فتيس الاوتوماتيك للـSkoda Fabia 1.4 16V

ازيكم يا رجالة السكودا، انا عربيتي Skoda Fabia 1.4 16V عامله 120الف كيلو كنت ماشي على الدائري في امان الله وفجأه الفتيس نتش نتشه قوية اوي والشاشه الخاصة بالنقلات المفروض تكون عامله select على D اختفت، بطلت العربية ودورت تاني نفس المشكلة الفتيس بينتش جامد والعربية مش عارفه تاخد غيارات واقصى سرعه بوصلها 70 عن 4 rpm

كانت الساعه 9 صباحا اخذت اجازه من الشغل وقلت لما اروح ازور التوكيل الجديد بتاع اسكودا الي على الدائري واشوف ايه النظام دخلت التوكيل وحكتلهم على الي حصل وخدوا العربية في صالة الصيانه وفضلت ملطوع 3 ساعات المهم خلصو كشف وجربو العربية وسلموني تقرير وقالولي التالي:

1- حساس الفتيس عايز يتغير وثمنه 2000 جنيه وده مش موجود وهنجبهولك بالبريد السريع وهتدفع 1500 جنيه تحت الحساب وتفوت علينا بعد شهر يكون وصل

2- احنا مش هنضمن انك بعد ما تغير حساس الفتيس ان التنتيشه هتروح لأننا شاكين ان يكون فيه مشكله في (الفلف بودي) لان النتشه قوية وده ثمنه 11 الف جنيه

طبعا انا وشي جاب الوان واخذت التقرير ودفعت 200 جنيه كشف ومشيت وانا مش عارف اعمل ايه

تفتكرو في حساس فتيس استيراد او في فتيس كامل استيراد وبكام واجيبو منين يا ريت حد يدلني اعمل ايه في المصيبه دي