تحويل ماتريكس من مانيوال لاوتوماتيك
السلام عليكم
انا جي ضيف سريع علي منتدي هيونداي و اتمني انكم تساعدوني
اول حاجة هي عربية خالي و العربية موديل 2007 و عاملة 14 الف كيلو فقط لانها مرفوعة
الطلب :
خالي طلب مني اني احولها له لاوتوماتيك لانه كان جيابها مانيوال و طبعا الزحمة الفظيعة اللي في مصر كرهته في العربية
انا كلمت محمد عبده الميكانيكي الشهير في منتدي دايو لانه شغال في توكيل الكويت و البلاد العربية و طبعا التوكيل فيه هيونداي و كيا و دايو و شيفولية فهو عارف في كل المركات دي و قال ليا التالي :
================================================== ========
الفتيس كهرباء
لازم نغير الضفيرة و الكنترول
و الماتريكس الخليجي تختلف عن الماتريكس المصري و لازم نلاقي نص عربية مصري نشيل منه و نركب علي طول بدل ما نخلف في اي حاجة و العربية تتبهدل لانها لسه جديدة و حرام.
================================================== =======
انا اعرف ان الريادياتير لازم يتغير و العدادات و الدوسات و عصاية الفتيس طبعا و طبة قفل مكان الدبرياج
السؤال هنا بقي : حد عمل الموضوع ده قبل كده ؟
طيب هل فيه اختلافات جوهرية بين الاتنين ؟
ممكن حد يكلملي مهندس في التوكيل يكون عارف هل فيه فرق في الشاسية بين المانيوال و الاوتوماتيك زي الانوس ما فيها فرق و بتحتاج فلنشة حديد علي فردة الشاسية ؟
و هل فيه فروق تانية تخلي الموضوع مستحيل ؟
هل فتيس الماتريكس الاوتوماتيك كويس ؟
انا خالي التاني معاه برضة ماتريكس بس اوتوماتيك بس للاسف مكملتشي معاه كتير و ماشية 10 الاف كيلو فقط فمش قادر احكم علي عمر الفتيس
انا عارف ان اسألتي في التفاصيل اوي بس الفكرة اني خايف شوية لانها مش عربيتي و مسؤلية عليا اني اخد خطوة تعديل زي دي منغير ما اعرف اغلب التفاصيل و خصوصا ان خالي هيديني العربية و يسيبهالي اعمل كل حاجة و بعدين ارجعهاله تاني يعني من الاخر المسؤلية كاملة عليا من ال الف الي الياء.
منتظر الردود الكريمة من اعضاء هيونداي الكرام و شكرا ليكم مقدما و بأذن الله لو الموضوع كمل انزل ليكم تقرير مفصل بالصور عن الموضوع و تكلفته
اخوكم : م. كريم فتحي