الموضوع: طلعت الرخصة وللاسف بالفلوس :(

السلام عليكم
للاسف طلعت الرخصة النهاردة بفلوس علشان اخلص وارتاح
جوزى مش بيحب الوقفة والروتين بتاع الحكومة انا كنت ضد الفكرة بس صعبوها علينا لانى كده كده كنت هادفع علشان الاشارات لانى خايفة منها وكنت ناوية اعديها بالفلوس و امتحن السواقة بعربيتى من غير واسطه بس قالولى انى بعد ما ادفع 400 جنيه فى الاخر ممكن لا قدر الله اسقط سواقة ويبقى راح عليا فلوس الاشارات ف جوزى قاللى نشترى نفسنا ونطلعها كلها بأه واروح على التصوير وبس
وقد كان..
بس زعلانة والله على حال بلدى اللى بأه كله بيمشى بالفلوس احنا بردو مرخصين العربية بالفلوس ربنا يكون فى عون الناس العادية اللى بتتحمل بهدلة الروتين دى والطوابير والوقفة
امتى هاتنضف البلد وكل واحد يراعى ضميره من غير مقابل
امتى هاشوف بلدى زى البلاد النضيفة اللى بتعمل كل حاجة بالنت وانت فى بيتك ومابتروحش مصلحة حكومية الا للشديد الاوى وهناك بتلاقى معاملة نضيفة وناس بتشتغل بضمير
بجد مصدومة وحزينة على الكوسة اللى البلد ماشية بيها
ادخل امتحان الاشارات فى مكتب الظابط يقوم العسكرى يقولى اقرى السؤال ويادوب ماكملش اول كلمتين ويقولى ماشى ماشى اتفضلى استنى بره شوية
والظابط قاعد !!!!!!!!!!!!!
وبعدها ادخل تانى استلم الورق الظابط يقولى امتحنتى سواقة ؟! قال يعنى انا كنت امتحنت اشارات
بجد حاجة غريبة يعنى الناس دى فاهمة وبتستهبل ولا بتستعبط ولا ايه ؟
الموضوع كله مأخدش ساعه بس والله على اد ما ارتاحنا على اد ما قلبى واجعنى على الحال اللى احنا فيه ونفسى نتغير باه نفسى كل واحد يراعى ربنا فى شغله ويتحرى الحلال فى لقمة عيشه ويتقى ربنا فى الناس الغلابة اللى بتجيب قوت ولادها بالعافية