الموضوع: تحية واجبة لواحد من اجدع رجال القسم

المشاركة الأصلية كتبت بواسطة ZARIF

طيب ممكن تحكيلنا على الموقف والتفاصيل
حتى عشان يبقى فيها معلومة للاخرين

المشاركة الأصلية كتبت بواسطة mahmoudysf

طارق من الرجالة الجدعان اللي اتشرفت بمعرفتهم
وممدوح من الرجالة الخدومة
فده مش غريب بين اتنين من احسن الناس اللي قابلتهم
وبعدين مقلتش لية على العطل عشان نقدر نساعدك ههههههههههههههه

اللى حصل ان يوم الاحد كان بحضر جنازة واحد قريب لينا م عايا امى و خالتى و انا راجع طلمبة البنزين قطعت

تحديدا من اول مستشفى المقاولون على الاوتوستراد استجابة العربية لدوسة البنزين بقت وحشة و ضعيفة و عند كوبرى اكتوبر بقت كل دوسة بنزين بتخللى العربية ابطاء مما هى علية و بتتكتم... من بعد اكتوبر لحد المنصة العربية مش قادة تزود عن 40 كيلو فى الساعة

اول ما دخلت يمين بعد المنصة العربية مكانتش قادرة تكلع المطلع اساسا حتى على الاول فا ركنت... نزلت راجعت البوبينة و سلوك البوجيهات كلة تمام و فيه شرارة قوية... العربية دايرة سلانسية و مبرجلة جامد و لما تفك فيشة اى رشاش و هى دايرة مبيحصلش اى تغيير... تكبس دواسة البنزين للارض الRPM مبيزيدش عن 2500

شوية و العربية بطلت و مرضيتش تدور... فكيت خرطوم البنزين من الفلتر و دورت مفيش بنزين طلع من الفلتر خالص فا عرفت ان الطلمبة مش شغالة.. طبعا كنت عايز افك الطلمبة و اشوف فيها ايه او ممكن يتعمل معاها عشان تشتغل فا نزلت امى و خالتى و ركبتهم تاكسى عشان يروحوا

فكيت الطلمبة و طلعتها و خبطت عليها و ركبتها تانى ولا حياه لمان تنادى... القصة بقى انا مش عارف هل دة عيبطلمبة ولا فى الكهربا اللى راية للطلمبة علما بانى بصيت على فيوز الطلمبة و ركبتلها كتاوت تانى غير بتاعها و برضة نفس الوضع فا كان لازم اكلم حد بيفهم فى الكهربا ياكد ان العيب من الطلمبة ولا لا عشان مشتريش واحدة على الفاضى خصوصا ان الطلمبة من الحاجات اللى مينفعش ترجع بعد ما تتركب

كلمت طارق فى التليفون و دى كانت المكالمة:

ممدوح: ايوة يا طارق... انت قريب من مدينة نصر ولا بعيد؟
طارق: لا انا بعيد... بتسال ليه؟
ممدوح: اصل طلمبة البنزين قطعت انا عطلان عند نادى الزهور و مش عارف ده عيب طلمبة ولا عيب كهربا
طارق: طيب اقفل وانا جايلك
ممدوح: لا خلاص مش مشكلة انا هتصرف
طارق: اقفل وانا جايلك
ممدوح: يا سيدى خلاص انا هشوف هعمل ايه و هصرف نفسى
طارق: اقفل وانا جايلك
ممدوح: يا عم اتكل انت على الله انا هصرف نفسى و احل المشكلة
طارق: اقفل وانا جايلك
ممدوح: ماشى

بعد تلت ساعة كان طارق عندى فعلا و بداء يراجع على الكهربا و عمل توصيلة مباشرة من الكتاوت و برضة الطلمبة مش شغالة... راح طارق فتح شنطة عربيتة عشان نجرب بيها و كنت بحاول اركبها بس كنت مرهق و طالع عينى فا قالى سيب كل حاجة و انا هركبها

انا اساسا من الساعة 10 الصبح فى مشاوير من وسط البلد للرحاب لمدينة نصر للسيدة نفيسة عشان صلاه الغائب و الدفنة و كنت راجع مدينة نصر اروح خالتى و اكمل على الرحاب اروح امى و الكلام دة كان الساعة 3 و نص ظهرا و اليوم دة كان حر و تراب بشكل فظيع و انا مكنتش طايق نفسى ولا طايق العربية بعد الحركة دى

المهم طارق تعامل و ركب الطلمبة بتاعتة و وصل الخراطيم و الفيش و جربنا و العربية دارت و رجعت ظبطت نفسها... قولت كدة تمام يبقى الواحد يشترى طلمبة و يركبها... بس افتكرت ان النهاردة الاحد و كل الناس قافلة فا طارق قاللى خللى الطلمبة معاك لحد ما تبقى تشترى طلمبة و لو الدنيا مزنقة معاك خلليك ماشى بيها لحد ما تبقى تشترى طلمبة فى اى وقت

طبعا انا معرفتش اقولة ايه الصراحة يعنى الراجل كان فى مشوار بعيد عنى و جالى مخصوص و كشف على العربية و ركب الطلمبة و كمان سيابها ليا لحد ما ابقى اشترى طلمبة و كمان اخد طلمبتى القديمة عشان يفككها بمعرفتة عشان لو نويت اجيبلها موتور مستقبلا و استخدمها مرة تانية

حتى بعد دة مرضاش يمشى الا لما طلعت جربت العربية و اطمن ان الطلمبة شغالة تمام فى المشى و السحب و مفيش اى مشاكل منها و حلفنى لما اروح اتصل بية اطمنة انى وصلت

بعد الموقف دة احب اقول ان لو حد فتح القاموس على صفحة "الرجولة" هيلاقى صورة طارق فى اول الصفحة من فوق... الف الف شكر ليك يا طارق على الموقف دة و ربنا يجعلة فى ميزان حسناتك

MMamdouh