تغير طقم التبريد كامل ( الطقم الكبير ) وشحن التكييف ابيزا 98

**mahmoud ghanem** · 06-04-2013 01:34 AM

السلام عليكم
الحمد الله تم تغير طقم التبريد الكامل الكبير ( ردياتير + سربنتينه تكييف ) ابو مروحتين وتغير خراطيم التكييف وشحنه

اولاً : المشكلة ( اسباب التغير )
ـــــــــــــــــــــــــ ـــــــــــــــــــــــــ ـــــ

البداية كانت الصيف اللى فات سربنتينه التكييف فى الضياع شحنت التكييف وكان شغال مروحة فى النهار بدون تبريد وبليل نقدر نقول فى تبريد بس طبعا ً على الطريق الطوالى فقط ..
وكان ولابد من تغير السربنتينة وقلت ربنا يسهل على اول الصيف ان شاء الله

بالنسبة للردياتير الحمد الله مفيش مشاكل تذكر فى ارتفاع درجة حرارة المحرك يعنى المؤشر معايا على النصف على طول بس المشكلة كلها كانت فى نقص المياه باستمرار ( يعنى كل يومين ثلاثة ازود بتاع نصف لتر مياة ) ومفيش تسريب وكنت هتجنن ما علينا

ظهرت مشكلة الردياتير من اسبوع وانا خارج بالسيارة صباحاً لاحظت وجود اثار لون المياه ( كنت مزود مياه زرقاء ) تحت السيارة بفتح القربة لقيتها مفيهاش نقطة مياه مع العلم انى كنت راجع بيها من مشوار والحرارة كانت معايا مظبوطة مجرد انها باتت بس

زودت مياة وقلت اشوف رحت بيها مشوار وانا متابع الحرارة الحمد الله مفيش مشكلة ... رجعت ركنت العربية ووقفت اشرب سيجارة وجدت تسريب مياه مكان الخرطوم اللى راكب من تحت فى الردياتير قلت بس يبقى الافيز مفكوك او حاجة بسيطة يعنى .. توجهت لبتاع ردياتير يعنى يربط الافيز كويس وقلت قبل ما اروح اطلع واجيب المياه gt 12 الحمراء ( المهندس سيد كان عامل بيها تقرير قبل كدة وبيشكر فيها )
وكفاية انها المانى وكان المهندس سيد جايبها بــ 65 جنيه يعنى قريب من سعر المياه الهيبو

روحت فتح الباب اللى فى رمسيس وجبتها .. بكام يا عم ؟؟؟ قالى بــــ 85 جنيه !!!!!

ايه ؟؟؟ دى بــ 65 جنيه من شهرين !! ضحك وقالى الدولااااااار رفع كل الاسعار

قلت ربنا يستر وتوكلت على الله واشتريتها

وتوجهت لبتاع الردياتير وشرحتله المشكلة فك واختبر وانا بقلة بتختبر اية يا عم دة الافيز بس مش رابط كويس !!!
قالى يا بشمهندس افيز اية الردياتير مخروم .... وكانت الصدمه مخروم ؟؟؟ مخروم ليه !!! المهم قلتله خلاص الحم مش مشكلة ضحك وقال الالمونيوم مش بيتلحم قلتله طب بيحصله اية ؟؟؟
قالى بيتغير قلتله يارجل متهزرش !!! قالى والله علشان هو على جوانات صغيرة كدة زى الاويل سيل كدة لما بتضرب شكراً

طب الاحسن اية استيراد ولا جديد قالى جديد ... طب بكام قالى يعمل من 350 لـ 400 جنيه

ثانياً : القرار
ـــــــــــــــــــــ

جتلى فكرة قلت اللى يخلينى اجيب ردياتير وبعد كدة ارجع اشترى سربنتينه تكييف طب ما اجيب طقم التبريد الكبير الكامل وخصوصاً ان فى مقابلت القسم اللى فاتت فى 6 اكتوبر شفته راكب عن الاستاذ ايهاب والمهندس سيد وشكروالى فيه جداً وانه افضل من الردياتير الصغير اللى راكب عندى ( بصراحة اللى كان عندى شغل بلدى من كل فلم اغنية )
توكلت على الله وقلت اشترى الطقم الكامل دة

طبعا كلمت المهندس سيد اسئله واخد رايه ... بصراحة المهندس مشكور اخد الموضوع باهتمام كبير ووجهنى على مكان الشراء وايه الافضل وكمان سئلته على الراجل بتاع الردياتير اللى ركب عنده اخر مرة ومشكور كان معايا بالتليفون رغم انشغالة وكان معايا لحظة بلحظة ...

ثالثاً : عملية الشراء
ـــــــــــــــــــــــــ ـــــــــ
المهندس سيد قالى اقرب مكان ليك بما انى بالمعادى المريوطية توكلت على الله ووصفى المكان وهيكون فى حدود سعر كام وقالى الافضل تجيب طقم التبريد اللى بــ 2 ماتور ( كل مروحة بماتور مستقل ) لو مفيش هات ابوا ماتور واحد مش مشكلة بس خلى السؤال الاول عن ابو 2 ماتور

توجهت للمريوطية وكان فى اتنين ( ملك الجولف + عباد الرحمن )
دخلت على عباد الرحمن ( ايمن ) .. فى طقم تبريد ابيزا كامل بــ 2 ماتور ؟ ايوة بــ 900 جنيه
يرضيك يرضيك مفيش جنيه نزل خلاص توكل على الله بس الردياتير بتاعك يعنى بتاع الردياتير هيجرب ويشوفة لو تمام خلاص لو فيه حاجة بتاعك قالى بتاع ياباشا ( طبعا توجيهات المهندس سيد لى )
الراجل دخلنى مخزن فى ارض فضاء كبيرة فيها كل حاجة فى الدنيا دى من الابرة للصاروخ للابيزا والفولكس .

لرحت للشيخ اشرف فى الوفاء والامل .. شوف كدة الطقم وقالى يركب ؟؟ بص عليه لقاه منفس رجع يا عم تانى رجعته وجبت واحد غيرة ( طبعا كله استيراد ) ورجعت للشيخ اشرف تانى تمام دة اختبرة وقالى تمام بس خلاص النهاردة شكراً الساعة 10 بليل يبقى يوم الاتنين ان شاء الله علشان الاحد اجازة ..
المهندس سيد قالى فى بتاع تكييف جمب الشيخ اشرف هيشحنلك ويختبر هو كمان سئلت الشيخ اشرف على محمود بتاع التكييف جيه الراجل وقالى تمام يخلص الشيخ اشرف واشتغل انا ...

رابعاً : عملية التركيب
ـــــــــــــــــــــــــ ــــــــــ

تركيب الردياتير اخد وقت حوالى 4 ساعات ... فك وتظبيط المقاس وفك الاكصدام وتغير القواعد للردياتير ( الردياتير القديم كان صغير والحوامل على مساحة صغيرة ) بالاشتراك مع بتاع التكييف علشان يظبط اماكن مواسير التكييف و تم توسيع الحوامل عند السمكرى بالمقاس على الطقم الجديد وتم تركيب الطقم الجديد الراجل بصراحة شغلة نظيف جداً جداً ومحترم
وقبلتنى مشكلة بسيطة ان الطقم من غير فيشة والمهندس سيد قالى اوعى حد يلعب فى الضفيرة اعمل اى حاجة بعيد عن الضفيرة وبالفعل تم عمل ترامل على الترموستات وجرب 100*100
الحرارة على المنتصف مفيش تسريب والاجمل المروحة صوتها واطى جدا لدرجة انك لو فى طريق متخدش بالك من صوتها اللا مع التركيز عكس القديم ابو مروحة هليكوبتر كنت لما ادخل الشارع عندى ابنى يعرف انى وصلت من صوت المروحة
الحاجة التانية المروحة القديمة بتشتغل كتير قوى يعنى كل شوية ... الجديد على فترات متباعدة جداً

خلصنا من الردياتير خش على شحن التكييف ...
طبعا السربنتينة القديمة صغيرة يبقى فى خراطيم هتتغير بأطول ...
تم تغير 2 خرطوم منهم واحد كان ضايع اصلاً وغير مكان الفلتر وسبته كويس بدل الافزان اللى كان متربط بيهم ( كان راكب شغل عك ) ظبط مواسير تمام
غسل الكويل غسلة تماااام وشحن والحمد الله التكييف بقى ممتاز على السلانسية ودى بشرة خير

اخيراً : الملاحظات
ـــــــــــــــــــــــــ ــ

الحراة تمام على المنتصف على طول .. المروحة على السرعة الاولى بس مع التكييف بتشتغل على السرعة التانية على طول .. لما التكييف بيشتغل الحرارة بتنزل بعد فترة يمكن على الربع تقريباً معرفش ليه ؟؟؟ لو قفلت المكييف بعد شوية بزيد وتقف على المنتصف
مش عارف دة طبيعى ولا اية ؟؟؟

التكلفة علشان الكل يستفيد
طقم التبريد كامل استيراد بــــ 900 جنيه
تعديل قواعد الطقم عند السمكرى بـــ 50 جنيه
الشيخ اشرف تركيب الطقم بــ 50 جنيه

2 خرطوم تكييف جديد امريكى وتركيب الفلتر وتثبيته وغسيل الكويل + مصنعيات + شحن التكييف بــ 500 جنيه ( كتير بس انا معجب بالشغل )

شكر خاص للمهندس سيد يا جماعة بجد الراجل دة عمل معايا الصح
توجيه ومتابعة ونصائح .. شكرا يا ابو السيد وربنا يقدرنا ونرد جمايلك

انا يا جماعه تليفونى للاسف من غير كاميرا ومعرفتش اصور الشغل بس عرفت اصور الطقم قبل ما اركب بكاميرا بس مساحة الصور كبيرة ومش عاوزة تترفع على المنتدى

واسف على الاطالة

**Karim Ibiza** · 06-04-2013 02:04 AM

مبرووووك يا حوده التكييف والردياتير
فعلا الردياتير الكبير حاجة محترمة جدا خصوصا مع التكييف
بس انا عايز اعرف حاجة: انا عندى الحرارة على طول على النص وأول ما تزيد شرطة المروحتين بيشتغلوا مش واحدة بس
وانت بتقول ان المروحة التانية بتشتغل مع التكييف بس
ياترى ايه الصح؟؟؟؟؟

**SYD** · 06-04-2013 03:38 AM

الف مبروك يا حودة - اخبار الردياتير ايه ؟؟
بتتابع المياة ؟؟

بص يا صديقي - طبيعي ان المروحة الأولي تشتغل علي الثرموستات لما يوصل لدرجة تشغيلها (اعتقد 92)
والمروحة الثانية بتشتغل مع التكييف فقط

اعتقد سبب انخفاض الحرارة هو تشغيل المروحتين اثناء عمل التكييف
بس دة بردو مؤشر إلي ان الدورة عندك فيها مشكلة - وطبعا دي مشكلة ثرموستات الكوع
يعني الدورة شغالة مستمر والكوعة مش بتقفل عليها وهي داخل المحرك
ومع وجود مروحتين فدرجة الحرارة بتقل بشكل مبالغ فيه

اكشف علي ثرموستات الكوع عندك - واختبارها سهل اوي
هتفكها وتحطها في حلة فيها مياة وتحطها علي النار - اول لما المياة هتوصل لدرجة حرارة (90 علي ما اعتقد) هتلاقي الصمام بتاع الثرموستات فتح - اطفي البوتاجاز وسيب المياة تبرد هتلاقيه قفل تاني لوحده
جرب الأختبار مرة واتنين كمان للتأكد من كفاءة عمل الثرموستات

اما لو لقيته مش بيفتح ولا بيقفل يبقي الثرموستات بالسلامة

واعتقد انك ممكن ماتلاقيهوش هو نفسه خالص ويكون ملغي من عندك

جرب وقولنا

تحياتي

**SYD** · 06-04-2013 07:00 AM

كلامك جميل يا ابو حميد
بس انا اشك في ان الثرموستات عندك شغال كويس
مين هيرجعه وهو جوة الكوعة ؟؟؟
وهو برة انت بترجعه بأيدك طب وهو جوة ؟؟؟

ايام لما كان عندي تكييف - ماكنتش الحرارة بردو لا تنزل ولا تطلع - هي ثابتة علي النص

الحاجة الوحيدة اللي رفعتلي الحرارة اكتر من النص - زيت ليكوي مولي ابن اللذينة في اخر ايامه

اخبار كاسترول معاك ايه صحيح ؟؟

**mahmoud ghanem** · 06-04-2013 12:42 PM

المشاركة الأصلية كتبت بواسطة karim ibiza

مبرووووك يا حوده التكييف والردياتير
فعلا الردياتير الكبير حاجة محترمة جدا خصوصا مع التكييف
بس انا عايز اعرف حاجة: انا عندى الحرارة على طول على النص وأول ما تزيد شرطة المروحتين بيشتغلوا مش واحدة بس
وانت بتقول ان المروحة التانية بتشتغل مع التكييف بس
ياترى ايه الصح؟؟؟؟؟

الله يبارك فيك يا كريم ... بصراحة فرق معايا فى التكييف جداً

بالنسبة للمروحتين هما بيشتغلوا مع بعض طبعا مش وحدة ووحدة .. الحرارة لما بتزيد بتشتغل المروحتين على السرعة الاولى ( البطيئة ) لكن لو شغلت التكييف المروحتين بيشتغلوا بس على السرعة التانية ( العالية ) على طول حتى لو العربية باردة ..
انا اللى هيجننى ان لو التكييف شغال العربية مبتسخنش يعنى مؤشر الحرارة على الربع مثلاً مش بيزيد عن كدة !!!! مش عارف دة طبيعى علشان الطقم كبير ومروحتين وعلى سرعة عالية يكون هو دة السبب ( طبيعى يعنى )

**mahmoud ghanem** · 06-04-2013 12:56 PM

المشاركة الأصلية كتبت بواسطة S O P H O S

الف مبروك
ربنا يكرمك علي الافادة ..

الله يبارك فيك S O P H O S وشكراً على مرورك

المشاركة الأصلية كتبت بواسطة aldesha989

ما شاء الله مبروك عليك وربنا يكرمك فيهم شغل ممتاز هو الشحن والكلام ده غالى شويه بس لو على كلامك الشغل حلو يبقى فداك وفدى الشغل ان شاء الله وربنا يباركلك فيها

الله يبارك فيك aldesha989 ...

**mahmoud ghanem** · 06-04-2013 01:17 PM

المشاركة الأصلية كتبت بواسطة syd

الف مبروك يا حودة - اخبار الردياتير ايه ؟؟
بتتابع المياة ؟؟

بص يا صديقي - طبيعي ان المروحة الأولي تشتغل علي الثرموستات لما يوصل لدرجة تشغيلها (اعتقد 92)
والمروحة الثانية بتشتغل مع التكييف فقط

اعتقد سبب انخفاض الحرارة هو تشغيل المروحتين اثناء عمل التكييف
بس دة بردو مؤشر إلي ان الدورة عندك فيها مشكلة - وطبعا دي مشكلة ثرموستات الكوع
يعني الدورة شغالة مستمر والكوعة مش بتقفل عليها وهي داخل المحرك
ومع وجود مروحتين فدرجة الحرارة بتقل بشكل مبالغ فيه

اكشف علي ثرموستات الكوع عندك - واختبارها سهل اوي
هتفكها وتحطها في حلة فيها مياة وتحطها علي النار - اول لما المياة هتوصل لدرجة حرارة (90 علي ما اعتقد) هتلاقي الصمام بتاع الثرموستات فتح - اطفي البوتاجاز وسيب المياة تبرد هتلاقيه قفل تاني لوحده
جرب الأختبار مرة واتنين كمان للتأكد من كفاءة عمل الثرموستات

اما لو لقيته مش بيفتح ولا بيقفل يبقي الثرموستات بالسلامة

واعتقد انك ممكن ماتلاقيهوش هو نفسه خالص ويكون ملغي من عندك

جرب وقولنا

تحياتي

الله يبارك فيك يابشمهندس ومش عارف اشكرك ازاى ربنا يقدر ونرد جمايلك .. الحمد الله فى فرق كبير صوت العربية اهدى والحرارة مظبوطة والمياه زى ما هدى مش بتنقص الحمد الله
موضوع ثرموستات الكوعة دة هحاول اختبرة انا كدة كدة رايح النهاردة تانى للشيخ اشرف علشان انزل المياه واحط المياة الحمراء هخليه يفكها ونجربها .. ولو حابب اغيرها تعمل كام الثرموثتات دى ؟؟ وبتتباع لوحدها ولا لازم الشجرة بالكامل ؟

سؤال تانى يابشمهندس الموضوع دة فى مشكلة على العربية انها تبرد كدة مع التكييف ؟؟

-

-

الموضوع: تغير طقم التبريد كامل ( الطقم الكبير ) وشحن التكييف ابيزا 98

LinkBack

أدوات الموضوع

عرض

-

-

-

المواضيع المتشابهه

كيفيه تغير مياة التبريد وعمل غسيل للدوره للبولو وما يشابهها فى دورة التبريد

الفني فك البلف بتاع الفريون وشحن بدون تفريغ هواء!!!!

للبيع - طقم زراير كهرباء كامل + طقم مكن زجاج كهرباء + 4 فرش ابواب ويرا2005

مشكلة في الكتاوت وشحن الدينامو

صيانة وشحن التكييف بين الحرفة والنصب

الكلمات الدلالية لهذا الموضوع

المفضلات

المفضلات

ضوابط المشاركة