جددت ترخيص 3 سنين النهارده
السلام عليكم ....
اكتشفت ان رخصة الكارينز خلصت يوم 3 مارس .... نزلت مرور مدينة نصر النهارده ... كنت هناك على تسعه الا تلت .... اول ما دخلت اخد بصمه و فحصت و طلعت العربيه بره المرور و مخدتش 10 دقايق ... فى الفحص كنت خايف يعملى مشكله على العازل الحرارى بس محدش اتكلم ... العربيه كده كده فاميه فابريكه من ورا .... لما فحص قلتله اكتبلي فاميه فابريقه زى الرخصه القديمه قالى روح للمهندس الكبير ... رحتله سالنى عن نوع العربيه و كتبلى زجاج ملون و قالى ملون عشان الازاز بتاع المصنع مش ملزوق عليه فاميه .... ورق الفحص ب 13 (دفعت 15) و اديت لبتاع البصمه 10 (عشان بيحط ايده و يتلسع ... هو الوحيد اللى بيعمل حاجه فى الليله دى)
ختمت الطفايه بس كتبلى عليها 2013 غالبا عشان المره الجايه اجيب واحده جديده
تامين 310 ل 3 سنين
660.80 ضريبه 3 سنين
تصوير و دوسيه و استمارات 35 جنيه
دفعت المخالفات ... كان عليا واحده عكس اتجاه و مرضيتش ادفع لامين الشرطه ساعتها .... المهم دفعت و اخدت الورقه و طلعت على الشباك اخدو كل حاجه
من ساعة ما دخلت المرور لحد الشباك حوالى 45 دقيقه و بعدين ساعه و ربع مستنى الرخصه لان فى طابعه من بتوع الرخص بايظه و بيصلحوها ....
الحمد لله ... بس بصراحه مدير المرور ممتاز ... من 8 30 لحد ما مشيت 10 45 مقعدش و واقف فى الصاله بيخلص ورق و موظف بيتكلم فى التليفون راح عاكشه و بصوت عالى بيكلم الموظفين مش عايز تليفونات فى الصاله هو في ايه .... ربنا يباركله .... فجأه على 10 اختفى ... قلت تلاقيه ريح و بيشرب شاى ... لقيته واقف مع اللى بيصلح الطابعه ....
طبعا كان نفسى استلم الرخصه بدرى عن كده بس الحمد لله :)
