الموضوع: لتغيير شكل الماروتي الى الافضل ، شاهد الصور

بس خد بالك الديفيندر ده مينفعش تفحص بيه العربيه
وممكن في لجان يرخمو عليك بسببه لانه طبعا العربيه مش بتنزل بيه ولا هي جيب مثلا

بص يا باشا القطع اللي راكبة

- ديفيندرات لكن للأسف ديه بدون تصريح هتقف كل شوية و انسي العربية في الفحص
- كشافات و ديه بتتباع في التوفيقية و سعرها رخيص لكن هتحتاج كهربائي يركبهملك
- الجنوط عند اي حد عنده جنوط بس مرجحش جنوط للماروتي او تحديدا مرجحش الجنوط المنتشرة اللي ملهاش معالم و رخيصة الجنوط الغير معروفة ديه من اقرب مطب او فتحة جامدة ممكن تلاقيها في الارض
بالاضافة تركيب جنوط يتطالب قياسات معينة زي العرض و الوزن لأنه لو زاد هيفرتك العفشة عندك و الدريكسيون هيبقي تقيل
- وش ع الفوانيس الخلفية و ديه امرها بسيط بس موضتها بطلت ظهرت كام شهر هنا و انتهت بعد ما سواقين التاكسيات ركبوها و بعدها هم نفسهم شالوها هههههه

توتي كما احب ان اطلق عليها تقدر تظبطها بحاجات تانية كتيير و متكونش مخالفة او مش قصة يعني
قولنا بس امكانياتك المادية في حدود كام و انا هقولك كل اللي تقدر تعمله في حدود اللي معاك او ممكن تضيفه فيما بعد
و ايه اللي عملته لحد دلوقتي في العربية

انا مش عارف العربية زيرو و لا مستعملة لأن لو مستعملة هقولك ع صيانات اهم و لونها ايه
لكن هتكلم بشكل عام ع تظبيط العربية

مبدأيا و نظرا للحالة الامنية

- هتحتاج تركب انذار و سنتر لو عايز معاه و زي مقولتلك في الموضوع التاني أفضلك وولف و ده توكيله في اخر ش جسر السويس ورا اسواق القنال و سعرهم الاتنين حوالي 300 ج بالتركيب

- ممكن تركب زراير للابواب الخلفية والشنطة و الكبوت و يتوصلوا ع لمبة الصالون و بالتالي هيبقوا مع الانذار اي حاجة فيهم تتفتح الانذار يشتغل

- تجيب قفل دريكسيون و سعره اخر مرة 30 ج لكن دلوقتي زمانه دخل في 50 و 80 كمان اينعم الكلام ده مش يعصي ع اي حرامي لكن تأخير ليه او يخليه يبعد عن العربية اللي تعتبر صعبة المنال عكس عربية غير مؤمنة

فيه حاجة تانية ممكن تعملها بس تحتاج كهربائي زرار يفصل الكهربا ماعدا الانذار طبعا و ده محدش هيعرف يدور العربية غيرك لأنك عارف مكانه و طبعا الكهربائي اللي يركبه و يفضل تعملها عند واحد بعيد عن سكنك تماما و ميعرفش انت ساكن فين و لا يعرف اي حاجة عنك


نيجي للتظبيط

- ممكن تركب الفوانيس الجديدة اللي نزلت للماروتي و موجودة عند سوزوكي سنتر ( أ \ هاني ) في التوفيقية فوق اسماك ابو غالي و سعرهم تقريبا 120 ج

- لمبة ستوب ع الازاز الخلفي و تتوصل ع لمبة الفرامل و سعرها رخيص و فيه اشكال كتيير

- فوجات في الاكصدام الامامي بنفس طريقة وضع الكشافات

- استيكر ع الشنطة من ورا خفيف و صغير يمشي مع العربية و فيه حاجات كتيير ممكن تجيبها من ابراهيم في شارع دمشق او تنزل التوفيقية في محل اول ما تدخل ع الشمال عنده استيكرات اشكال و الوان تتوه فيها و اسعاره كويسة برده

و لو عايز استيكر نايل موتورز موجود معايا بالاضافة انك بتاخد خصومات باستيكر نايل موتورز خصومات من بريدجستون
خــدمات نــايل موتورز للأعضــاء - نايل موتورز - NileMotors.net


- طاسات يبقي شكلها مدي ع جنوط و ترش الجنوط الاصلية اسود بليل و بالنهار الطاسات هتبان ع انها جنوط خدعة بصرية :) سعر الطاسات من 40 - 80 ج


- حلية شكمان و ده تبدأ من 10 ج

ده كده الشكل الخارجي نيجي للشكل الداخلي

اولا فرش كسوة و ده يبدأ من 250 - 300 فيما فوق ع حسب اما الفرش التفصيل فده يبدأ من 500 ج
دواسات ممكن اللي بلون ( ازرق - فضي - احمر ) بحيث يتماشي مع لون العربية او الفرش اللي هتركبه او اسود و ديه اسعارها من 30 ج فيما فوق

- موبايل هولدر

- تغير الاضاءة بتاعت الصالون و تخليها ليد ابيض الكارت فيه لمبتين يبدأ من 10 ج فيما فوق و الأفضل تجيب اللمبة اللي فيها كذا ليد صغير مش واحدة زي اللمبة الحمرا العادية

الساوند سيستم بقي ده برده ع حسب انت عايز الصوت اللي تسمعه عامل ازاي و ميزانيتك كام لأن ديه مفتوحة انواع و موديلات و ارقام