نصر ١٢٧ للبيع مو ٨٣ - أول يد
شباب المنتدى الأعزاء، أنا عندي عربية ١٢٧ موديل ٨٣، كانت بتاعة والدتي من الزيرو و لما توفت (رحمها الله ) انتقلت إلى أختي و هي معنا لحد دلوقتي و لكن لا نستخدمها ، و للأسف مركونة بقالها مدة محتفظين بيها فقط عشان الذكرى لكن المشكلة انها بتكلفنا مصاريف حتى و هي واقفة (تنضيف كل فترة عشان ركنة الشارع و شوية و البطارية باظت و غيرناها و حاجات كدة ) ، فقررنا نبيعها
و ها هي مواصفاتها لو حد كان مهتم :
الماركة : نصر
الموديل : ١٢٧ أربعة باب ، ١٩٨٣
الدهان : رشة خارجي و فبريكة دواخل بالكامل (الحمد لله مفيش ولا حادثة ولا خبطة جامدة يعني الرش كان عشان الشكل أو نضافة زي ما بيقولوا)
عدد الكيلومترات : العداد قلب قبل كدة مرة يعني معدية ١٠٠ ألف
حالة الموتور : حالة جيدة ، و معملش عمرة قبل كدة يدوب طقم شنبر من حوالي أربع سنين و يمشي شوية تاني كويسين كمان حسب الإستعمال .
حالة الصالون : حالة جيدة ، متغيرش فيه حاجة قبل كدة و طول عمره بنركب عليه فرش خارجي ، يتشال و يتحط غيره و خلاص
حالة الكاوتش : ٤ كاوتش Kumho جداد مامشيوش كام ألف على بعض
البطارية : لسة جديدة و في الضمان
أول يد ولا تاني .. : أول يد
الرخصة : تنتهي أخر ٢٠٠٩ (لسة سنة و شوية )
الحالة العامة : جيدة جداً و المعاينة هي الفيصل
أنا طالب فيها ١٧ ألف إن شاء الله
أنا قلت أعرضها هنا عشان اخواني في المنتدى لأني بصراحة مستخسر إن أي تاجر ياخدها و ينزل بيها السوق و بتاع ،
و لو في أي إستفسار اتفضلوا تحت أمركم عشان أنا حافظ كل مسمار في العربية دي إتشال امتى و فين و ازاي و إتركب غيره امتى و فين و ازاي ، أنا فاكرها من ساعة ما استلمتها والدتي بالاكياس الصفراء إلي كانت على الكراسي :).
لو حد مهتم يبعتلي على الخاص و أبعتله رقم تلفوني