من غير تعصب قبلي احمق نهي عنه الاسلام اللي هو دينا
من غير تحيز اعمي و تفرقه بين الناس و الجيران بل افراد العيله الواحده
من غير وجع قلب و حرق اعصاب و خناقات في الشوارع و المقاهي و تلفيات في ممتلكات الناس
من غير كل ده احب اناقش معهاكو كارثه الكوره المصريه
و احب اوضح اني مش اهلاوي او زملكاوي و مبحبش الكوره اساسا ولا تشكل لي اي اهتمام اللهم سوي معرفه النتيجه.
لسه كنت قاعد علي كافيه مع الاصدقاء و كان التلفزيون شغال كعادته في بث المعلومات المضلله الكاذبه (قناه مصري بس علي الدش) المهم و في خلال لحظات صمت بينا ركزت مع صوت المذيع و كان بيتكلم في برنامج تالك شو تقريبا المهم واحد من المتصلين كان بيتكلم في ايه بقي؟
بسلامته شايف ان ال art دوله داخل دوله و ان الحكومه لازم تتدخل و ان الاهلي نادي عظيم( العظمه لله ) و من حق جمهوره يتفرج........
و هنا جن جنوني المزمن علي الموضوع ده
البيه شايف ان الاشتراك غالي و ان الشعب المصري بشقيه الزمالكاويه و الاهلويه من حقهم انهم يتفرجو
يا اخي روح شوفلك شغلانه تأكل بيها عيالك
منطق مريض و مذيع اكتر مرضا
لأن بنفس المنطق نطلب من الحكومه تستولي علي توكيل bmw لأن اسعار عربياتهم غاليه و احنا عايزينها و امثله اخري كتير
و حاجه كمان احب اقولها لجمهور الاهلي:
انا مش مفتي ولا شيخ بس مقوله الاهلي فوق الجميع اللي جهابذه الاهلي طلعو علينا بيها و كأنها الخلطه السريه دي اظنها حرام في رأيي الشخصي لأن الله العظيم هو فوق الجميع و بلاش التكبر يوصل للمدي ده
و بعدين اهلي ولا زمالك بلا نيله بجد لا ده ولا ده جابولنا كاس العالم هما بس شويه انتصارات هزيله قصاد بعض علي المستوي المحلي و فضايح قصاد العالم
و مرتبات و فلوس و هدايا و ناس مش لاقيه علاج مرميين في المستشفيات الحكوميه مستنيين فرج الله
بجد يا جماعه في حاجات غايه في الحزن و البؤس و اللي مش مصدق يدخل اي مستشفي حكومي عام و يتجول جوه شويه(ده اساسا لو طاق ريحه العرق و المرض) و بعد كل ده ييجو للاعبين و يدوهم فلوس و هدايا و ده يصرف مكافأه بالالاف و التاني معرفش يعمل ايه طب و الناس اللي مش لاقيه حق التذكره و تتسوله او تستعطف الاطباء و التمريض انهم يتغاضو عن قطع التذكره و علاجهم بالمجان (عارفين بكام التذكره دي؟؟؟؟؟؟؟؟ بجنيه واحد فقط لاغير و في مستشفيات بجنيه و ربع!!!!!!!!!!!!!)
في نفس الوقت اللي بسمع و الناس بتسمع ان المدرب معرفش مين بياخد مرتب معرفش كام في اليوم نظير تدريبه لفريق الكوره و بعدين كوره ايه اللي الناس مقتنعه انها رياضه بيمارسها الشعب كله؟
دول 11 لاعب و ملايين بيتفرجو من امام شاشات التلفاز و اقصي حاجه ممكن تحصل للمشاهد هي ازمه قلبيه نتيجه التعصب او سرطانات نتيجه التدخين الشره او عاهه مستديمه نتيجه خناقه بين مشجعي الطرفين
و في الاخر تيجي تحسبها بالعقل انت استفدت ايه؟؟؟؟؟
حد خبط علي باب بيتك و اداك الف جنيه لأنك اكتر واحد نطيت من كرسيك و صوتك جلجل لما فريقك جاب جون؟؟
بالذمه ده كلام او دي اخلاق رياضيه
بغض النظر عن انتمائك الكروي شارك برأيك