هام وضروري جدا بخصوص جين 2

**JoKer y** · 06-04-2013 08:33 PM

السلام عليكم ورحمه الله وبركاته
انا محتار بقالي فتره وبعد قرايه كتير من المواضيع في المنتدي هنا قررت اسجل معاكوا وده يشرفني طبعا " واستفساري كاالاتي
اولا انا جيناوي جديد بقالي حوالي خمستاشر يوم الحمدلله ومبسوط بالعربيه جدا

بس عندي مشكله في العربيه وهيا ان ساعات كتير العربيه بتنتش مني علي سرعات قليله او متوسطه وبتبقي نتشه بسيطه وكل فين وفين بتبقي النتشه دي جامده علما بأذن العربيه اوتوماتيك 2006 وماشيه 90الف كيلو .
سحب العربيه حاسس انه ضعيف جدا وخصوصا لو مشيت بيها كتير
ناس قالتلي بوجيهات "وناس قالتلي زيت الفتيس وانا محتار جدا والموضوع ده معكنني بصراحه
تاني حاجه وانا ماشي لو فيه حته مكسره ولا حاجه بحس ان العربيه مهكعه جامد ومش ماسكه نفسها وده تقريبا محتاج تربيط عفشه . المهم انا محتاج رأيكم جدا وياتري اتعامل مع اي ميكانيكي كويس ولا عصام صفا ولا اعمل اييه ؟! واسف علي الاطاله

**JoKer y** · 06-04-2013 09:20 PM

؟؟؟؟؟؟؟؟؟؟؟؟؟؟؟

**shshtawy** · 06-04-2013 09:24 PM

بص هو انا ركبت اتوماتيك كتير وكان فيهم نفس النتشة ياعنى من اول الكيا لحد الفلوانس وكريسلر اسبرنج كلهم تقريبا فى نتشة وبتختلف من عربية لعربية ااقلهم كانت نتشة لاسبرينج مش عارف ليه يمكن علشان هى 3000 سى سى مش عارف
بس هقول لحضرتك حاجة كل الاعضاء هنا بتتعالج عند مهندس محترم اسمة عصام صفا
01000460111
01000460222
روحلة ويمكن بلكشف تعرف ايه سبب النتشة

**JoKer y** · 07-04-2013 08:50 AM

شكرا علي ردك يا ريس بس انا كمان ركبت اوتوماتيك كتير وكان منهم يعتبر نفس العربيه بس النتشه مختلفه عن الطبيعي " ساعات بحس انها خدت كيك داون والار بي ام علي والعربيه ماشيه علي سرعتها الطبيعيه يعني مسرعتش ولا حاجه " فا اكيد فيه حاجه غلط " وبالنسبه لارقام عصام صفا للاسف علي طول مقفوله

**tutankhamoun** · 07-04-2013 09:47 AM

العربية ماشية 90 ألف !

طيب أنت عارف صاحبها الأول مغير زيت فتيس ولا لاءة ؟
الصيانات أخبارها أيه ؟

زيت الفتيس لو قديم ممكن يتسبب في النتشة دي .
==

مبروك عليك العربية و ربنا يباركلك فيها و منور القسم .
نصيحة لو أنت مش عارف تاريخ الصيانات .
أكشف عليها عند عصام و صفا و غير الزيوت و سيور الموتور .

**RedBull_30** · 07-04-2013 08:48 PM

غير زيت الجير بوكس

**JoKer y** · 09-04-2013 05:19 PM

انا روحت لعصام صفا وكشفوا ع العربيه وحاسس ان انا اتقلبت بصراحه " معامله كويسه الي حد ما لكن كل شويه واحد يجي يشوف حاجه في العربيه ويمشي وقعدت حوالي اربع ساعات وفي الاخر المهندس عصام بيسال الي كشف ع الفتيس بالجهاز قالوا جابلك ايه ؟ قالوا مش فاكر راح قايلي ممكن الفتيس يكون فيه حاجه بصراحه انا ادايقت ومشيت مردتش اقوله اكشف تاني وكبرت دماغي " انا غيرت بوجيهات وفلتر هوة وفلتر بنزين وسير الكاتينه وبليه الكاتينه وسير المجموعه " العربيه سحبها بقي كويس الي حد ما بردوا مش اوي بس النتشه دي زي ماهيا ويمكن زادت شويه

**mohamed ragab** · 09-04-2013 07:35 PM

جرب تحط منظف انجيكشن اسمه max44 هتلاقيه في on the ran وحط عليه بنزين فول تانك وان شاء الله النتشه هتروح

**D . a .\ AYMAN** · 11-04-2013 12:24 AM

المشاركة الأصلية كتبت بواسطة tutankhamoun

العربية ماشية 90 ألف !

طيب أنت عارف صاحبها الأول مغير زيت فتيس ولا لاءة ؟
الصيانات أخبارها أيه ؟

زيت الفتيس لو قديم ممكن يتسبب في النتشة دي .
==

مبروك عليك العربية و ربنا يباركلك فيها و منور القسم .
نصيحة لو أنت مش عارف تاريخ الصيانات .
أكشف عليها عند عصام و صفا و غير الزيوت و سيور الموتور .

+1

أعتقد لازم تكون عارف زيت الفتيس اتغير إمتى .. ولو مش عارف لاز تغيره لأنه طبيعي لو بقاله أكتر من الطبيعي يعمل النتشة دي ... وأوصيك بزيت فالفولين الأعضاء اللى جربوه قالوا عنه كويس هو وليكوي مولي

وكمان حط منظف الإنجكشن ودورة الوقود هايفرق معاك برضه في السحب والنتشة دي شوية

بس أهم حاجة زيت الفتيس ... لأن الإهمال في صيانته ممكن يضرب الفتيس كله

تاني حاجة عصام صفا .. لما روحتله عرفت إنه آخره الصايانات العادية عشان المحافظة على الضمان ... هو ميزته إنه مقابلته حلوة وأسعاره بالنسبة للتوكيل في الصاينات الدورية أرخص .. والفنيين بتوعه في الصاينات الدورية مش أوحش من التوكيل نفسه ... وأسرع بفارق كبير جدا في عمل الصيانة ... التوكيل ممكن تقعد بالـ 6 ساعات وساعات طول اليوم لكن عصام بيخلص بسرعة

لكنه مالوش في إكتشاف المشاكل وحلها إلا بالصدفة البحتة ... أو لو المشكلة معروفة ومعروف حلها كمان ... لأن الفنيين عنده مش بيكلفوا خاطرهم يتعبوا شوية أكتر ... زيهم زي أي توكيل

والف مبروك العربية ربنا يرزقك خيرها ويحفظك من شرها ويباركلك فيها