفظك الله من كل سوء و سدد خطاك

اقتباس:

---

المشاركة الأصلية كتبت بواسطة togo

هو ليه الموضوع لو كلامه مش تمام ميتمسحش خالص عن طريق المشرفين او انه يكون في طريقة ابلاغ عن مشاركه غير لائقه ولو وصلت لعدد معين يتلغي الموضوع ويتنسي بكل الللي فيه وبالتالي اي حد يتكلم بطريقه بعيده عن اللائق يتم مسح مشاركته او موضوعه وده من خلال اراء الاعضاء فيه مش عن طريق حد بعينه

---

الفكرة مش الموضوع يتحذف وخلاص
الفكرة ان الناس تعرف وتفهم ان ده بيأثر بالسلب علي المنتدي بوجه عام وعلي نيسان بوجه خاص
وعلي يدي كنت بكلم احد المهندسين وقالي (الناس بتغلط فينا عندكم )
طيب
اول حاجة ....... انا ايه ذنبي اسمع الكلمتين دول ؟
تاني حاجة .... تاريخ المنتدي ونيسان اللي قعدنا نبني فيه وبفضل الله وصل للي هو فيه دلوقتي راح في كلمة او هايروح بسبب ان مفيش التزام بطريقة النقد
اللي متفقين عليها
وقولنا 1000000000000 مرة يا جماعه الاعضاء الجدد يخشوا المكتبة ويقروا المواضيع وخاصة خريطة قسم نيسان
علشان يتعلموا ويعرفوا طريقة ونهج المكان
لان كلنا بنستفيد من المنتدي ومراكز الخدمة

وقاعده في مصر معروفة (السيئة تعم) ....... يعني لو قعدنا نبني في مكان دهر من الزمن و جيه موضوع ولا حد عمل مشكلة يقولك بص.... المكان ده مش تمام والناس بتغلط فيه في بعض ... الخ

طبعا الحمد لله احنا علشان عارفين المنتدي والاعضاء الافاضل اللي بعتبرهم اخواتي انا شخصيا وربنا يعلم
فعرفت ارد عليه و الموضوع عدي و قولتله انت عارفنا يعني وعارف المنتدي اكتر مننا
وانت بيجيلك اشكال والوان .... يمكن انت متحكم اكتر
لكن احنا هانتحكم ازاي ؟!!

انا مقدر االلي احمد فيه طبعا ومعاه في كل كلمة لاني بسمع من اللي هو بيسمعه وعارف هو وصلنا بفضل الله اولا واخيرا ازاي للمستوي ده
فانا طالب منكم تعذروه و تساعدونا لاني زي ما قلتلكم ... النفع بيعود علي الكل وانتوا شايفين
مش كلام علي الهوا وخلاص

اسف اني طولت عليكم
تحياتي

معاكم حق فى كل اللى قلتوه
وان كانت تقريبا انعدام الأخلاق و انحدار الذوق العام هى السمه السائده أو ستسود فى المحروسه

فلا تحزن
ولا تهجر بيتك الأول واحط تحتها 100 خط لتواجدك المستمر فى المنتدى وتلبيه طلبات وحوائج الأعضاء
الواحد يا ما استفاد من حضرتك ومن الأخوه الفاضل فى مواضيع كتيره
و كفايه انك تقضى حاجه أخ ليك ولتحتسب الأجر عند الله





فلا تحزن

انا مش عارف أقول ايه بصراحه .. الواحد بيبقي عايز يفيد اللي حواليه علي قد ما يقدر و الموضوع تطوعي و المشكله لما تتحل الواحد بيفرح كأن مشكلته هو اللي اتحلت و كذلك لو اشتري حاجه للعربيه و كانت كويسه بيقول رأيه سواء جيد ام سيء بأمانه مش علشان هو اشتراها تبقي احسن حاجه في الدنيا لانه ببساطه لو كانت سيئه هو مش هياخد إلا دعوات عليه من كل اللي هيتدبس فيها لانه اخد بنصيحته بينما لو كانت كويسه مش هياخد عليها نيشان و علشان الدقه في النصيحه و لافاده الناس علي قدر الامكان في ناس بتروح التوكيلات مخصوص بتعمل تقارير علي الطبيعه و بتوصل كمان للإدارة بتاعه التوكيلات و بتقولها الناس عايزه ايه و كمان بتتوسط للناس علشان تستلم بسرعه او التوكيل يعملهم حاجه داخل الضمان مع انها المفروض انها تكون خارج الضمان و كل ده لله لانه بقي شبه مستحيل ان الواحد يلاقي اليومين دول حد بيعمل كده لكن هو ده اللي بيحصل و لذلك لما حد يبقي بيعمل كل ده و عمل مجهود وهمي في القسم من ساعه لما بدأ و يلاقي نوع من التطاول او حد بيحاول يقضي علي الروح الجميله بين الاعضاء اكيد هيغضب و يتنرفز اكتر من كده بكتير كمان ... برجاء من كل واحد قبل ما يكتب تعليق ياخد الكلام السابق في الاعتبار و يبقي عارف ان اللي داخل يرد عليه ده هدفه انه يفيده و يساعده في حل مشكلته و مع تعدد الآراء بيبقي باين الاغلبيه ماشيه مع اي نصيحه و أسباب النصيحه كمان و هو اللي في الاخر بياخد القرار و ما ينفعش يبقي رد النصيحه اتهام او رد غير لائق لان ببساطه ده هيؤدى الي ان محدش هيدخل ينصح تاني او يساعد حد و ده هيضر الجميع و مش هيبقي في اي نوع من تبادل الخبرات و ما اعتقدش ان دي حاجه اي حد ممكن يكون عايزها

الاخ الحبيب الغالي الاستاذ احمد مصطفي

كان الله في عونك

انت تقدم لهذا المنتدي و لهذا القسم مجهودك و وقتك لوجه الله تعالي

و ما يحدث في رأيي شئ طبيعي كي يزداد الاجر من الله تعالي فالشجرة المثمرة هي التي تقذف دائما اما الشجرة الخاوية العقيمة فلا يلتفت اليها الناس

و انت و اخوانك من القائمين علي القسم تأخذون دعوات بظاهر الغيب منا جميعا ليل نهار من قضيتم له مصلحة و من توسطم له لحل مشكلة و من اعنتوه علي اختيار من الاختيارات لخبرتكم العالية و من وفرتم له في نقوده بتقديمكم عرض خصومات من مركز من مراكز الخدمة و من نصحتوه لوجه الله لشراء من مكان معين و من قدمتم لهم التقارير و كل ما هو جديد في مجال السيارات و خصوصا النيسان

كل ما سبق بيكون كعداد شغال الله ينور و بسم الله ما شاء الله زمانه وصل دلوقتي لكام قصر في الجنة و كان الله في عون العبد ما كان العبد في عون اخيه
و من فرج عن مؤمن كربة من كرب الدنيا فرج الله عنه كربة من قرب يوم القيامة

و بعد كل هذه الدعوات من اغلب الاعضاء و بعد كل هذه القصور ( انا مش بقر و لا حاجة هههههههههه )

ستجد حتما بعض المعاناه مثل طوبة كده ضالة قذفها صاحبها علي غير هدي بفهم محدود هو فكره ضيق هو عاش حياته كلها علي مبدأ ( هات و خد ) يعني لم يعلم ان هناك مبدأ اسمه فعل الخير بدون مقابل في الدنيا و انتظار المقابل من الله عز وجل فهو بفكره الضيق و اسلوب حياته بيظن ان اي مجتهد مثلكم فهو بالتأكيد مستفيد من هنا او من هناك يعني فكره انك قاعد ماسك شوال و بتعبي فلوس من خلف هذه التوكيلات و انك لا تقدم النصيحة لوجه الله بل بمقابل مدفوع الاجر مسبقا و امثال هؤلاء البشر لو انك حاولت ان تعدل من تفكيرهم سوف تتعب و تخسر وقتك و مجهودك معهم بلا فائدة

فأرجوك انفض عنك الهم و الغم و هناك من يدعو لك بظاهر الغيب مئات الاعضاء فأكثر منهم و زد في حسناتك و ثقل ميزانك معهم و لا تحزن من القلة التي ذكرتها لك لانهم قلة و يجب ان يكونو موجودون في المعادلة حتي يكون الاجر عظيم بأذن الله

تصدق انا بعد موضوعك ده مضطر اقول الله يعينك يا مرسي هههههههههههه

تحياتي اليك اخي الحبيب و ربنا يجعله في ميزان حسناتك

اقتباس:

---

المشاركة الأصلية كتبت بواسطة sonasteel

الفكرة مش الموضوع يتحذف وخلاص
الفكرة ان الناس تعرف وتفهم ان ده بيأثر بالسلب علي المنتدي بوجه عام وعلي نيسان بوجه خاص
وعلي يدي كنت بكلم احد المهندسين وقالي (الناس بتغلط فينا عندكم )
طيب
اول حاجة ....... انا ايه ذنبي اسمع الكلمتين دول ؟
تاني حاجة .... تاريخ المنتدي ونيسان اللي قعدنا نبني فيه وبفضل الله وصل للي هو فيه دلوقتي راح في كلمة او هايروح بسبب ان مفيش التزام بطريقة النقد
اللي متفقين عليها
وقولنا 1000000000000 مرة يا جماعه الاعضاء الجدد يخشوا المكتبة ويقروا المواضيع وخاصة خريطة قسم نيسان
علشان يتعلموا ويعرفوا طريقة ونهج المكان
لان كلنا بنستفيد من المنتدي ومراكز الخدمة

وقاعده في مصر معروفة (السيئة تعم) ....... يعني لو قعدنا نبني في مكان دهر من الزمن و جيه موضوع ولا حد عمل مشكلة يقولك بص.... المكان ده مش تمام والناس بتغلط فيه في بعض ... الخ

طبعا الحمد لله احنا علشان عارفين المنتدي والاعضاء الافاضل اللي بعتبرهم اخواتي انا شخصيا وربنا يعلم
فعرفت ارد عليه و الموضوع عدي و قولتله انت عارفنا يعني وعارف المنتدي اكتر مننا
وانت بيجيلك اشكال والوان .... يمكن انت متحكم اكتر
لكن احنا هانتحكم ازاي ؟!!

انا مقدر االلي احمد فيه طبعا ومعاه في كل كلمة لاني بسمع من اللي هو بيسمعه وعارف هو وصلنا بفضل الله اولا واخيرا ازاي للمستوي ده
فانا طالب منكم تعذروه و تساعدونا لاني زي ما قلتلكم ... النفع بيعود علي الكل وانتوا شايفين
مش كلام علي الهوا وخلاص

اسف اني طولت عليكم
تحياتي

---

عندك حق يا حسين.. وأنا أيضا اتكررت معي يوم الصيانة من مهندس وقالهالي بالحرف "يا عم ما انتم بتغلطوا فيا في المنتدى" وخد بالك من الكلمة (بتغلطوا) وطبعا المهندس ده أنا بحترمه وبقدره وبعزه جدا وزعلت إنه يقول كده وقعدت أعتذرله كتيييير.. ذنبي إيه أنا في كل ده

احنا عايز الكل يكتب تقارير ويحكى اللى حصل معاه .. وينقد .. ويقول ايه المشاكل اللى حصلت معاه .. مش معنى اللى بنقوله ده ان محدش يحكى .. عشان بس الناس اللى بتفهم الكلام غلط !

زى ما وضحت قبل كدا فى كلامى وكلام القدامى القدامى اللى بندور على مصلحتكم ان ..
المكان هنا وصل الى مكانة فى قلوب اعضائه وحتى اعضاء الاقسام الاخرى .. واصبح مثال يحتذى بيه
وايضا وصل الى مكانة كبيرة فى قلوب المسئولين فى توكيل نيسان ومراكز خدمته
وكل المهندسين والمسئولين بيتابعوا الموضوعات .. واللى مش بيتابع بنرسل له لينك الموضوع والمشكلة للعميل .. لو كانت مشكلة كبيرة فعلا

وحتى دايما اى مسئول ومهندس فى نيسان .. بيقولولى بنحب نقرا ليكم موضوعاتكم ومعلوماتكم عشان بنستفاد منها
وبنستفاد من نقدكم واى سلبيات بنقع فيها .. بيهمنا نعرفها
فلازم نستغل الموضوع ده .. فى اننا ازاى نوجه الرسالة ليهم ولبعضنا البعض

فاتمنى ان ظاهرة التخوين فى بعض تتلاشى
واتمنى النقد الساخر يختفى ايضا .. وننقد ونحكى المشاكل بدون التجريح فى اى مهندس فى التوكيل حتى لو كان المهندس ده اخطا .. نوجهوا ونقوله انت غلط فى كذا

وبلاش بقا كلام .. نصابين .. وحرامية .. واكلونى الاونطة وقالى كلمة ورجع فى كلامه .. شكله شارب حاجة .. عالم كفتجية .. وكلام كتير من هذا القبيل

وزى ما وضحت بردوا .. ليك اى مشكلة بينك وبين مركز الخدمة او مهندس الاستقبال .. حقك تطلب مقابلة مدير الصيانة شخصيا

تحياتى للجميع
وشاكر تفهمكم وتكاتفكم للموضوع

انا نفسى اتكلم بس ساكت

مشكله المصريين عموما ان احنا بنفشل فى معرفه كيفيه الحصول على حقوقنا

وفى الاخر بنحب نعمل بروبجاندا على الناس وعلى نفسنا

اخى الكريم


احمد بك

السلام عليكم ورحمة الله وبركاته


وانا اتصفح صفحات نيسان شد انتباهى عنوان موضوعكم الكريم

وانا فى خارج المنزل ومعى اللاب دائما افضل ان اتصفح الموضوعات واذا لزم الرد فأؤجل ذلك الى حين العوده الى المنزل وما شد انتباهى بالموضع ففضلت ان ارد بكلمات ولو قصيره حتى لاتطير العبارت من خلدى لو انتظرت العوده الى المنزل

اخى الكريم بادئ ذى بدء سوف اذكرك بالعباره الشهيره
( الشجره المثمره دائما ماتقذف بالحجارخه للحصور على ثمرها )

نخن مع النقد البناء وضد النقد اللاذع

نحن مع ثوره الحق وضد التجريح بالكلمات

نحن مع المواجهه المنطقيه وضد التلاعب بالالفاظ او التلميح بالكلمات

ولسنا مع احد ضد احد

فنحن نعمل لله من اجل مصلحه اهل هذا المنتدى وزائريه

نحن مع عرض المشكله بموضوعيه وضد السخريه من المشكله او من مليقوم بالمساعد ه فى حل المشكه
ولى عوده باذت الله

بصراحه انا مش عارف اقول ايه.....يعنى ناس بتقدم خدمات للناس وبدل ما نساعدهم ندخل نجرح فيهم و نتسببلهم فى احراج مع ناس محترم.
قلبى معاك يا استاذ احمد ...بس للاسف فى ناس كدا تحب تشوه اى حاجه حلوه من اجل الخنقه وخلاص.....وعلى فكرة مش فى المنتدى هنا وبس .....كذا مرة اقابل واحد فى مواقع الالعاب الجماعيه يدخل علشان يرجم فى اللعب وخلاص ....يعنى حتى فى اللعب الناس بترخم من اجل الرخامه بدل ما يدخل يستمتع بوقته لا يدخل يغلس على الناس وخلاص.
انا فى راى ان فعلا اى مشاركه يكون فيها خروج عن المالوف فى الحديث او طريقه غير لائقه تتقفل, لان مهما عملت مش حتقدل تحكم على الناس او تغيير اسلوبهم.
وربنا يوفقك لما يحب ويرضى.

فالبدايه احب اشكرك يا استاذ احمد انت وكل الاعضاء اللي بيبذلوا مجهود من اجل توفير الخدمه لزملائهم الاخرين فالمنتدي و اتفق معاك جدا فكلامك,, طبعا الاسلوب المحترم هو افضل طريقه لحل المشكلات, ولازم افراد مراكز خدمة نيسان يبقوا فاهمين انك مش مسؤال عن اي حد ينتقدهم باسلوب لا يرضيهم وان دا سلوك شخصي لا تسئل انت ولا اي احد من الاعضاء عنه وطبعا لا يقلل من قدرك ولا مكانتك فااااااي شيء فنحنا جميعا نعرف انك انسان محترم وبتقوم بمجهود خرافي من اجل راحة الاخرين واعتقد ان اي مركز خدمه هايتعامل معك او مع اي احد من الاعضاء اللي هما حلقة وصل بينهم وبين العملاء بطريقه غير مرغوب فيها دا ممكن يخلينا نقاطع المركز دا تماما .. , وان لو في حد قصر فهم من قصروا في تأدية الخدمه للعملاء وبالتالي تم نقدهم بطريقه غير مرعوب فيها ولا تسئل انت ولا الاعضاء عنها , وان مش كل الناس عندها ثقافة النقد باسلوب راقي .. بنشكر ليك مجهودك وان شاء الله تفضل منور المنتدي وخصوصا قسم نيسان وربنا ما يجبش مشاكل .

خلاااااااااااااص بقه ياجماعة صلوا على سيدنا النبى (اللهم صلى وسلم وبارك عليك ياسيدى يارسول الله)
وكمان صلوا على سيدنا عيسى (عليه السلام) وسيدنا موسى وكل رسل الله (عليهم منا جميعا الصلاة والسلام)
خلص الكلام فى الموضوع ده (أنا آسف طبعا) بس بجد حاجة زادت عن حدها وأعتقد ان اللى بيحصل ده ممكن يكون من غيرة الناس مننا لأننا فعلا ناجحين وده اكبر دليل لما تلاقى مراكز خدمة عارفينا وبيتابعونا ومواقع تانية غيرانة مننا وناس ملهاش فى اى حاجة داخلين يعكروا صفو المنتدى الجميل ده والناس المحترمة اللى فيه ردنا عليهم (موتوا بغيظكم) وبعدين ياعم أحمد مصطفى انت وكل الناس القدامى فى المنتدى عشان منساش حد الكل بيحلف انه بيقدركم وبيحترمكم بره وجوه والمنتدى من غيركم ولا حاجة وافتكروا انه قام على ايديكم يعنى بيتكم وبنيتوه ولسه كمان حتكبروه ارمى ورا ضهرك وسير فى طريقك الجديد (نيسان تيم) مش عشان والله حنستفيد منكم أكيد ولكن لأنكم جديرين بالثقة والإحترام من الجميع وكذلك تحمل المسؤلية
عايزين بقه خبطاتك الجامدة تسمع فى المنتدى كله احنا فى انتظارك

نسيت اقولكم
دمتم فى رعاية الله وأمنه

انا مقدر موقفك يا استاذ احمد ولاكن ال بيحب بيته وبيحب يكون افضل بيت مبيسبهوش ولو حتى ايه الحصل
انا معاك فى الكلام البتقوله بس اخر حاجه ان الفرد منا يسيب بيته علشان كلام واحد مش فاهم حاجه
اتمنى تقيل اعتزارى بالنيابه عن من اسؤ لاى فرد

بص بقه يا أستاذ احمد تي ڤي...انا اعرف حاجة واحدة بس ان العميل دائماً علي حق و ديه حقيقة غائبة عن كل المصريين.

و شوف بقه عدم الاحترافية كمان، ان الموظف يشتكي عميل لعميل تاني و يقوله يخبط دماغه في الحيط، ياخي نامت عليه حيطه.

للأسف الموظف المصري حايفضل طو عمره فاكر انه بيفهم اكتر من الزبون لمجرد انه قاعد علي مكتب و قدامه كومبيوتر و اجنده..

و علي فكرة انت بتتكلم بنفس أسلوب الناس اللي انت بتنتقضها... و ما فيش حاجة اسمها نقض بنٌاء الا في حالة انك تكون أصلا مستعد لسماعه.

و كمان ده منتدي علي الإنترنت، مش مجلس نواب الامم المتحدة، و في ناس طبعها ساخر و ده ما بيضرش، بالعكس بيلفت الانتباه أكثر و يغير الجو شوية و يكسر الملل....

بس يا سيدي... روق يا معلم

و نقولها تاني... الموظف اللي يشتكي عميل لعميل تاني يبقي موظف قُلَّه و عايزله شهرين خصم يفوقوه..

او اقوله انت هنا لخدمة العملاء و ليس لإثبات وجهة نظرك حتي و ان كانت صحيحة.

حاولوا نستفاد من الغرب شوية في جزئية خدمة العملاء، اللي منكم سافر عارف انا باقول ايه كويس.

تحياتي

اقتباس:

---

المشاركة الأصلية كتبت بواسطة togo

هو ليه الموضوع لو كلامه مش تمام ميتمسحش خالص عن طريق المشرفين او انه يكون في طريقة ابلاغ عن مشاركه غير لائقه ولو وصلت لعدد معين يتلغي الموضوع ويتنسي بكل الللي فيه وبالتالي اي حد يتكلم بطريقه بعيده عن اللائق يتم مسح مشاركته او موضوعه وده من خلال اراء الاعضاء فيه مش عن طريق حد بعينه

---

الكلام ده بيفكرني بـ ايه .... ايه .... ايوة، افتكرت.... الدستور :rolleyes2:

أنا كنت خايف من اليوم ده ..

هيحصل سوء تفاهم كتييييييير للاسف !

اقتباس:

---

المشاركة الأصلية كتبت بواسطة dr'ahmzzong

أنا كنت خايف من اليوم ده ..

هيحصل سوء تفاهم كتييييييير للاسف !

---

طبعا لازم يحصل.... اللي بيحصل هنا في الموضوع ده اقدر اسميه مُرساويات .. استشاري او رئيس يلوم شعبه انه بيطمع في خدمة افضل او عيشة افضل...

بعد كده با جماعة اللي يروح التوكيل و يخرج مش مبسوط يا ريت يشتكي بالشكل الآتي:

"انا كنت في التوكيل الجميل و قابلني المهندس الأمور اللي جابلي نسكافيه جامد تنين و مصلحليش العربية المعفنة بتاعتي عشان انا اللي الغلطان و مش قادر آجي علي نفسي شوية و أعود نفسي علي عيبها و طبعا افكركم ان انا مش بادفع تمن الخدمة ده.... لاء لاء خالص.... انا باعتبر اللي انا بادفعه في التوكيل زكاة عن عفيتي. اللهم ديمها نعمة و احفظها من زوال و ما يقطعلناش عادة يا رب....."

عاشت توكيلات نيسان حرة ابية.

انا مش معاى نيسان ومع ذلك متابع القسم ده بشكل مستمر عشان مجهودات اعضاء القسم اللى انا شخصيا شايفها ممتازة
عشان كده ارجوا من الجميع انه يتقبل راى بنفس راضية ده بعد اذن اعضاء القسم جميعا طبعا
وقبل ما الموضوع يحصل فيه اى انواع من سوء الفهم بين المشاركين حبيت اوضح ثلاث نقاط :
1- بعد اذن ا/احمد انا اعتقد انى فهمت المقصود وهو ببساطة انك مش ضد اى تجربة او مشكلة او نقد او حتى سخرية بس ما يكونش فيها تجريح
2- بعد اذن ا/نشأت اكيد مش المقصود الحجر على رايك ابدا ، يعنى سخرية حضرتك واسمحى اقتبسها

اقتباس:

---

"انا كنت في التوكيل الجميل و قابلني المهندس الأمور اللي جابلي نسكافيه جامد تنين و مصلحليش العربية المعفنة بتاعتي عشان انا اللي الغلطان و مش قادر آجي علي نفسي شوية و أعود نفسي علي عيبها و طبعا افكركم ان انا مش بادفع تمن الخدمة ده.... لاء لاء خالص.... انا باعتبر اللي انا بادفعه في التوكيل زكاة عن عفيتي. اللهم ديمها نعمة و احفظها من زوال و ما يقطعلناش عادة يا رب....."

---

مافيهاش تجريح فى اى شخص
3-اكيد هدف اى عضو من سرد اى موقف حصل معاه سواء كان حلو او وحش هو افادة باقى الاعضاء او طلب مساعدتهم وده مش ممكن يتحقق غير بمراعاة اسلوب الكتابة
اسف للاطالة و ارجوا ان يستمر تطور هذا القسم للافضل دائما حتى عشان بقية الاقسام تغير منه و تقلده

اقتباس:

---

المشاركة الأصلية كتبت بواسطة Nashaat Rady

بص بقه يا أستاذ احمد تي ڤي...انا اعرف حاجة واحدة بس ان العميل دائماً علي حق و ديه حقيقة غائبة عن كل المصريين.

و شوف بقه عدم الاحترافية كمان، ان الموظف يشتكي عميل لعميل تاني و يقوله يخبط دماغه في الحيط، ياخي نامت عليه حيطه.

للأسف الموظف المصري حايفضل طو عمره فاكر انه بيفهم اكتر من الزبون لمجرد انه قاعد علي مكتب و قدامه كومبيوتر و اجنده..

و علي فكرة انت بتتكلم بنفس أسلوب الناس اللي انت بتنتقضها... و ما فيش حاجة اسمها نقض بنٌاء الا في حالة انك تكون أصلا مستعد لسماعه.

و كمان ده منتدي علي الإنترنت، مش مجلس نواب الامم المتحدة، و في ناس طبعها ساخر و ده ما بيضرش، بالعكس بيلفت الانتباه أكثر و يغير الجو شوية و يكسر الملل....

بس يا سيدي... روق يا معلم

و نقولها تاني... الموظف اللي يشتكي عميل لعميل تاني يبقي موظف قُلَّه و عايزله شهرين خصم يفوقوه..

او اقوله انت هنا لخدمة العملاء و ليس لإثبات وجهة نظرك حتي و ان كانت صحيحة.

حاولوا نستفاد من الغرب شوية في جزئية خدمة العملاء، اللي منكم سافر عارف انا باقول ايه كويس.

تحياتي

---

اقتباس:

---

المشاركة الأصلية كتبت بواسطة Nashaat Rady

طبعا لازم يحصل.... اللي بيحصل هنا في الموضوع ده اقدر اسميه مُرساويات .. استشاري او رئيس يلوم شعبه انه بيطمع في خدمة افضل او عيشة افضل...

بعد كده با جماعة اللي يروح التوكيل و يخرج مش مبسوط يا ريت يشتكي بالشكل الآتي:

"انا كنت في التوكيل الجميل و قابلني المهندس الأمور اللي جابلي نسكافيه جامد تنين و مصلحليش العربية المعفنة بتاعتي عشان انا اللي الغلطان و مش قادر آجي علي نفسي شوية و أعود نفسي علي عيبها و طبعا افكركم ان انا مش بادفع تمن الخدمة ده.... لاء لاء خالص.... انا باعتبر اللي انا بادفعه في التوكيل زكاة عن عفيتي. اللهم ديمها نعمة و احفظها من زوال و ما يقطعلناش عادة يا رب....."

عاشت توكيلات نيسان حرة ابية.

---

السلام عليكم

ياباشا العميل دايما علي حق ... بس العميل اللي عارف ياخد حقه ازاي
عمرها ما كانت بالسياح ولا بعلو الصوت الا في مصر ......... وحضرتك عشت بره
شوفت حد بياخد حقه بالسياح و علو الصوت الا نادرا ؟؟!!
لا هنا في مصر العكس ........ تسيح الاول و تعلي صوتك و تضيع حقك و يمكن متعرفش تاخده و في الاخر يطلع الطرف التاني اللي غلطان

موقف بسيط (في فوافون)
واحد داخل وليه فلاشة USB modem والمفروض ليه طريقة دفع معينة والموظف بيشرحهاله والراجل مش فاهم ..... الراجل شتمه !!!
وفي الاخر طلع الموظف اللي صح ........ ده مثال
وهكذا ....... انا شخصيا مش كده
لا بعرف اعلي صوتي ولا اقل ادبي و لا اسيح .. علشان اعملهم سمعة مش مظبوطة وهما يجروا ورايا
في مصر دلوقتي محدش بيخاف علي حد
لا عميل ولا غيره .... لانها خربانة خربانة وكل بيخاف يسمع كلمة تزعله من حد لان مبقاش حد ليه خلق يسمع كلمه من حد

انزل كده الشارع واخبط واحد في كتفه لكنك مش قاصد ........

اول حالة : متقولوش انا اسف ....... هايشتمك
تاني حالة: قله انا اسف .. هايبصلك من فوق لتحت و يبصلك بصة تحرقك وتمشي وتندم انك اعتذرت

مينفعش بقي ناخد كل اسلوب وكل عادة سئية من بره وتيجي عند حق غيرك وتقوله شوف بلاد بره بيعملوا ايه ........ طيب انت شوفت نفسك الاول (انا مش بتكلم علي شخص حضرتك طبعا)

محدش بيبص لنفسه الا مارحم ربي ......... واللي بيبص لنفسه عمره ما يخسر احترام الناس ليه و بيكسب احترامه لنفسه حتي لو خسر ماديات.

ومع هذا في موظفين فاكرين نفسهم استاذة وانهم هما اللي في ايدهم تغيير مجري حياتك وبلا مبالغة ديه بتجري في دم كل واحد معاه ورقة وقلم في مصر واسمه موظف
الا ما رحم ربي ..... ولسه امبارح كاتب في موضوع لو الموظف مش كويس هايأثر بالسلب علي المكان قبل اي حاجة ولازم يبقي فيه منه شكوي علشان ده الللي بيوقع المكان ..... المكان يخسر موظف ولا يخسر عميل واحد .... ممكن يكون بيصرف ملايين في الشهر علشان يكسب عميل واحد .

مفيش حد صح صرف ..... ومفيش حد غلط صرف

لكن احنا بنقول واحمد لما اتكلم قال احنا وصلنا لمكان بنوصل صوتنا بيه بكل ادب واحترام وحرفية شديدة جدا و بنعلي من مستوي للتاني و اي حد ليه مشكلة ببتحل واسال اي حد قدر كان عنده مشكلة واتحلت
وانا اولهــــــــم كلهم ........ الحمد لله كان عندي مشاكل واتحلت واخرها يوم الاربع اللي فات
وكله بالهدوء والاخلاق الطيبة بجد والله .

والمكان اللي بنتعامل معاه وبنحس انه بيخدم صح وبيحب يخدم وبيسمع و انت شخصيا ممكن تقعد مع رئيس مجلس الادارة ويسمعك وينفذ طلبك ويرد عليك وعلي شكوتك ويتابعك شخصيا ..... اكيد تعامله ومكانته ومركزه مش هاتتهز بخلاف ولا زعيق مع عميل واحد
ومع ذلك بيتابع شكوته و بيشوف طلباته وده اللي بيحصل ........ واي حد دلوقتي من الااعضاء القدامي او من غير اعضاء نيسان يقول ان ده محصلش .

يمكن الواحد بيتمني المعاملة تبقي من غير وسايط او تدخل حد ....... بس انت في منظومة دلوقتي كلها كده .... كل بيتناصح علي كله ... وكله فاكر هاياخد حقه بالفهلوة والسياح الا ما رحم ربي.

طبعا انا مش حضرتك في الكلام ده

اقتباس:

---

المشاركة الأصلية كتبت بواسطة Nashaat Rady

بعد كده با جماعة اللي يروح التوكيل و يخرج مش مبسوط يا ريت يشتكي بالشكل الآتي:

"انا كنت في التوكيل الجميل و قابلني المهندس الأمور اللي جابلي نسكافيه جامد تنين و مصلحليش العربية المعفنة بتاعتي عشان انا اللي الغلطان و مش قادر آجي علي نفسي شوية و أعود نفسي علي عيبها و طبعا افكركم ان انا مش بادفع تمن الخدمة ده.... لاء لاء خالص.... انا باعتبر اللي انا بادفعه في التوكيل زكاة عن عفيتي. اللهم ديمها نعمة و احفظها من زوال و ما يقطعلناش عادة يا رب....."

عاشت توكيلات نيسان حرة ابية.

---

لكذا حاجة
اولا : فيه تقارير اعضاء بيعملوها نقد سئ في مركز خدمة او مهندس معين او اسلوب معين و بتتشاف وبُتقرأ من الاعضاء ومن مراكز الخدمة و بيتابع وبياخد رقم شكوي واحمد مصطفي بيتابعه.

ثانيا : نيسان بدأت تهتم بخدمة ما بعد البيع والحمد لله بقي فيه مراكز خدمة كتير وبتزيد كل فترة
وكل مركز بيحاول يطلع احسن ما عنده ..... حتي لو موصلش للاحترافية بس بيحاول
قارنه كده بمنصور ولا غبور ولا ابو غالي ....... اكيد احسن منه بمراحل بمراااااحل
زي خدمة عملاء فودافون ولا اتصالات .... وموبينيل
تحس انهم بيقولوك ربنا يرحمنا منك يا خي ؟!!

ثالثا : اللي بيكتب تقرير هنا باللي حصل معاه ......... بيكتب اللي حصل من وجهة نظرههو بقي لا يعرف ايه اللي حصل في المركز ولا في الورشة ولا مهندسين الاستقبال
هو كده اتكلم من وجهة نظره هو
المفروض يسيب الطرف التاني يرد ........ وينشأ لغة حوار بينه وبين الاعضاء ومركز الخدمة .
ويامااااااااااااا حصل حوارات كتييييييييير وخش اقرا في الارشيف كده
وفي الاخر بيطلع العميل اللي غلطان صراااااااحة ........ ومش بيعرف يرد بعديها ..... يمكن فاكر ان محدش بيسمعه او بيتابعه ؟ ....... او ممكن فاكر ان مش هانعرف نوصل للموضوع ؟

واكيد اللي بياخد حقه بالاحترام احسن كتيييييييييير من اللي بياخده بالزعيق
لان الحياه اصلا علاقات ........ انا مش محتاجك النهارده .... هحتاجك بكره

وده مش عيب .... وكله بالحب في الله ... يبقي ليه اخسر اصدقاء ومعارف بنحبهم في الله و حد ممكن يسهلي امر ولا موضوع

قال النبي محمد عليه الصلاة والسلام

المؤمنُ يألفُ و يُؤلفُ، و لا خيرَ فيمنْ لا يألفُ و لا يُؤلفُ، و خيرُهمْ أنفعُهمْ للناسِ
الراوي: جابر بن عبدالله المحدث:السيوطي - المصدر: الجامع الصغير - الصفحة أو الرقم: 9147
خلاصة حكم المحدث: صحيح

من نفس عن مسلم كربة من كرب الدنيا نفس الله عنه كربة من كرب يوم القيامة ، ومن يسر على معسر في الدنيا ، يسر الله عليه في الدنيا والآخرة ، ومن ستر على مسلم في الدنيا ستر الله عليه في الدنيا والآخرة ، والله في عون العبد ، ما كان العبد في عون أخيه
الراوي: أبو هريرة المحدث:الألباني - المصدر: صحيح الترمذي - الصفحة أو الرقم: 1930
خلاصة حكم المحدث: صحيح


انا اسف للاطالة الشدييدة ........ بس اسهل طريق للمعرفة الحوار والنقاش الطيب

سعدت جدا بالنقاش مع حضرتك واسف للاطالة وتقبل مروري

اقعد بالعافية :)

سبحانك اللهم وبحمدك ... أشهد أن لا إله الا أنت ... استغفرك واتوب اليك

اخى الكريم .. بعد التحية والتقدير ليك
واهلا بيك معانا

انا فتحت النقاش والعتاب ده عشان السئولية اللى علينا جميعاا .. وكمان افادة الاعضاء

انا مش محتاج لى داعية ولا اى عضو قديم من الاعضاء اللى موجودين لعمل دعاية .. اللى عايز ينسحب مننا حينسحب من غير عمل موضوع

لكن العتاب ده عشان نلتف جميعا مع بعض .. ونسمعى لاكبر مصلحة لينا من التوكيل

اقتباس:

---

المشاركة الأصلية كتبت بواسطة nashaat rady

و علي فكرة انت بتتكلم بنفس أسلوب الناس اللي انت بتنتقضها... و ما فيش حاجة اسمها نقض بنٌاء الا في حالة انك تكون أصلا مستعد لسماعه.

احنا مستعدين نسمع اى حد
لكن حد داخل قسم نيسان يجرح فينا لمجرد اننا مختلفين معاه فى الراى ده مش محبب ابدا ..


غير كدا كمان احب اوضحلك حاجة .. مع احترامى ليك .. هو حضرتك لو موظف فى شركة كبيرة .. وبتتعامل مع الجماهير .. ولقيت واحد كتب على فيس الشركة او اى فيس او وجهلك نقد فى الشركة وقالك
انت موظف كفتجى .. حتسمعله !!!!!! والله انا لو قريت حد بينقدنى بالاسلوب ده .. مش حسمعله ..


و كمان ده منتدي علي الإنترنت، مش مجلس نواب الامم المتحدة، و في ناس طبعها ساخر و ده ما بيضرش، بالعكس بيلفت الانتباه أكثر و يغير الجو شوية و يكسر الملل....

اختلف معاك فى وجهة النظر دى

حضرتك اللى قولته ده حضربلك عليه مثل .. من خلال متابعتى لموضوعات نايل موتورز

مرة واحد اترفع عليه قضية ومباحث الانترنت جبته مع انه معاه الحق بس غلط فى كلامه .. فكان مرفوع عليه قضية وكان صاحب القضية حيطلب تعويض .. وكان كل ده عشان افتكر انه زى حضرتك قاعد على النت مش فى مجلس نواب الامم

وبعدين احنا بنتكلم على نقد يفيد مش نقد يضر .. ونقد يهين ..

لان النقد اللى يفيد اكيد بنقبله وبندور عليه

الحاجة التانية

ان قسم نيسان والمنتدى باقسامه وصل لدور فعال وكبير يمكن خارج المنتدى اكتر والاعضاء عارفة كويس المساعدات اللى بنعملها لوجه الله ليهم والافادة الحقيقة من خلاله .. والدور الايجابى اللى وصل له

ويكفى تكوين تيم نيسان .. من اعضاء وافراد حيعطونا من حياتهم ووقتهم الخاص مساحة كبيرة لخدمة الاعضاء داخل وخارج المنتدى .. يعنى مش حيعطونا مساحة من وقتهم لحاجة مش تستاهل

يعنى مش عالم وهمى زى ما حضرتك فاكره..

ده مجلس نواب الامم المتحدة مش بيحل ولا بيربط زينا !

* حضرتك الاعضاء ممكن تجبلك لينك فيه زيارة ليهم فى مصنع نيسان 7 اكتوبر

* وحضرتك الاعضاء تجبلك لينكات فيها خصومات مع الوكيل من قطع غيار ومصنعيات

* حضرتك الاعضاء تجبلك لينكات فيها خصومات على اكسسورات فى التوكيل

* حضرتك اعضاء يجيبولك لينكات لمشاكل ناس كتير حلينا مشاكلها قبل خدمة العملاء واتدخلنا فيها مع المصنع بنفسه

* حضرتك الاعضاء يقولولك ويجيبلولك لينكات توضحلك ان فى اعضاء كتير تدخلنا فى مشاكلهم وحلينا المشاكل اللى خارج الضمان ودخلت فى الضمان !! على حساب مراكز الخدمة لارضاء العملاء ..


وغيره وغيره كتيررررررررررررررررر اوووووووى

ويقولولك قد ايه ان توكيل نيسان عموما بيحترمنا قد ايه .. وبيتعمل لينا خاطر كبير عندهم

فاعتقد ان كل الاثبات ده مش يدل على اننا مش بنقدم خدمة او فى عالم وهمى

وكل ده وصلنا له لاننا فى نقدنا واسلوبنا محترمين وبنساعد كل الاطراف
وبننقد نقد يفيد بردوا كل الاطراف


وللاسف بالفطور وعدم ادارك المكانة التى وصلنا لها للاسف الدنيا بالطريقة دى حتغرق

لاننا مش عايزين لوحدينا نحتمل المسئولية

الحمد لله كل واحد من الاعضاء القدامى وصل الى علاقات كبيرة مع كبار المسئولين فى نيسان .. ونقدر نخدم نفسنا

ومع ذلك مش عايزين نبعد عشان نساعد الناس

ونبقى مكان دايما له راى فى التغير واتخاذ قرار

على العموم

اتمنى فعلا الكل يعلم ما له وما عليه


وصدقنى انا اكتر واحد رايق ومش متعصب على حاجة .. اللى يهمنى مصلحة الاعضاء حتى لو كان على حساب نفسى .. والكل يعلم ذلك .. ومش انا لوحدى اللى بحمل هذه الصفات .. كل الاعضاء القدامى مثلى واكتر وحتى الاعضاء الجدد المحبين لنا ولقسم نيسان ..

كل اللى بدور عليه اننا نوصل لاكبر قدر من التعاون مع مراكز الخدمة لمصلحتكم انتم

وعن نفسى انا كدا كدا مش خسران ابدااا حتى لو اصبحت مثل جميع الاعضاء متفرج ..

يكفى انى كسبت محبة الاعضاء هنا ومحبة كبيرة وده اهم شيئ عندى .. واما العلاقات اللى عملتها فى نيسان مع اصغر عامل .. الى اكبر مسئول فى مصنع نيسان نفسه .. وعلمتها بمجهودى الخاص من حب ووود واحترام وتعامل راقى معهم .. والنقد والهجوم عليهم بكل احترام .. جعل الجميع يعلم بقسم نيسان نايل موتورز وتتوالى الخدمات للاعضاء

وحقيقة قسم نيسان الان .. واللى بيتابع موضوعاتنا من زمااان .. حيعلم ان قسمنا مش قسم وهمى ابداااا واصبح قسم يحترم باعضائه داخل المنتدى وفى الخارج ايضا


وعلى العموم البركة من هنا ورايح فى تيم نيسان

وربنا يعينهم على اللى حيشوفوه ويقدرهم على مساعدة الناس

تحياتى

---

الرد داخل الاقتباس باللون الموووف

هو انا أنكرت مجهودك ولا مجهود حد من الزملاء؟؟؟

يا باشا انا بس عاتب علي الموضوع ده، و هو ان الموضوع مش مستاهل يتفردله صفحات بالمنظر ده.

يا ساتر يا رب، دانتوا حاتاكلوني بسنانكم...

اللهم حبب جميع خلقه فيك، بس لازم برده تتقبل النقد مهما كان المكانة اللي وصلتلها.

و يا سيدي تقبل أسفي عشان شكلك كده قفشت.

و ان شاء أتشرف بمعرفتكم و مقابلتكم و حاتعرف ان انا أسهل من كده بكتييييييير

اقتباس:

---

المشاركة الأصلية كتبت بواسطة nashaat rady

هو انا أنكرت مجهودك ولا مجهود حد من الزملاء؟؟؟

يا باشا انا بس عاتب علي الموضوع ده، و هو ان الموضوع مش مستاهل يتفردله صفحات بالمنظر ده.

يا ساتر يا رب، دانتوا حاتاكلوني بسنانكم...

اللهم حبب جميع خلقه فيك، بس لازم برده تتقبل النقد مهما كان المكانة اللي وصلتلها.

و يا سيدي تقبل أسفي عشان شكلك كده قفشت.

و ان شاء أتشرف بمعرفتكم و مقابلتكم و حاتعرف ان انا أسهل من كده بكتييييييير

---

انت قلت اهو (اتشرف بمعرفتكم ومقابلتكم)

دايما الواحد مهما كتب مش هايعرف يعبر زي المقابله

لعل كلمه واحده فى الحديث تقرب وجهات النظر

انا فاهم وجهه نظرك ولكن مهما الواحد كتب فيها مش هايعرف يوصلها

واتفهم بشده وجهه نظر الاخر وايضا مهما تفرغت بتفصيلها مش هاعرف اوصلها

لكن انت ابعدت نفسك عن الجدال

اقتباس:

---

المشاركة الأصلية كتبت بواسطة zambarota

انت قلت اهو (اتشرف بمعرفتكم ومقابلتكم)

دايما الواحد مهما كتب مش هايعرف يعبر زي المقابله

لعل كلمه واحده فى الحديث تقرب وجهات النظر

انا فاهم وجهه نظرك ولكن مهما الواحد كتب فيها مش هايعرف يوصلها

واتفهم بشده وجهه نظر الاخر وايضا مهما تفرغت بتفصيلها مش هاعرف اوصلها

لكن انت ابعدت نفسك عن الجدال

---

أيوه كده بالظبط :bravo:

اخي الاستاذ احمد انا لفيت كل الاقسام لم اجد افضل من قسم نيسان وناس اخلاقها عاليه علي فكرة السبب ده بس هو اللي خلاني اشتري نيسان
بس احب اقولك حاجة مهمة يمكن تخفف عنك اللي انت فية اذا كنت بتعمل ده خدمة منك لله ونصيحة للاعضاء فلا تبالي بأحد وانتظر الاجر من الله اما اذا كان غير ذلك فلا تلومن غير نفسك لان محش جابرك علي اللي انت بتقدمة للقسم واظنك من المخلصين لوحه الله ويكفيك ان ندعوا لك بالتوفيق والبركة علي ما تقدمه لنا انت وزملائك من نصائح لا تقدر بثمن

واخيرا لابد من تصحيح النيه وكل الامور تتعدل ان شاء الله ولك مني كل الحب والتقدير ولكل اعضاء قسم نيسان المحترمين

حبيبى يا استاذ نشات
اكيد بتشرف بمقابلاتك وبمعرفتك على المستوى الشخصى
وصدقنى انا مش قفشت ولا حاجة
بس عشان كلامنا بيقراه الجميع .. فلازم نوضح وجهة النظر ليس اكتر
ونوضح كل شيئ للاعضاء الجدد .. لاننا ماشين على نهج .. واكيد ده بيفيد الاعضاء اكتر منا

وده اللى يهمنا فعلا ..

واكيد لما نتقابل حنقعد مع بعض اولا عشان نتشرف بيك
وثانيا عشان المناقشة على الطبيعة افضل مليون مرة منا لكتابة

اتمنى من الادارة غلق الموضوع .. وذلك لاتمام الهدف منه

تحياتى للجميع

قرات جزء من الحوار
شوفوا قسم السيات الى انا فيه واتشرف بيه أد ايه هناك تفاهم وحب بين أعضاءه قدام أو جدد إداريين
وأتمنى لكم ولقسمكم مزيد من التقدم

معليش ياستاذ احمد حصل خير انت واللى زيك كتر خيرهم فى خدمة المنتدى والاعضاء معليش يمكن بس سوء فهم مش اكتر امسحها فينا ومتزعلش