الموضوع: التقييم المبدئى لاداء السيارة الهيونداى ix35 موديل 2013 (تجهيزات الفئة الثانية)

تقييم اداء السيارة الهيونداى IX35 موديل 2013 (تجهيزات الفئة الثانية) :

-----

للامانة : التقييم دى عن مسافة 300كم، يعنى ممكن يكون انطباع مبدئى ، ومقارنة بين العربيات الركبتها قبل كدة، بس حبيت انقلة ليكم علشان فى ناس فى المنتدى حبة تتعرف على
العربية عن تجربة، بس بشكل عام العربية صفقة موفقة ومتزعلش على الفلوس
الدفعتها فيها.
الموصفات :
· نوع المحرك : GDIالسعة اللترية 1600 C Cبقوة 135 حصان.
· فئة السيارة : SUV" سيارة رياضية"

" SUV means "Sport Utility Vehicle"

· معدل استهلاك الوقود:
- نوع الوقود : 92
- استهلاك الوقود :
طبقاً لمواصفات السيارة ، الاستهلاك ( 7,5لتر/100كم ) داخل المدينة – (5,8لتر/100كم ) خارج
المدينة ، بمتوسط 6,4 لتر/100كم.
عملياً فى حدود(6,7 لتر/100كم)فى المتوسط ، مع تشغيل التكييف لمدة 70كم تقريباً- وطبعاً دى
تقريبى وهحسبة تانى بالضبط واخبركم.
التجهيزات (options):
كافية لحد كبير ، و من وجهة نظرى الشخصية هناك كماليات ناقصة و هناك كماليات كان ممكن الاستغناء عنها (طبعاً دة معتمدة على الوكيل – لانها موجودة فى كتالوج السيارة) - وعلى الرغم من أن سعر السيارة 205 الف جم (قبل الزيادة).
كماليات تنقص السيارة و كان يفضل وجودها : (من وجهة نظرى وطبقاً لحاجتى انا الشخصية
واعتيادى عليها)
1. عدم وجود خاصية قفل السنتر لوك ذاتي بعد التحرك بالسيارة والوصول لسرعة 20-40 كيلومثلاً ( اعتقد دى ابشن عادى دلوقتى )
2. عدم وجود بلوتوث ، علشان استخدام الموبيل- (موجود فى الفئة الهاى لاين فقط).
3. طى المرايات الجانبية موش من خلال الريموت.
4. عدم وجود وحدات رفع مع الريموت (لتامين وضمان اغلاق جميع زجاج السيارة).
5. عدم وجود اضاءة فى الاشارات الموجودة بالابواب الامامية والمفروض انها تنور لما يكون احد
الابواب الامامية مفتوح (موجودة منظر).

كماليات كان ممكن الاستغناء عنها ، والاستعاضة بها بكماليات اكثر استخداماً، خاصة فى مصر:
1. خاصية تسخين المقاعد الامامية والخلفية .
2. سخان الزجاج الخلفى .
3. الاضاءة النهارية (ightl Day time runnin) – ودى غير ال LED
والخاصية دى من شروط مواصفات السلامة الاوربية الاخيرة، حيث اشترطت ان نور السيارة الامامى والخلفى لازم يكون شغال صبح وليل( مفيش حاجة فى مفاتيح الاضاءة تسمح لك تطفى النور والسيارة شغالة )، ودى خاصية موجودة فى السيارات الحديثة ذات المنشاء الاوربى، زى الاسترا الجديدة وبعض موديلات ال بى ام.
عملياً محدش فى مصر طول ما انت ماشى ، الا بيشاور لك او بيوقفك علشان يقول لك النور والع.
السيارة من الداخل :
- تحس بالفخامة والرفاهية والحداثة فى التصميم والتجهيزات الداخلية للسيارة، بس التابلوة كان ناقصه شاشة عرض البيانات.
- لما ركبت عربية اخويا الاوكتفيا فنتازيا2012 بعد الIX35 فى نفس الوقت، حسيت ان صالون وتابلوة الفانتازيا كلاسيكى او نمطى شوية.
- نظام الصوت وتوزيع السماعات ممتاز.
- الكراسى مريحة ، والمسافة بين الكراسى الامامية والخلفية كافية.
- كابينة الركاب معزولة تماماً عن صوت المحرك او احتكاك الاطارات او اى مؤثرات خارجية ، (من الصعب انك تحدد لو كانت السيارة تعمل ام لا).
- الشنطة الخلفية واسعة، وخاصة فى حالة طى المقاعد الخلفية.
التكييف : (ممتاز)
- التكييف بة خاصية التحكم الثنائى فى درجة الحرارة( Dual zone & Cluter lonizer ، ودى بقلل شوية من الخناقات مع مراتك الدائما حرانة جداً، وانت انسان انانى.(بقول بيقلل موش بيمنع)
- التكييف ممتاز وصوتة موش مسموع ، وكافى جداً على الدرجات المنخفضة من سرعة المروحة او التبريد.
- وجود خاصية التبريد الموجودة فى درج التابلوة مفيدة.

السيارة من الخارج :
- الابعاد مناسبة، والتصميم عصرى ومميز، وملفت (روش)

تقييم اداء السيارة:
(افكركم ان تقييم الاداء عن فترة سير 300كم فقط ، وبسرعة لم تتجاوز ال100كم/ساعة)
- قيادة السيارة سلسة، واستجابةعجلة القيادة او الفتيس سلسة ومريحة جداً، والعربية عالية عن الارض بشكل جيد وموضوع السنسور الخلفى بيسهل كتير فى الركن، لان من غيرة اعتقد كانت الركنة ممكن تكون بتعويرة.
- والعربية ثابتة جداً على الارض ، على الرغم من ارتفاعها.
- استجابة العربية للسرعة ممتازة، والوصول لسرعة من 0 :100 سريعة (محسبتهاش بالضبط بس بتشد كويس)- طبعاً انا لسة مكملتش ال 1000كم الاولى، بالتالى معلتش بالسرعة عن 100كم/ساعة. بس جربت الشد و الاستجابة سريعة وعالية.
- الفرامل : ممتازة ولازم تتعود عليها، علشان حساسة جداً.
- العفشة: ممتازة وموش ناشفة وبتتعامل مع المطبات بحنية.
الاضاءة :
- الاضاءة جيدة، باستثناء خاصية الاضاءة النهارية ال عملة مشاكل مع امة لا الة الا الله.
- الفوجات الامامية (نور الشبورة) ضعيف ، ومتقدرش تعتمد علية مع النور الصغير (فى التيجو انا
ماكنتش بستخدم الا النور الصغير ونور الفوجات الامامية بس).

....

وفى الاخر دى انطباع مبدئى ، وممكن مع التجربة اكتر تتضح حاجات اكتر

بس انا مبسوط والحمد لله