كوتش بردجيستون 17 - 215/45 ( gr-90 ) للسيراتو تجربة كاملة بالصور $$

**hmotors** · 09-04-2013 11:57 PM

اولاً احب اشكر مجهود كل الأعضاء فى تقييم الكوتش فى مواضيع سابقة وخصوصاً للسيراتو ونقل تجاربهم بشكل رائع وده كان ليه دور كبير فى التجربة بتاعتى وقرارى علشان اغير الكوتش الى كان راكب عندى فى العربية كومهو 17 - 215/45 ( Solus ) ماشي 50,0000 كم فى مدة 3 سنوات.

حالة الكوتش قبل التغيير مع العلم نمط القيادة طبيعى جدا داخل المدينة وعلى الطرق السريعة:
- الحمد لله مفيش اى بلالين جانبية وله بلونه

- الكوتش متمسحش جامد بس كان فى نسبة تأكل طبيعية
- بعد ال 45,000 كم بدأ صوت الكوتش يكون مرتفع جدا بطريقة ملحوظة غسالة بالظبط
- كمان صوت ون و ترزيع وعومان، وكمان تحس بالظبط كان حد بيجرى حافى على الأسفلت

حسيت انى لازم انقذ العربية من الهلاك، فعلاً الموضوع بقه غريب حاجة مش طبيعية وكمان مع انه مفيش بلالين بس فى مفاجأة ظهور شروخ عميقة من الجنب حقيقى مفيش اى مطب يعمل كده وكمان مدخلتش فى اى رصيف او حكيت، قولت يمكن من المشى على سرعة مدة كبيرة.

المهم مش عايز اطول اكتر من كده، نكمل الخطة الى تم تفيذها

تم الأستقرار على اختيار الكوتش بعد شهرين و بحث وقريت تجارب على مواقع كتيير،
----------------------
بشكل نهائى بردجيستون 17 - 215/45 ( GR-90 ) يابانى
.(91W - Temperature (A) Traction (A

طيب ضرورى نوضح ليه اخترت الموديل ده تحديداً، ببساطه عايز قيادة هادئة جدا ونعومة على الطريق وثبات معقول بس اهم حاجة مش عايز صوووت

خاااالص خاااالص وده تصنيف الكوتش على رسم بيانى توضيحى:

تقييم للكوتش من مجموعة مستخدمين

و دى صورة هتوضح الكوتش القديم على الشمال والجديد على اليمين

مميزات الكوتش والتجربة 100 كم بس حتى الأن (نيتروجين) ضغط 32
ماشاء الله ممتازة جداًجداً

(التفاصيل)
- النعومة على الطريق ممتازة
- الصوت على السرعات والمطبات اكثر من ممتاز
- المطبات اختلاف كبير والترزيع مفيش
- الفرامل فى تحسن بنسبة كويسة بس مش الفرق الكبير اوى
- الثبات ممتاز فى فرق ملحوظ بالمقارنة مع الكوتش القديم
- توفير استهلاك البنزين لسه تحت الأختبار
- النقشه عاديه مش حاجة جامدة بس مش مهم عندى
- البناء الخارجى للكوتش فى فكرة ممتاز من حافة الجنط، الكوتش بشفة للحماية هى موجودة فى شركات كوتش تانية بس الطريقة فى 17- gr90 ممتازة مش حاده.

العيوب (السعر قاتل)

خالص تحياتى للجميع ، ويارب يكون الموضوع مفيد. وكل سنة وحضرتكم طيبين بمناسبة عيد المنتدى

.
.

**excel_team2000** · 10-04-2013 12:04 AM

ألف مبروك ياباشا فعلا احساس الكاوتش الجديد مختلف بالذات فى الطارة حصل معايا لما غيرت و جبت يوكوهاما يابانى 215/45/17 الفردة ب 930 جنيه بس للأسف الطريق الزراعى ملهوش حل فغيرت الجنوط ل 15 و جبت كاوتش دانلوب 195/65/15 وطبعا الفرق كبير فى الراحة و النعومة

**M7amD_7amDy** · 10-04-2013 12:14 AM

الف مبروك ياباشا

والتقرير ممتاز بس ناقص السعر القاتل :))

**hmotors** · 10-04-2013 12:51 AM

المشاركة الأصلية كتبت بواسطة M7amD_7amDy

الف مبروك ياباشا

والتقرير ممتاز بس ناقص السعر القاتل :))

الله يبارك فى حضرتك، ده من ذوقك.
1445

**S O P H O S** · 10-04-2013 04:35 AM

الف مبروك يا باشا ربنا يبارك
فعلا السعر قاتل بصراحة ..

**Mohab555** · 11-04-2013 08:46 PM

بص الغالى تمنه فيه مفيش كلام و عمر ما فرده بردجستون هتنافسها فرده كومهو !! استحاله بكل المعانى
اختيار ممتاز و التورنزا فرده من احسن فرد الكاوتش الى انتجت فى تاريخ بردجستون علشان بتجمع بين الهدوء القاتل و الاداء القوى ...