الموضوع: الإزالة هي الحل .... ولننادي نيرون !

السلام عليكم


يا جماعة أنا شايف إن الحل لأزمة المرور وحوادثه ولشكل مصر بصفة عامة هو إقتراح ظريف جدا


يتم إنشاء وزارة جديدة وليكن إسمها ( وزارة الأملاك )

الوزارة دي تشمل مهندسين وقضاة وقوات شرطة محترفة


ويكون فيها على الأقل ثلاثة هيئات


1- هيئة إثبات الملكية

ودي دورها مساعدة المواطنين في تسجيل كل قطعة أرض أو مبنى أو وحدة سكنية في مصر وإثبات ملاكهم

تخيلوا لو أخذوا ألف جنيه فقط لكل وحدة سكنية يتم تسجيلها واحنا عندنا ما يقرب من 30 مليون وحدة سكنية أو أكتر - يعني 30 مليار جنيه تدخل خزينة الدولة

ده غير تسجيل الأراضي والعمارات والفلل وخلافه




2- هيئة نزع الملكية

ودي تاخد الطلبات من الوزارات المختلفة بتجهيز منطقة أو مخطط معين - فتقوم هذه الهيئة بالتنسيق مع ملاك هذه المناطق وتجهز برنامج زمني لهم لإخلاء أماكنهم وإزالة ما عليها من منشآت وتسليمها للوزارة التي تقدمت بالطلب لها




3- هيئة التعويضات

ودي بيكون عندها لوائح صارمة وخبراء هندسيون وإقتصاديون ومحاسبون وقضاه ودورهم تحديد التعويض المناسب لمن تم نزع ملكية أملاكهم - سواء كان تعويض نقدي فقط أو أراضي مناظرة بالإضافة لمبالغ نقدية أو أن يكون لهم أولوية في إختيار وتملك المناطق الجديدة




وأن تتوقف الحكومة عن توزيع أراضي المدن الجديدة على المواطنين وتكتفي بتوزيعها كتعويض على من فقدوا أملاكهم ويتم عمل مزادات لباقي الأراضي علشان تدخل دخل للدولة وعلشان تحتفظ هذه الأراضي بقيمتها لأن الأراضي لو وزعت وخلاص الناس هتستلمها وتنيمها ولا تبني عليها عمدان وخلاص وما حدش هيسكن المناطق الجديدة إلا لو اتعمرت وازدحمت شوية بالسكان - فلازم الحكومة تدفع الناس دفعا للنزوج للمناطق العمرانية الجديدة





وعن طريق نزع الملكية نقدر نوسع الشوارع ونقدر نزيل عشوائيات كتيرة ونستيبدلها بمناطق راقية ومنسقة جيدا ونقدر نوفر مساحات فاضية كتير أمام محطات المترو والأماكن العامة والحكومة تعمل منها أسواق للمواطنين الغلابة بدل الوقفة في الشوارع وتعمل منها براكن سيارات وفنادق ومصالح حكومية

غير تفريغ وخلخلة المناطق المزدحمة وده هيعيد توزيع السكان في المدن والقرى أيضا بحيث نتوسع افقيا وننشئ حياة أفضل



وكفاية بقى كباري خنقت الشوارع والفلوس اللي نصرفها على الكباري ندفعها تعويض للسكان والملاك ونهد شريط عمارات ونوسع الدنيا أفضل



حد يتخيل إنه علشان يتم توسعة طريق مصر اسيوط الزراعي ( طريق الموت ) فكل ما يعدوا على قرية يلاقوا نفسهم مزنوقين بين البيوت من الغرب والترعة من الشرق فيعملوا طريق دائري حول القرية

ده كلام يا جدعان - ما تهدوا يا عم البيوت اللي على الطريق خلينا نخلص بقى







الموافق على فكرتي يتفضل برفع يده - موافقة - إذا على بركة الله اللي يقدر يوصل الفكرة دي للأحزاب وخصوصا الحرية والعدالة أو لحد من الحكومة يبقى كتر خيره وإلى اللقاء في فكرة جديدة


أخوكم . يوسف أبو عمرو




ملحوظة : أرجو المشاركة بآرائكم في الاستطلاع .



.

ياباشا
قبل كل ده
انشاء مدن موازيه
تكون من الأول معمول حساب حارات الطوارئ والمواصلات والتوسعات المستقبليه
على ان تكون مدينه مثلا غرب كل محافظه
وطبعا الاسعار مش هتكلم فيها
بس بشرط ان اللي هيشتري يسكن
مواصلات من والى المدينه وياريت لو مترو مثلا
الزحام هيقل عن المدن الاصليه زي القاهره مثلا
وبعيدن نبدأ في توسعات الشوارع فيها اجباريا