الموضوع: ايهما افضل لزيت الفتيس ليكوى و لا فالفولين

المشاركة الأصلية كتبت بواسطة tarekhassan88

معلش بقه انا فى سؤال و عايز اعرف اجابته منكم اذا تفضلتم

هو الزيوت دى بتقعد كام الف كيلو يعنى انا لما كنت بحط موبيل وان فى النوبيرا كان بيقعد معايا 8000 كم و بغيره و مش بخليه 10000 كم و ده لانى مكنتش فاهم حاجه فى موضوع الزيوت ده

بس الحمد لله انا دلوقتى و بفضل المنتدى و بفضل اعضاءه المحترمين فهمت كتير جدا و طبعا لسه عايز اتعلم كتير و مش هتعلم الا لما اسال

شكرا مقدما

أنا سعيــد إنك ســألت الســؤال ده


الزيت بيحتفظ بخواصه و (هى الهدف من وجوده) على حسب عدة عوامل نذكر منها

1- ميكانيزم موتور عربيتك ,, يعنى هل موتورك 4 سلندر و لا سته و ثمانيه , و هل موتورك روتارى انجين زى مواتير المازدا و لا بوكسر انجن زى مواتير السوبارو و لا فى تك زى مواتير الهوندا و لا هيمى زى مواتير الامريكانى و لا ايه ؟ ,, هل فيه شاحن تيربو أو شاحن سوبر أو الاتنين معا و هناك فرق بين ال super charger و ال turbo charger و الجديد بقى انهم بقوا يحطوهم الاتنين على الموتور ,, ما علينا ,, نكمل يا حبيبى ,, يعنى من الاخر هل موتورك حامى و عصبى و لا هادىء و سلس.

2- عمر موتورك و حالته الفنيه ,, موتور زيرو و لا قالب عداد و لا معمله عمره ,, الخلوصات فى الشمايز و الشنابر و البساتم أخبارها ايه ؟ يعنى مفوت و لا قرب يفوت ,, بيطلع دخنه بيضه و لا بيطلع ميه من الشكمان و لا ايه ,, الهدف معرفة هل الموتور بياكل زيت و لا لاء.

3- طبيعه سواقتك و اسلوبك فى القياده ,, هل سيادتك بتشد و تاخد غرز و هدفك تقفل عدادين السرعه و الار بى ام ؟؟ ,, و لا بتحب دايما تمشى عل يمين مع اتوبيسات النقل و كبار السن و جنب الرصيف ,, طبعا الاسلوب الهادىء يحافظ هلى الموتور و على حالة الزيت أفضل من اللى بيحي يقفل عداد الار بى ام

4- طبيعة الجو و المناخ و الطقس ,, اللى بتمشى فيه عربيتك ,, حار جدا جدا ,, حار بس ,, معتدل ,, سقيع ,, مترب و معفر ,, صافى و ربيع ...... etc

5- طبيعه الأرض اللى بتمشى عليها دوما السياره ,, أرض مستويه متسفلته و لا مطالع و منحدرات ,, كسبان رمليه ,, أرض صخريه ,, اللى بيرهق الموتور بيرهق الزيت as well , حته فورميولاتور

6- المده الزمنيه اللى قعدها الزيت فى موتور عربيتك حتى و لو مامشيتش بيها كتير ,, ستة شهور , سنه ,, سافرت الخليج و رفعت العربيه خمس سنين و رجعت بالسلامه و قلت ما هى كان فيها زيت اصلا من قبل ما اسافر

7- نوعية الزيت هل هو معدنى و لا تخليقى ,, و هل عليه إضافات تحافظ على لزوجته و خواصه ,, و هل هو مناسب لموتور عربيتك و حالة موتور عربيتك و طبيعة سواقتك و طبيعة الجو و الأرض و لا لاء , طبعا فيه زيوت بتستحمل عن زيوت تانيه و كله بتمنه ,, و طبعا ديه سمعة صانعين , يقولك الزيت ده بينقص , الزيت ده بيسود (و على فكره ديه حاجه مش وحشه المهم لزوجته) و يقولك الزيت ده بيتحلل و الزيت ده بيبقى ميه و الزيت ده بيتبخر و هكذا ,, فتش عن السمعه بناء على تجارب و ليس كلام قهاوى و من مصدر موثوق فيه.

أولا و أخيرا ,, انت عشان تعرف امتى تغير الزيت ده يعتمد على

1- مراجعة لزوجة الزيت على صوابع يدك كل فتره ,, مثلا قول كل اسبوع اسبوعين و بالاحتراف ستعرف متى يتم تغيير الزيت , و طبعا اهم حاجه الموتور يكون بارد

2- الأخذ فى الاعتبار توصية صانع الزيت نفسه و بيبقى كاتبها على العبوه ,, يكتبلك على عبوة الزيت الزيت ده اخره كده لاموأخذه 5000 كم و ارميه ,, انا ماباقولش التزم بيها حرفيا و لكن خدها فل إعتبار ,, يعنى تبقى عارف ان الفتره ديه فتره حرجه ممكن الزيت يحتاج يتغير

3- المده الزمنيه اللى كان فيها الزيت فى الموتور ,, كام شهر ؟ يفضل لا يزيد عن سنه حتى و ان لم يمشى الكيلو الموصى به