نصيحه ضروريه معايا ريتمو وقدامى 125 جميله جدا مرفوعه 20 سنه ومحتار

بسم الله الرحمن الرحيم
باختصار انا معايا ريتمو مو 1979 حالتها وسط ( فروش جميل , سمكرة فيها شغل على خفيف بس الاكصدام الامامى مبهدل , الفتيس فى عيب بسيط انه بيعلق فى التالت شويه , العفشه وسط وطبعا كاى ريتمو فيها بوادر شروخ فى العلب والبطيخ من جوة ومرة لحمت شروخ قبل كدة )
المهم ان قدامى بالصدفه واحد قريبى تاجر سايب لى عربيه 125 بولندى لمدة اسبوع . المهم انها تحفه بحاله بلادها ( فرش وتابلوة و فرش السقف والسماعات والنواكل كلها وتارة الدركسيون والجنوط والطاسات الاصليه ) كل دة اصلى بتاع بلادة وبحاله حلوة جدا . مش راشه دواخل وصاجها جميل جدا كأنها جديدة والله . والعدادات شغاله وسواقتها جميله فتيس مضبوط تمام وماتور من اول لمسه يدور وصوته مضبوط . طبعا كلمته على التليفون واكد لى انها مرفوعه فوق ال20 سنه ولسه بأسم اول مالك وبعت لى الرخصه مكتوب فيها ورثه .
بصراحه انا عرفته انى بشاور عقلى وساعتها هو هيديهالى بتمنها مش هيتاجر عليا يعنى تقريبا انا لو بعت الريتمو اشترى ال 125 بنفس التمن تقريبا . بس عايز مشورتكم ونصيحتكم لان بردة الفرق فى المستوى الشكلى العام ( الاجتماعى ) يفرق بين اللى سايق ريتمو و 125 بس بصراحه الماتور والفتيس والعفشه وحاله الصاج والشنطه الواسعه اللى ممكن تخلينى اركب غاز واترحم من الطوابير وخلافه .
ياريت ما تبخلوش عليا بالنصيحه .

انا راى الشخصى ان المهم فى العربية حالتها بس انا معنديش خبرة عن 125
وانت عارف حالة عربيتك الرتمو كويس جدا وشفت العربية التانية 125 وجربتها وبتشكر فى حالتها اوى يبقى توكل على الله وخلص فيها
واستنى برضه راى الخبراء فى العربية يمكن يفيدوك اكتر

توكل على الله واشتريها ومالكش دعوة بالناس والمظاهر
يوم ما تبقى عطلان فى الطريق الناس مش هاتقولك ده راكب ايه ومش راكب ايه
وعلى رأى واحد صاحبى قالى اركب حالة و ما تركبش عربية :)

توكل على الله وخلص فيها...

توكل على الله مدام شاغله بالك يبقى هاتها وربنا يباركلك فيها

بس للحق وانتا بتبيع العربيه التانيه تقول للى هيشتريها فيها ايه بالظبط علشان ما يدعيش عليك

شكرا لكل الردود والنصائح . انتم شجعتونى والله وهو فعلا باين على ال 125 ان اعطالها هتكون قليله بأذن الله لانها بحاله الجديدة وهى عربيه زلطه ( من بعد الريتمو تحس انك راكب دبابه حديد ) وبعدين ثمنها معقول كمان بالنسبه لحالتها الحلوة 12500جنيه .
ربنا يجعله فى ميزان حسناتكم وشكرا على النصيحه ومستنى باقى الردود .

ماتترددش ياباشا
ال25 عربيه شديده وحماله اسيه
مفيش مقارنه بينها وبين الريتمو
لو علي وصفك وان العربيه حاله نادره
خلص علي طول
وتركب لها 4 جنوط سبور يغيرو الشكل معاك شويه
وفتيس بولونيز 5 غيار امامي ب600 جنيه
وانس العربيه
ولا زوايا ولا علب وشاسيه يفتح وشاسيه يقفل

ايوة بالزات موضوع شاسيه يقفل ويفتح دة . دانا كل اسبوع عند العفشجى وكمان غيرت قنطرة اماميه للرتمو .
بأذن الله انا خلاص هخلص فيها .
شكرا جزيلا لحضرتك .

توكل عل الله معايا 125 وهى عربية والله مظلومة ومش وخدة حقها

الحمد لله انا خلاص خلصت فيها . وهى والحمد لله جميله جدا محتاجه شويه شغل سمكرة على خفيف فقط وفى رفه بسيطه فى عجله من العجلات بيتهيألى سببها الجنط نفسه معووج . يعنى عايزة تشيك أب خفيف غير السمكرة .
والله العظيم وحش وبتطلع على السلانسيه على الاول . وبتطلع على التانى بسهوله جدا . ومن ساعتها لغايه دلوقتى كل شويه واحد يوقفنى فى الشارع ويقولى بتبيع العربيه دى وبكام واصل نواكلها كلها بتاعت بلادها وبحاله الجديدة ولما بفتح الكبوت اوريله الماتور بيزهل . لكن كل مرة يكون ردى مش ببيع والله جالى فيها الف والف ونص جنيه زيادة ( مع انى لسه ماصرفتش عليها مليم ) لكن بصراحه انا خلاص عن قريب هقلب الريتمو وافوق لسمكرة وتضبيط ال125 مع انى ناوى اسيبها بشكلها الكلاسيكى وهحاول اسيبها بحاله بلادها .
شكرا لكل النصائح والردود الجميله .

مش بيضايقنى غير حاجه واحدة اتكررت ييجى 3 او 4 مرات . وهى ان فى ناس بتشاور ( على اساس انى مشغلها يعنى زى التاكسى من الباطن ) . وانا والله لو الناس دى فى طريقى هوصلهم لكن هيكون شرطى قبل الركوب انه بدون مقابل لانى مش مشغلها تاكسى . وعلى فكرة دة مش استعلاء منى او تكبر على الناس اللى مشغله عربيات قديمه زى التاكسى لان الشغل مش عيب أيا كان .

ربنا يديك خيرها ويكفيك شرها
بس نصيحه لما تشدها حاول تحافظ على روح العربيه الكلاسيكي

بسم الله ما شاء الله الله اكبر
ربنا يباركلك فيها و اتمنى تحافظ عليها و تعاملها انها تحفة ايطالية كلاسيكية
و هي كعربية ركوبة و الريتمو ركوبة تانية خالص
و ال125 فعلا بتستحمل فوق الوصف بالك بقى لو حافظت عليها :))) و فعلا وقت الشد حافظ على كلاسيكيتها
و بالنسة للناس كلامهم لا بيقدم ولا بيأخر. الناس اصلا متعرفش حاجة عن فيات!! + كلامهم مش مقياس..
و خددددد باااااااااالك من قطع الغيار الرخيصة المضروبة :)

لو عايز تبيع أنا شارى بالسعر اللى تقول عليه أنا بأحب العربيات القديمة وخصوصا الإيطالى كلمنى على إيميلى
moatz9000@yahoo.com