الموضوع: تقرير كامل عن بعض اللابتوبات

بسم الله الرحمن الرحيم
------------------------
الموضوع ده هو موضوع تكميلي للموضوع السابق تشتري نوتبوك ايه
http://www.nilemotors.net/Nile/showthread.php?t=16709
------------------------
بدايه انا تقاريري هيا بناء على تعامل مع اللابتوبات في فتره آخر 5 سنوات ولكن الكمبيوترات عموما في آخر 18 سنه ... لذا اتمنى اني اكون موفق في السرد لكل ميزات وعيوب وتقيم للابتوبات بكل حياديه بناء لى تجربه لفتره قريبه لـ سنه ولا تزيد عن 4 سنوات
------------------------
بدايه اللابتوب اللي معايا و اللي ناس كتير سألت عليه وهو الايسر
الشركه عموما هيا اكثر من رائعه في خدمتها للعملاء و للاسعار مقابل القيمه التي تحصل عليها
الموديلين هما
Acer Extensa 6600 - 6601
عمره 3 سنوات وشوية
و Acer Aspire 5315
وده عمره حوالي 8 شهور وبعته لان كان سيليرون (المعالج بتاعه)

=================
تقييم عام للابتوبات الشركه
1- الآداء العام للبروسيسور انخفض بنسبه 98% بعد استعمال 3 سنوات ( تقريبا 11 الف ساعه عمل متواصل ) (46\50)
2- الرامات كانت مناسبه للبروسيسور وللمستعمل العادي عموما ولكنها نوعا ما ضعيفه و احتجت تطويرا لاحقا نظرا لسرعه الباص المنخفضه ( 42\50)
3- الهارد ديسك الداخلي جيد نوعا ما من نوع توشيبا بسرعه 4500 دوره ولكن ايضا دون المستوى الذي يمكن ان نقول عليه رائع (40\50)
4- كرت الشاشه الداخلي من نوع انتل يأخد 8 ميجا من الرامات ولكن يفتقر إلى العديد من المزايا وقدرته هي 128 ميجا ولكن الحق يقال انه لم يشتكي يوما من اي مشكله في التعامل مع برامج الثلاث ابعاد وهو جيد جدا فيها ( 35\50 )
5- المروحه تفقد السيطره على درجه الحراره عند التحميل للبيانات العالي (العاب ضخمه او بيانات ضخمه للبورصه ) والحق يقال ان الجهاز وصل لحد 71 درجه و الوندوز محصلوش كراش او حتى بطء شوية ودي نقطه ممكن تكون ايجابيه و سلبيه في نفس الوقت لانه مدانيش تنبيه بدرجه حراره الجهاز -انا بستعمل برامج خاصه- (40\50)
6- نظام التشغيل هوا وندوز اكس بي هوم ادشن ... بصراحه محتجتش ان افرمت الجهاز غير مرتين اتنين من ساعت ما جبته لحد دلوقتي ... نظام مستقر جدا ومتوافق مع الجهاز ( 45\50)
7- البطاريه انهار اداءها تمام و مبقتش حتى بتسعف الجهاز علشان يعمل اغلاق او يدخل وضع استعداد ( 20\50)
8- السي دي روم اول كان اشتغل مرده شهرين و باظ اتصلت بالشركه وبعتو مندوب شركه شحن دي اتش ال خدوه من البيت عندي مجانا و غيروا تماما السيدي روم وشغال زي الفل (40\50)
9- اللون السلفر بتاعه راح بسبب الاستعمال (معرفش هل ده هينطبق على الابيض الجديد برضو ولا لأ ) (35\50)
10- التاتش باد والكيبورد باظو من كام يوم من غير اي اسباب معلومه ولسا هبقا اصلحهم في الامارات (0\50)
11- وزن اللابتوب جيد جدا حوالي 3 كيلو بمعظم ملحقاته (45\50)
12- بعض الاحيان وفي مصر بالذات بقيت اتكهرب كهربا استاتيكيه من غير اي سبب من الاجزاء المعدنيه بتاعته (0\50)
13- زراير المالتيميديا كلها شغاله وكل الملحقات الخارجيه ما عدى السماعات واحده منهم اتحرقت (25\50)
14- الخدمات اللاسلكيه جيده نوعا ما مع بلوتوث من المستوى الثاني بمدى 50 متر و وايرلس لان للموجتين ايه و بي و جي بمدى 100 متر وكرت الشبكه العادي جيد جدا (40\50)
15- خدمات المخارج التسلسليه يو اس بي جيده جدا ولكن مع وجود واحد من غير اي لزمه من المستوى الاول (40\50)
16- تعامل الجهاز مع البروجيكتورات رائع وسلس (48\50)
17- عرض الشاشه مع الطول متناسب وجيد مع نظام الوضوح الكريستالي جيد جدا (45\50)
18- سعر الشراء 3400 درهم (4760 جنيه ) من ثلاث سنوات و سعر البيع الحالي وفقا لمتوسط تقييم الشركه و الباعه بعد عرض كل االمشاكل السابق ذكرها هو 800 درهم (1120 جنيه ) نظرا لان المعالج سنترينو وليس سيليرون ويعتبر نوعا ما سعر اعاده بيع جيد جدا بكل المهازل الموجوده سابقا (45\50)
19- هدايا ملحقه عند الشراء كانت بقيمه 400 درهم (شنطه و فلاشه 2 جيجا و ماوس وايرلس و سماعات اذن رياضيه ) (45\50)
20- خدمه عملاء اكثر اكثر من رائعه صراحه (50\50)
-----------------------
اجمالي (726\1000) بمتوسط 36 نقطه
اي ما يعادل جيد مرتفع 72.6%


ان شاء الله هكتب التقرير بتاع ال HP بتاع الوالده بعد كام ساعه كدا
وياريت اللي معاه اي لابتوب يكتب بناء على ال 20 نقطه السابقه تقييمه
حتى نكون حياديين لاقصى حد ممكن

تحياتي
(وارجو عدم نقل الموضوع مع الموضوع السابق حتى اكتماله)