سؤال لأهل الخبره فى الاوتوماتك

**kemo678** · 09-04-2013 12:34 PM

من فضلكم اهل االخبره فى السيارات كنت عايز اشترى عربيه حديثه اتوماتك وناس كتير بتخوفنى من السيارات الاوتوماتك بأنها لو حصل عطل فى السياره وانت واقف فى اشاره او على كوبرى او فى نص الشارع مش هتعرف تزقها وتركنها على جنب على ماتجيب ميكانيكى او كهربائى يحل المشكله .
هل الكلام ده صحيح ؟؟؟ يعنى لو حصل عطل والعربيه ساده الشارع او فى نص الطريق مش هعرف أزقها على جنب واحركها من مكانه ؟؟؟؟ أنا عايز ازقها عشان اركنها على جنب بس مش عشان تدور زق .... السبب ده الوحيد إللى مخلينى اغير رأيى واقول خلينى فى عربيتى المانوال .......... وشكرا لحضراتكم

**HeMa_LanCeR** · 09-04-2013 12:47 PM

مين قالك كده
طبعا يتتزق عادي جدا
وممكن تتجر كمان بس مش لمسافة كبيرة ولا بسرعة كبيرة
بس عادي لو عطلت تزقها تركنها علي جنب
بس طبعا مينفعش تدور زق

**mamo1700** · 09-04-2013 12:51 PM

اولا العربيات اوتوماتيك جميله جدا في السواقه وتاني حاجه العربيه تتحرك عادي جدا بس تكون علي d بس مش هتدور بالزق لوعايز تجيب اوتوماتيك تكشف كويس علي الفتيس وتغيرله الزيت كل لما يحتاج يتغير وانسي بعد كده وحط ايد علي الدركسين والتاني علي الشباك

**kemo678** · 09-04-2013 12:57 PM

الف شكر اخوتى الافاضل على الرد السريع وربنا يطمنكم يارب ويبارك لكم فى سياراتكم

**mem** · 09-04-2013 04:26 PM

عادى حضرتك ممكن تزقها لا يوجد اى مشكلات
ياما العربيه عطلت منى وزقتها وقطرتها كمان
ولا يوجد اى مشاكل

**muslim_nsb** · 09-04-2013 05:15 PM

طيب هو الواحد المفروض يزقها وهي على d ولا على المور n برجاء الرد للأهميه

**M.ABDOU** · 09-04-2013 09:29 PM

لا الخوف من ناحيه الزق بس فعاادى تقدر حضرتك تزقها عاادى جدا جيبها على ال n وزقها عادى اما بخصوص انك مش حتعرف تزقها علشان تدورها لو البطاريه نامت فده احتماال ضئيل جدااا وحله بسيط اشترى كابل بطاريه واحتفظ بيه فى شنطه عربيتك واى حد يعملك توصيله وتدورها

**د.أبونضال** · 09-04-2013 10:00 PM

عربيتي اوتوماتيك ومرة عطلت وشديتها عادي لكن كنت حاطط الفتيس على ال n
المشكلة الوحيدة اللي بتقلق الناس من الأوتوماتيك هي إنه لو البطارية ضعيفة ما بيدورش زق وده الناس بيعتبروه عيب .. ده طبعا بالإضافة لارتفاع تكلفة إصلاح الفتيس ... نصيحة أخوية لو هتجيب أوتوماتيك خليك في الياباني أو الألماني

**kemo678** · 10-04-2013 01:15 AM

شكرا لكم جميعا احبائى الاعزاء على هذه الردود الوافيه ولكم منى جميعا كل حب وتقدير

**hany63** · 10-04-2013 10:48 AM

ياراجل اتكل على الله هو فيه اريح من الاوتوماتيك
اولا موضوع البطاريه ده احتماله لو حصل مره كل سنتين و ببساطه اقفل العربيه تاني و هات اي كهربائي يدورهالك بتوصيله و اطلع في ساعتها ركب بطاريه جديده و انسي ان الاوتوماتيك تبطل في وسط الشارع اساسا
و اللي بيقول ان المانيوال احسن مع احترامي الكلام ده كان لما لسه الاوتو نازل جديد في التمانينات يعني كلام فلكلور