الموضوع: طريقة فك تابلوة لانوس بالكامل ... بالتفاصيل والصور

المشاركة الأصلية كتبت بواسطة khaled lanos

الله يكرمك يارب
انا ناوي اعمل موضوع العزل بتاع التابلوه دا خصوصا اني لما اكون قافل الشبابيك ومشغل الكاسيت بضطر اعلي جامد لأن صوت المتور بيبقى مسمع جوا الصالون بغباء..بس بفكر أبدأ بعزل الأرضية اسهل..ايه رأيك؟
كمان بصراحة اللي معطلني عن موضوع عزل التابلوه دا نوع العزل غالي شوية 500 جنيه بصراحة..مفيش حاجة أرخص من كدا؟
تحياتي.

انا عايز اقولك ان العزل اللى انا عملتة دة معقول جدا فى كتم الصوت والحرارة

لكن فية اشد منة بمراحل اللى هو الصوف الصخرى

بس العقبة ان اقل تخانة منة لقيتها 3 سم
فدى هتبقى رخمة لما اجى اقفل كل حاجة تانى

لكن لو الزمن رجع بيا من اول وجديد
هعملة صوف صخرى لانى لما بدأت شغل كان هدفى انى اخلى مستوى العزل زى العربيات المرسيدس (يعنى مجرد ما تقفل الباب والزجاج تتعزل تماما عن العالم الخارجى)
على الاقل صدر العربية تحت التابلوة والارضية

بس لو هتعمل استنى لما ارفع باقى المواضيع عشان لسة فى حاجات بتتفك بعد التابلوة
وخلى بالك بيبقى فية شحن فريون تقريبا ب 150ج خارج التكلفة بتاعة العزل

الموضوع اخد منى تقريبا 3 ايام كاملة
الموضوع مش سهل يعنى

المشاركة الأصلية كتبت بواسطة Khaled Lanos

منا عشان كدا عايز أبدأ بعزل الأرضية الأول ايه رأيك؟
وفعلا نفسي أخلي اللانوس زي البي ام والمرسيديس كدا اول ما تخش جوا تحس انك في عالم تاني..يعني ركبت مع واحد معاه بي ام 320i الجديدة..ماشي 180-200 ولا حاسس انو بيجري اصلا ولا أصوات ولا أي حاجة ما شاء الله..لكن في اللانوس ابقى ماشي 120 والاقي اصوات من كل حتة وهواء معرفش جاي منين وتراب داخل..الخ..
بس كذا واحد قالي فعلا موضوع عزل الأرضية دا هيفرق جامد.
طب ايه المشكلة لما يكون العزل الصوف دا 3 ميللي؟ القطع بتاعة الطابلوه مش هتركب مرتاح مثلا؟
وبالنسبة للفريون بشحنو بنفسي ومش بيكلفني غير 82 جنيه.

بص يا معلم
الارما فليكس دة عامل زى الواح سفنج اسود تخانتهتا 12 مم يعنى لو ضغطت علية بيضغط
لكن الصوف الصخرى قابليتة للانضغاط قليلة جدا
ولما تيجى تجمع كل حاجة هتصارع وهتتقرف واحتمال حاجات تتكسر

فلما دورت على صوف ضخرى ملقيتش اقل من 3 سم فى التخانة
والاخ الفاضل اللى قالك اعزل الارضية انا التمس لية العذر فى تخمينة
لانة لم يخوض التجربة بنفسة

اول صوت واعلى صوت واكبر صوت بيدخل الكابينة هو صوت الموتور
ودة ما بيتعزلش غير من الصدر من تحت التابلوة لحد مستوى كرسى السائق واللى جنبة
المنطقة دى لو اتعزلت تمام التمام 70% من الصوت اللى بتسمعة جوة بيروح
المنطقة دى



ودة كان بداية العزل اللى انا عملتة ولزقت الارما فليكس بسيلكون حرارى




الباقى كلة بقة مقدور علية انك تعمل تتبع لاماكن دخول الهوا والتراب ...الخ الخ الخ بعد ما تخلص المنطقة دى (عشان هو دة التقيل)

بس فية سؤال بقى عندى ليك
ازاى بتشحن بتكلفة 82ج بس والانبوبة الصاج الكيلو فريون 134 جملة ب 100ج فى نجيب الريحانى
ولا انت بتشحن بفريون 12 من الانابيب الخضرا دى

المشاركة الأصلية كتبت بواسطة momen777

السلام عليكم ورحمة الله وبركاته

استاذ مصطفى

انا من محبي منتدى نايل موتورز جدا جدا وخصوصا اني استفدت منه كتيير في شراء عربيتي اللانوس
انا اشتركت فيه من 2009 وتركته (فترة كبيرة) نظرا لظروف الحياة والشغل

ولما رجعتله الايام دي .. وقريت مواضيعك (صفحة صفحة وتعليق تعليق) من غير كلل ولا ملل .. لانها

أولا : شيقة جدا
ثانيا : لاني من محبي الافكار والابتكارات الجديدة وخصوصا اللى اقدر اعمله بنفسي

مش عايز اوصفلك قمة انبهاري واعجابي باسلوبك في التفكير والشرح والتطوير سواء على المستوى الشخصي(رحلات الغطس و موضوع الفاترينا اللي بتلف دي) او على المستوى السياراتي اللي هو صلب مواضيع المنتدى
عربيتي حاليا بظبط فيها سمكرة ودوكو

لكن مش قادر اصبر لغاية ما تخلص عشان ابتدي اطبق افكار حضرتك الجبارة دي بالذات موضوع (تركيب اضاءة لدرج الطابلوه)

ومش عارف ابدأ منين ولا منين

انت فعلا اديتني جرأه جامدة

كل الشكر والتقدير لحضرتك

أخوك المحب: مؤمن

متابعك دايما .......

جزيل الشكر على زوقك واخلاقك العالية
والواحد فعلا مش لاقى كلام يشكرك بية