أعضاء المنتدى الكرام صباح الخير


دي أول مشاركة ليا في المنتدى الحقيقة .. انا عرفت المنتدى ده عن طريق البحث على الانترنت عن إصلاح العربية وبصراحة لقيت هنا ناس كتير عندها خبرة في أمور كتير جدا تخص الموضوع ده

مش عاوز اطول عليكوا وهخش في الموضوع على طول

من حوالي 6 شهور المروحة عندي كانت بايظة فالعربية سخنت كذا مرة بس الحمد لله محصلش حاجة

من حوالي اسبوعين سمعت صوت الموتور عالي جدا وفيه زي رجرجة او تخبيط كدة فرحت للميكانيكي قالي هاتلي جوان فرن منافول وجوان غطا تاكيهات المهم جبت الحاجات دي وغيرناها ونضف الكاربراتير والموتور صوته هدي شوية والرجرجة دي راحت بس صوت الموتور لسه عالي فقالي عدي عليا في يوم تكون العربية باردة متلجة وهظبطلك التاكيهات واوطيلك صوت العربية .. وقالي بالمرة هات سير كاتينة وقاعدة فتيس

جبت الحاجات دي وركبها المهم تاني يوم العربية لقيت العربية بتقطع كهربا وبتبطل كل دقيقة وانا ماشي فرحت للميكانيكي تاني لقى 2 بوجيه مش شغالين وعليهم مية فقالي العربية جابت جوان وش سلندر ، بس الزيت مش مطحن ولا حاجة

المهم سؤالي دلوقتي هل ممكن العربية تسخن وبعد 6 شهور اكتشف ان جوان وش السلندر ضرب ؟؟
وتاني سؤال تغيير جوان وش السلندر ده يتكلف كام بالمصنعية بكل حاجة ؟ مع العلم ان الوش مش مقفع ولا معووج يعني مش هروح لخراط .
تالت حاجة لو حد عنده اي نصايح ممكن تتعمل كوقاية بعد تغيير الجوان او اي حاجة دورية المفروض تتعمل للموتور المرة يقولي عليها عشان انا بصراحة مبعملش اي صيانة وكنت مهمل جدا في العربية

العربية دوجان 1992 موتور 1600 سي سي

ومعلش طولت عليكم :)