مع السلامة يارجولة ...!!!

**abogogo** · 09-04-2013 12:54 AM

انا مش بتابع التليفزيون إلا قليل ... احياناً لما اكون زهقان بمسك الريموت وافضل احول بين القنوات كل قناة بتاخد دقيقة واقلب حتى اجد شيئ يشدني اتفرج عليه وغالباً بيكون في إما ناشيونال جغرافيك ابو ظبي او الجزيرة الوثائقية ... المهم اثناء التقليب تلاحظ لي كم الاعلانات عن المنشطات الذكورية للرجال ...!! اشكال وانواع إيشي حبوب , كبسولات , اسبري , عسل , خلطات سرية , اجهزة , حجر جهنم , حمص , دندورما , حبشتكنات ..... إلخ وإيشي علبة ذهبية وعلبه حمراء وعلبة زرقاء وعلبه خضراء او قرطاس او كيس ...إلخ واعلانات مستفذة ورخمة ولازم تحتوي على اغاني هابطة او إحائات سافله ...!!!

أيضاً انا شغلي في وسط البلد وبستخدم المترو طبعاً لأستحالة استخدام العربية عشان مشاكل السير والركنة هناك فتلاحظ لي انتشار الباعة الجائلين اللى بيبيعوا الكلام الفاضي ده على الرصيف ...!!! اللى أكيد كلها حاجات مضروبة ومصنوعة تحت بير السلم ....!!!

ايضاً اصبحت الحاجات دي تقدم كبقشيش للموظفين والصنيعية ...!!! وللأسف اصبح الموضوع كارثي خصوصاً لما تسمع وتلاقي عريس شاب يافع بياخد الكلام الفاضي ده ...!!!

كنت بجيب ادوية من صيدلية جاري وصديقي فتطرق الكلام لهذه الاشياء المنهمره علينا مؤخراً وكانت الصدمة لي حينما قال انها اكثر الاشياء رواجاً في الصيدلية ....!!!
مما سبق نستنتج انه طالما اصبحت لهذه الاشياء سوق منتشر ورواج بهذا الشكل الفج

يبقى للأسف مع السلامة يارجولة
ملحوظة : الموضوع للمناقشة الهادفة فقط .. وأسف اذا كنت خدشت حياء احد ولكن للأسف هذا هو الواقع ولا حياء في العلم ... تحياتي

**Y a r i s** · 09-04-2013 01:28 AM

لاياعم انتا كده خدشت حيائي وخربشتوا هههههههه

حبيبي يا عم ابوجووو ... هو بص. ياباشا ... العملية دي بالذات بتفرق من شخص لشخص وبيئثر عليها تالت عوامل مهمييين :

١- نوع التغذيه السليمة : وطبعاً مع الاسف الشعب المصري بل العربي كلوا مبيتغذاش كويس واغلب اكلو فاست فوود على حاجة ساقعة

٢- العومال والظروف المحيطة : طبعاً ده باب يطول شرحو بيشمل الحالة الاقتصادية للبيت الوضع السياسي للبلد وصوت الازعاج المحيط حوليك حتى لو انتا متعود على الزحمة. والدوشه .... حتى درجات الحرارة. بتؤثر. واديك شايف اهو كل يوم مره برد ومره حر والواحد مش عارف يصيف ولا يشتي :)

٣- النقطة التالته والمهمة : هي حسن المرأة تصور تنام وتغمض عينك وتستيقظ على صورة غورلا نايمه الي جوارك ... الخضة دي لوحدها كفيلة انها تقطع الخلف ههههههه :)

التالت عوامل دول. ادوا لضعف. كبيرررر لدى كتير من الشباب ... ده غير. الحبوب الي بيبلبعوها. في الجيم وتلاقي كل واحد نافخلي عضلاتوا بشكل مقزز بس وقت الجد مفيش خالص ليييه لانوا. عود جسموا انوا لازم ياكول علشان يحرق. عود جسموا على المنشطات علشان يعرف يتمرن. واصبح اي منشط بالنسبة ليه هو زي البانزين للعربية الي من غيروا متقدرش العربية تتحرك .

بس لو راجعنا الطب العربي او الشعبي. وبالذات طب الاعشاب. هنلاقي انوا بشوية حجات بسيطة ورخيصة. هيا مقويات طبيعية بس زي ماذكرت ان الثقافة الغذائية صفررررر .... لذلك يا ابوجو يا عزيزي كترت الادوية. دي في السوووق ومكتريتش من فراغ. لان مفيش دخان من غير ناااار ... وهذا ان دل فبيدل على ان باي باي يا رجولة .

وتحياتي

**ahmed** · 09-04-2013 04:58 AM

اى حاجه بتكسب وبتجييب فلوس الناس دلوقتى بتبيعها ربنا يسترها على البلد وعلى الناس

**alexaway** · 09-04-2013 05:46 AM

دا راجع اننا معندناش ثقافة جنسية
للاسف اللي بيشتري الحاجات دي مفكر انها حتخليه حاجة زي طرزان ولا عنتر ابن شداد , دا بالاضافة انه عنده اعتقاد خاطئ ان الشريك الاخر يبحث عن الفحولة في الجنس .

**micromoud** · 09-04-2013 06:07 AM

السبب الرئيسى لانتشار الادويه دى ياباشا هى وأدوية التخسيس وزرع الشعر ان فى ناس كتييييييييييييييييييييييي يييير بتجرى ورا الوهم ومستعدين يدفعوا اللى فى جيبهم كله عشان متعتهم الشخصية ولا انه يقل فى يوم فى نظر نفسه ولا انه يروح لدكتور عشان يكتبله على علاج .... والانتشار وسط الشباب اسبابه نفسيه يعنى الشاب لما يكون بياكله مرتين فى اليوم وبيشتغل 10 ساعات اكيد مش هيبقى زى ابهاتنا اللى كانوا بيشتغلوا كام ساعه ويزوغوا دا غير الاحباط المنتشر فى كل حياتنا واكلنا وشربنا فمشكله الشباب نفسيه دا غير موضة الافلام اياها اللى الشباب بيعتقد انه المفروض ان دا الطبيعى بتاع البنى ادمين فكتير بيروح يشترى الحجات دى فى البدايه عشان هو فاكر ان الحجات دى هتخليه زى بتوع الافلام لغايه ماللاسف بيتعود عليها ويخاف انه يسيبها ... منهم لله بتوع الاعلانات مطلعين الرجاله اشى خروف واشى بطه :(

**aldesha989** · 09-04-2013 06:46 AM

اسباب انتشار الحاجات دى او الحاجات دى سبب ان الشباب بتأخدها انهم ماعندهمش ثقه فى نفسهم ماعندهمش ثقافه جنسيه ماعندهمش فكره عن الشريك بيكون طلباته ايه وللاسف كل واحد فيهم بيتكسف
يقول للتانى هو نفسه فى ايه او عايز ايه مع انهم الاتنين خلاص بقى واحد والمفروض ماحدش يتكسف

بس المشكلة ان لو الست وضحت هى عايزه ايه الزوج فى الجتمع الشرقى ممكن يفهمها غلط
ولو الزوج صرح هو عايز ايه ممكن الزوجه تتكسف تخاف ما ترضاش تفتكر انه كان مقطع السمكه وديلها قبل الزواج مع انه ممكن ما يكنش كده تمامآ

دى كلها اسباب انتشار القرف ده مع ان الشباب اللى بيأخد الحاجات دى للاسف بيبوظ نفسه بدرى بدرى انا لسه ما اتجوزتش ومش هأخد حاجه زى دى ولو فى حاجه لا قدر الله هعرف سببها ايه واحلها نفسيآ
لانى ما اعتقدتش ان شاب عايز يتجوز وهيطلع عنده حاجه لا قدر الله الا نفسيه

وربنا يبعد الحاجات دى عنا وعنكم

**ahmedteam** · 09-04-2013 11:12 AM

و زى ما قال جدى الشاب اللى اتنفخ مره .........................

**yousef1978** · 09-04-2013 11:52 AM

هو العالم كله دلوقتي بيلهث وراء المتعة المؤقتة بغض النظر عن الآثار المستقبلية

إحييني النهاردة وموتني بكره - هو ده السعار العالمي

شعار استهلاكي استمتاعي بدرجة إمتياز وبحث مستمر عن استمرار الاستمتاع والتلذذ وما ننساش إن ( المتعة الفردية ) و ( الحقوق الشخصية ) إحدة مبادئ الحضارة الأمريكية ( دي مش إهانة دي فعلا مبادئ وضعوها لصناعة حضارة قوية لديهم )

ده غير إن المرأة في مصر من كثرة المسؤليات والمعاناة أصبح وجهها وجسمها تظهر عليه آثار التعب والإرهاق وذهبت عنه النضارة ( حلاوة البنت البلدي ) ودي مسؤلية الرجل والحكومة الصراحة

لازم الستات يرتاحوا شوية ونبطل نحملهم فوق طاقتهم سواء في المواصلات أو العمل أو الدراسة أو في البيت

ولازم ناخد قرار جرييييييييييئ بالهجرة من الأماكن المزدحمة اللي كلها غبار وعشوائيات وجو مدمر من كل ناحية

.

**bobbozo4b** · 09-04-2013 12:43 PM

فعلا موضوع الاعلانات ده مستفذ جدا جدا
بصراحه انا بغيير المحطه لما اشوف اى اعلان من دول
هاضيف بعض الاسباب لانتشار الموضوع ده
رقم 1 عدم وجود الرقابه سواء وزارة الاعلام او جهاز رقابى على الاعلانات
رقم 2 تنافس القنوات على جلب الاعلانات باسعار مغرية مهما كان محتواها
رقم 3 طبعا مافيش اى موافقه على المنتج من اى جهه او وزارة الصحة
رقم 4 كتر الزن يدوش

للعلم ياجماعة ان شاء الله فى القريب العاجل هايتم الموافقة على قانون نقابة للاعلانيين وهايكون فيها جهاز رقابى على الاعلانات والقنوات الفضائية
بس المشكلة كلها تكمن فى عدم خضوع بعض القنوات لقوانين البلد