الموضوع: سلسلة فنيات القيادة - الحلقة الرابعة

الحلقة الرابعة : أزاي تركن بعربيتك عمودي علي الرصيف بين عربيتين

السلام عليكم ورحمة الله وبركاته

النهاردة هنتكلم عن موضوع بقي مهم بالنسبة لمعظمنا - وهو اني لما اركن عمودي عربيتي ماتخبطش في الرصيف

قدامك خيارين - أما انك تركن بوشك او تركن بظهرك
عموما في كل الأحوال - الركن بالظهر احسن من الركن بالوش
ودي نظريا معمول بيها من زمان وابسط سبب ليها - انك تركن بظهرك لما يكون معاك متسع من الوقت - لأنك ماتعرفش ظروفك وانت خارج هتبقي عاملة ازاي - وبنفس المنطق
لو قدرت اركن دلوقتي بظهري بمزاجي - الله اعلم هيبقي شكل الشارع ازاي وانا خارج - فأخرج بوشي احسن من اني اخرج بظهري

بدون تطويل كتير في المقدمة

افترض معايا ان في عربيتين راكنين وانت هتركن بينهم
او علي الأقل عربية واحدة راكنة وانت هتركن جمبها

بغض النظر انت هتدخل ازاي جمبها - واللي انا شايف انك احسن الحلول انك تقف قدامها وتعمل معاها حرف L - مع مراعاة ترك مسافة كافية علي حسب زاوية انفراج عجل عربيتك

وهتبص بصة سريعة - العربية اللي واقفة جمبك (هتعملها مرجع ليك Reference) سايبة مسافة قد ايه بينها وبين الرصيف ؟؟؟ هل قريب من الرصيف ؟ هل بعيد اوي عن الرصيف ؟ هل عمودي 90 درجة علي الرصيف ؟؟؟

وتدخل جمبه وبناء علي المعطيات من النظرة السريعة السابقة هتحدد هتعمل ايه.
هتدخل جمبه واضعف الأيمان انك تخلي عربيتك موازية لعربيته - يعني نهاية عربيتك جمب نهاية عربيته
والله لو هو قريب من الرصيف - يبقي انت كدة قريب من الرصيف
لو هو بعيد يبقي اكيد انت كمان بعيد
لو هو قائم يبقي انت كمان قائم علي الرصيف

طبعا دة هيعتمد بردو علي طول العربية المرجعية وطول عربيتك
لو العربية اللي واقفة مثلا 127 وانت مرسيدس 200 - اكيد مش هتخلي نفسك في موازاة معاه - لازم تعمل حساب طول عربيتك شوية
لكن لو العكس - تبقي مصلحة وبردو تعمل حساب فرق الطول - لكن في جميع الأحوال هتبقي ركنت بأمان بعيد عن الرصيف بكتير اوي

اهم حاجة اختيار العربية المرجعية

في حاجة كمان حابب الفت النظر ليها

انك تدي لنفسك فرصة تعرف تفتح بابك وتنزل - وفي الوقت نفسه تديله هو كمان مساحة يعرف يركب عربيته

لو العملية مزنقة اوي - اضعف الأيمان - لو قدرت تقرب عربيتك من عربية تانية بحيث انك تضيق علي الباب اليمين عندك والباب اليمين عنده - يعني لو العربية اللي علي يمينك واقفة بوشها وبالتالي بابك اليمين مواجه لبابه اليمين - كدة عادي وممكن تقفل علي اليمين مع اليمين - لأن المهم باب السواق عشان يعرف هو يركب

طب لو العربيتين اللي هركن بينهم واقفين بظهرهم ؟؟؟
اقف انت بوشك واقفل يمينك مع يمين العربية اللي علي الشمال - وامرك لله

والله المستعان
،
،

أقرأ ايضاً
الحلقة الثالثة
الحلقة الثانية
الحلقة الأولي

المشاركة الأصلية كتبت بواسطة mem

موضوع تحفه
واستفدت من كتيير

رينا يبارك فيك
شكرًا علي مرورك الطيب