الموضوع: ايهما افضل لزيت الفتيس ليكوى و لا فالفولين

د / المناهرى , ازى سيادتك , عامل ايه ؟"

ازى صحة سيادتك ؟ انا قرأت ان سيادتك بعافيه شويه , يا ريت تطمنى على صحتك

ليا سؤال عند سيادتك

دلوقتى أنا معايا البى واى دى 2013 و عامله 1360 كم فقط

و قرأت مواضيع و مشاركات سيادتك عن أنواع الزيوت , و ان سيادتك بتفضل زيت ليكوى مولى أو فالفولين للسياره

سيادتك حطيت ليكوى مولى الأول و تانى مره لم تجده فحطيت فالفولين

يا ريت سيادتك تقولى انهو احسن فيهم هما الاتنين , ليكوى و لا فالفولين

بالنسبه لصوت الموتور , اداء الموتور , الار بى ام العالى فوق ال 3

و هل فيه فرق ما بينهم جامد و لا غير ملحوظ

حقيقه ان إجاباتك حتثلج صدرى و تريحنى لأنى محتار

تانى حاجه بالنسبه للفتيس , انا عندى الفتيس بحس انه له إراده !! ماتستغربش من اللى انا بقوله , حوحضح لحضرتك انا اقصد ايه

أولا الغيار الاول , مابيعشقش بسهوله إلا إذا كانت العربيه واقفه تماما , السرعه صفر , لو كانت العربيه بتمشى على سرعه بسيطه جدا تكاد لا تذكر , و اجى أعشق الأول , بيبقى مش بسهوله يعنى بيعشق بعضه ,
كأن الفتيس عايز يقولى بلاش الغيار الأول خليك فل تانى أفضل , و فعلا ساعتها الغيار التانى بيبقى سهل و سلس جدا , بس مابرضاش أعشقه لأن السرعه بتبقى بطيئه جدا فا عل تانى العربيه حتسقف منى و لازم اشيل رجلى من على الدبرياج بالراحه أوى عشان الموتور مايبطلش

أما الغيار التانى فلازم أعشقه على سرعه بطيئه أوى يعنى ماكونش حرقت عل أول كتير و الار بى ام عالى , و إلا برضه حيبقى بيعشق بعضه , كأن الفتيس عايز يقولى انت المفروض ماتحرقش عل أول كده , يدوبك أول ما تاخد سرعه و لو بسيطه جدا انقل عل تانى علطول

نفس الكلام لما ببقى عل تالت و أهدى السرعه , و عايز أجيب التانى , الفتيس بيرفض , و مايرضاش ينقل إلا إذا السرعه قلت أكتر من كده , وصلت مثلا 15 كم /ساعه , ساعتها يحن عليا و يدينى لغيار التانى بسهوله و إلا كله بالعض و التشنج

و النتيجه اللى أنا حاسسها دلوقتى , ان الفتيس عايز يكتم الموتور و مش عايز يريحه , يعنى انا بحب فى سواقتى انى اريح الموتور , يعنى أحرق على الغيار شويه بسيطه عشان العربيه تاخد سرعه مناسبه , فا لما أجى انقل الغيار الأعلى , يبقى عزم الموتور مستريح , مايبقاش الموتور مكتوم و بيسقف و بيتكتك

و كمان برضه انا حاسس ان الفتيس عايز يتعب الدبرياج , طبعا لأنك لما تعشق الغيار قبل أوانه , عشان الموتور مايسقفش منك و يبطل و يقف , لازم تشيل رجلك من على الدبرياج بالراحه أوى سنه سنه و تاخد وقت أطول و رجلك على الدبرياج , و أعتقد ده بيتعب الدبرياج و بيتعب رجلك كمان

و لو خدتها عند (بكسر العين) مع الفتيس و قلت و الله لأنا عامل اللى فى دماغى و نقلت زى ما انا عايز , بالقى العض زاد أوى و على كل السرعات , حتى عل تالت و الرابع

فا أعمل ايه مع الفتيس ده , أخدها عند معاه و لا أسايسه و يتحرق الموتور و الدبرياج , كله فدا الفتيس , و لا المشكله ديه ليها حل

الصراحه المشكله ديه مخليانى مش قادر استمتع بالسواقه خالص و لازم كل مشوار اتخانق مع الفتيس و احرق فى أعصابى و أحرق حاجات تانيه طول ما انا ماشى

و سؤال تانى برضه , عايز اعرف ايه احسن زيت فتيس مانيوال و ايه هى احسن اضافات ممكن تتحط عليه , هل ليكوى مولى احسن و لا فالفولين
و ايه هى اسماء الاضافات لو فيه ؟