ساعدونى يا شباب فى الموضوع ده ( نوبيرا - لوجان )

**tefa22m** · 29-03-2013 11:16 PM

عربيتى نوبيرا 2006 سماوى عامله 115 الف
محتاجه شويه مصاريف محترمه
1- نصف ماتور بحوالى 1500 ج
2- اربعه كاوتش بحوالى 1500ج
3 شويه شغل عافشه حوالى 700 ج
4 - سمكره حوالى 500 ج
5 - تكيف يمكن حوالى 500 ج
يعنى الاجمــــــــــــالى حوالى خمسه الاف ج
المهم :- قدامى عربيه لوجان 2010 كامله مانيوال عامله 40 بحاله ممتازه و سعرها فى سعر عربيتى دلوقت من غير ما اعمل فيها حاجه يمكن ادفع الف او اتنين بالكتير ( بس خايف من قطع غيار اللوجان و مش اى ميكانيكى يشتغل فيها و صعوبه اعطالها )
عاوز رائيكم بكل امانه اصرف على العربيه النوبيرا ( عربيه سهله و بياعه و حاجتها رخيصه ) و لا اشترى دماغى باللوجان عشان الحاله بتاعتها شبيه الزيرو

**fares_311** · 29-03-2013 11:34 PM

انا لو مكانك ازبط عربيتي واتعب فيها شويه,وكفايه انك عارف كل حاجه فيها وكل مسمار فيها,وانت عارف مميزات النوبيرا عربيه سهله و بياعه و حاجتها رخيصه.

**tefa22m** · 29-03-2013 11:45 PM

المشاركة الأصلية كتبت بواسطة fares_311

انا لو مكانك ازبط عربيتي واتعب فيها شويه,وكفايه انك عارف كل حاجه فيها وكل مسمار فيها,وانت عارف مميزات النوبيرا عربيه سهله و بياعه و حاجتها رخيصه.

كلام جميل و صح جدا و انا فاهم فيها كويس بس حضرتك عارف ديه الحاجات الظاهره حاليا و المستعمل كل ما يمشى كل ما يطلب مصاريف

**mous6fa** · 30-03-2013 12:28 AM

بصفتى أحد ملاك النوبيرا سابقاً .. أنا لو مكانك أبيعها وأجيب اللوجان أو اى عربية موديل أعلى من النوبيرا وأستفاد بفرق السنين ف الموديل وفرق الكيلوات المقطوعة وكمان فرق الحالة ..
صدقني طالما العربية فتحت بقها مش هيتقفل .. أنا صرفت ع النوبيرا مبالغ طائلة وفى النهاية العربية كانت مميزاتها تنحصر ف وسع الصالون وسرعتها ع الطريق ... إنما عفشة سيئة وفرامل كارثة وإستهلاك للبنزين يخرب البيوت ..

**mohamed_e36** · 30-03-2013 12:32 AM

مش عارف بحس ان النوبيرا احسن من اللوجان في الشكل وموتور اقوى ومفيهاش الحاجات الغريبه اللي في اللوجان زي الاكلاكس و زراير الازاز ....و ثبات النوبيرا كويس جدا رأي خليك في عربيتك واللي نعرفو احسن من اللي منعرفوش الا لو عربيتك قرفاك قوي وكل يومين بتروح للميكانيكي

**lanos2004** · 30-03-2013 12:39 AM

عن نفسى نوبيرا وبس واظبطها صح

**haitham fares** · 30-03-2013 12:40 AM

انا كان معايا لوجان ..العربية دية ممتازة فى كل حاجة ما عادا سعر اعادة البيع

**gebreel** · 30-03-2013 12:41 AM

اللوجان حاجتها هتلاقيها اغلى من النوبيرا بشوية بس انا بتكلم على الاصلي في مقابل انها معمرة و في حاجات ارخص من النوبيرا

قطع غيار اللوجان اللي بتتغير بشكل دوري اسعارها ممتازة اما اللي ممكن العربية تيجي و تتباع من غير ما تغيرها اسعارها استهبال رسمي (انا بتكلم على التوكيل مش برة)

خد الموضوعين دول اتسلى فيهم و احكم بعدها و لو محتاج اي حاجة اسأل و انا تحت امرك

http://www.nilemotors.net/Nile/249863-a.html

http://www.nilemotors.net/Nile/226954-20-1-2013-a.html

**lanos2004** · 30-03-2013 02:32 AM

عربيتك عامله 115 الف وعاوزة نص ماتور
اعذرنى هوة حضرتك مش بتغير زيت ولا بتعمل صيانه فى معادها
انا معايا لانوس ماشيه 270 الف كيلو ونفس ماتورك و ما شاء الله بتكسر العداد وتاكل اى 1600 عادى خالص
ارجول لو غيرت العربيه لازم تهتم بالصيانه بتاعها