للمناقشه الموضوعيه- تحويل السيارة لغاز

**amagroup** · 06-04-2013 02:23 PM

ايه رائكوا في تحويل العربيه لغاز
هل الافضل نحولها لغاز عشان نوفر ولا ده هتكون وسيلة جديده عشان يلموا فلوس وبعد كده الغاز يغلي او تلاقيه قليل ؟

ياريت الناس تشارك ونفكر سوا وكمان عاوزين خبرات الناس اللي حولوا لغاز (بدون تحيز)
طبعا عارفين انه بيوفر بس سؤالنا مش اساسه التوفير.. اساسه هو هل العزم زي ماهو ولا ايه

**wardet** · 06-04-2013 02:26 PM

بص ياباشا
اللى اعرفه ان الموتور عمره بيقصر لما تحول لغاز
دا بالاضافة ان مصر كام سنة ومش هيبقى عندها غاز وهنستورده واكيد هيغلي
وبيتهيالى محطات الغاز على الطرق مش كتير يعنى لو مسافر طريق متعرفوش
هتبقى مقلق ان الغاز يخلص منك دا غير انه بيمشيك مسافة اقصر من اللى هتعملها بالبنزين

**michohat** · 06-04-2013 03:09 PM

مشكلتي الوحيده مع الغاز هو حجم الاسطوانه اللي بيموت شنطه العربية

**S O P H O S** · 06-04-2013 03:34 PM

هو حسب العربية بصراحة
يعني لو الماتور قوي ويتحمل اضحي بقدر منه ومؤهل للموضوع مفيش مانع
انما لو عكس كده مش هضحي بالماتور والعزم وجزء من الشنطة مقابل كده

**أبو يوسف** · 06-04-2013 03:45 PM

بصراحة مشكلتى مع الغاز موضوع حجم الاسطوانة اللى بيتلغى من الشنطة
وانا بحتاج الشنطة جداً .. جداً

**ahmed_ali9583** · 06-04-2013 04:12 PM

العزم هوهو مفيش فرق خالص وده نظرا لان اجهزه التحويل بقت حديثه جدا
الاسطوانه بتلغى تقريبا 2/3 الشنطه بس ممكن تركب شبكه اوجرايد للسقف وقت اللزوم وتتشال عادى سهله ومش بتاحد وقت لافى تركيبها اوحلها
المحطات منتشره وتقدر تعرف عناوينها من اى محطه بيبقى عندهم ورق مطبوع بالاماكن سواء كارجاز اوغازتك
متر الغاز يكافئ لتر البنزين يعنى بيمشيك نفس المسافه الفكره كلها ان تفويله الاسطوانه بتبقى تقريبا 1/3 تفويله تنك البنزين
على فكره انا عربيتى نبسان صنى 2010 ومحوله بقالها 3شهور ومشيت بيها بالغاز تقريبا 23000 كم والحمد لله مفيش اى مشكله ومش حاسس باى فرق بالاضفه الى الوفرالمادى الملحوظ طبعا
واى استفسار انا فى الخدمه وشكرا

**amagroup** · 07-04-2013 11:30 AM

المشاركة الأصلية كتبت بواسطة ahmed_ali9583

العزم هوهو مفيش فرق خالص وده نظرا لان اجهزه التحويل بقت حديثه جدا
الاسطوانه بتلغى تقريبا 2/3 الشنطه بس ممكن تركب شبكه اوجرايد للسقف وقت اللزوم وتتشال عادى سهله ومش بتاحد وقت لافى تركيبها اوحلها
المحطات منتشره وتقدر تعرف عناوينها من اى محطه بيبقى عندهم ورق مطبوع بالاماكن سواء كارجاز اوغازتك
متر الغاز يكافئ لتر البنزين يعنى بيمشيك نفس المسافه الفكره كلها ان تفويله الاسطوانه بتبقى تقريبا 1/3 تفويله تنك البنزين
على فكره انا عربيتى نبسان صنى 2010 ومحوله بقالها 3شهور ومشيت بيها بالغاز تقريبا 23000 كم والحمد لله مفيش اى مشكله ومش حاسس باى فرق بالاضفه الى الوفرالمادى الملحوظ طبعا
واى استفسار انا فى الخدمه وشكرا

انت بتقول انك مشيت بيها وانت مركب غاز 23 الف كم صح ولا الكلام غير كده

طب بالنسبه لانبوبه الغاز هل في احجام اقل من منها
وازاي احسب الاستهلاك بمعني ""انبوبه حجمها ...ليتر بتتملي ب... جنيه واللتر بيعمل .....كم

**ahmed_ali9583** · 08-04-2013 09:58 PM

اه الكلام صح
فيه ثلاث احجام 50 و 60 و 70
انا مركب ال70 بتاخد كام متر دى حاجه مش ثابته لانها بترجع للضغط فى المحطه بمعنى ان الاسطوانه بتقل لحد 400 ضغط جوى (بار) والضغط بيختلف من محطه لاخرى
فالاسطوانه لوفاضيه بتاخد تقريبا 16متر وده تقريبا المتوسط ممكن اكتر ممكن اقل حسب الضغط والمتر ب45قرش وبيمشوك تقريبا من 200 الى 250 كم حسب ظروف السواقه يعنى السرعه الطريق الزحمه الخ
اه بالمناسبه اكتر مره فولت فيها اخدت 19 متر وده حصل مره واحده بس انما العادى 15 او 16 كده يعنى تقدر تحسب الاستهلاك زيو زى البنزين

**aldesha989** · 08-04-2013 11:27 PM

مستحيل احولها غاز انا شنطتى اصغر من الشنط العاديه يعنى متوسطه وتانى حاجه ما احبش يبقى فى فى ضهرى قنبله مؤقته
تالت حاجه حاجه غير العاده فمش محببه بالنسبالى
رابع حاجه انى ما اضمنش هتعمل ايه مع ماتورى وماعنديش استعداد ادخل فى عمره او تغير ماتور
خامس حاجه حتى لو الوفر كتير فده ما يمنعش ان البنزين انضف واحسن واضمن حتى لو هيغلى انا مش هغير بصراحه