تقريري عن صيانة الالف: "شكرا اوتو ايجيبت "
طبعا بعد ما عديت الالف كيلو فكرت اعمل الصيانة واغلب صقور نيسان رشحولي اوتو ايجيبت . قوم ايه بقى انا كلمتهم امبارح على الرقم المختصر بتاعهم وحجزت النهاردة الساعة 9 صباحا .
طبعا رحت بدري عشان السكة متزحمش وصلت الساعة 8,40 دقيقة الصبح دخلت الاستقبال سالت قالولي ثواني هنشتغل وفعلا معداش خمس دقايق ولقيهم ابتدوا الشغل رحت على الكونتر لقيت اسمي متسجل فى كشف مطبوع كمبيوتر ورقم تليفوني ونوع الصيانة وخدت رقم وقالولى استريح لحد ما ييجي دورك كنت رقم b3
وفعلا معداش خمش دقايق لقيتهم بيقولولي اتفضل المكتب رقم 4 رحت لقيت المهندس " محمدرفاعي " وبصراحة راجل محترم وذوق جدا عرفنى بنفسه واداني الكارت بتاعه منتظر
سالني - حضرتك هتعمل صيانة الالف-- قلتله ايوة - طيب ممكن الرخصة - اتفضل - العربية عاملة كام كيلو - 1070 - وخد بياناتي فى امر الشغل وطبعا ابتدى يوضحلى ايه اللى بيتعمل فى صيانة الالف من تغيير زيت ومن كشف على كل السوائل وعلى الفرامل و التيل وتربيط العفشة وتزييت الابواب ووضحلي ان العربية مش بتنزل بفلتر تكييف لو احب اركبه وشرحلي فايدته للعربية - طلبت اركب سنسور بارك خلفى بردو
وطبعا قلتله على الشكوى اللى فى العربية وكانت غربلة بعد ال100 والطارة مايلة سنة يمين .
واداني بونات المشوبين والباتيه وخرج معايا استلم العربية وقاللي اتفضل فى قاعة انتظار تحت وفيه فوق لحد ما تخلص العربية .
وفعلا طلعت القاعة الجديدة اللى فوق مجهزة تجهيز جيد واي فاي فري-بلاي استيشن -ال سي دي بيظهر فيه العربية والوقت والشغل اللى فيها ووقت الانتظار
انتظرت طبعا وخدت المشروب الاول الحقيقة وكان فيه ناس بتلعب بلاي استيشن وواحد كان بيتغلب على طول وميزعلش مني لو بيخش هنا وشاف البوست بس بصراحة يستاهل لانه كان بيتفزلك على واحد صاحبه وجه واحد غريب روقه .
المهم الظهر اذن صليت وخدت الباتيه والمشروب التاني - لحد الساعة واحدة لقيت المهندس محمد بيكلمنى على الموبايل بيقولي اتفضل العربية خلصت نزلت قاللي العريية تمام ادي تقرير الكشف العربية تمام الزيت اتغير كل حاجة اتعملت الفلتر ركب والسنسور ركب وادي كتاب الضمان واتفضل نجرب السنسور خرجت لقيت العربية مغسولة وركب معايا وجربلي السنسور اللى اتحط فوق المراية الداخلية وتمام بصراحة والاكصدام كان فيه فتحتين جايين جاهزين وهما ركبوا اتنين فى الاجناب كمان .
ووراني الانذار بيشتغل ازاي اذا اتفتحت العربية من غير الريموت ومش بتدور حتى لو بمفتاحها الاصلي الا اذا دوست على الريموت . بصراحة اتبسطت جدا .
وروحت دفعت الفلوس فى الخزنة كان الزيت 10000والفلتر وفلتر التكييف والسنسور كله 911 جنيه
وخدت الفاتورة وتصريح الخروج ومشيت .
بعد الصيانة :- صوت الموتور اهدى - السحب افضل - الميل بتاع الطارة اتزبط - مفيش غربلة بعد ال 100 راحت خالص التكييف تمام بردوا السنسور رائع جدا وشكله شيك ومكانه جميل .
الحقيقة المكان والمعاملة والشغل جميل ورائع وكل يوم باحس اني اخترت عربية صح وتوكيل وخدمة ما بعد بيع محترمين ومن خلال مشاهدتى للورشة والشغل فيها من زجاج مكان الانتظار الناس فاهمة وبيشتغلوا بحرفية وحريصين على العربيات جدا وفيه نظام مش هرجلة - وفى النهاية شكرا اوتو ايجيبت
