محتاج مساعدة أهل الخبرة فى مشروع مغسلة سيارات بطنطا
السلام عليكم الاعضاء الكرام
أنا يا جماعة شاب مقيم بطنطا ونويت أفتح مشروع خاص بيا ان شاء الله وهو مغسلة سيارات ومحتاج أعرف إية المعدات المناسبة اللى لازم تكون موجودة وبردة مش عاوز أكلف المشروع أوى فى البداية لحد ما أشوف الأمور ماشية إزاى وربنا يكرم ويرزق
أنا بعد بحث اللى وصلتلة إن المعدات عبارة عن :
كمبروسر هواء سعة 200 لتر ايطالى - موتور مياه واحد حصان - ماكينة فوم صينى أو إيطالى - ومكنسة صينى 3 موتور بخرطوم إيطالى .بس مش عارف أسعار وإية الانواع الكويسة اللى متهلكش أو تبوظ بسرعة ؟
دا اللى قدرت أوصلة .
وفى معلومة عرفتها يس مش عارف يعنى اية أو مش فاهمها وهيا كالأتى :
لو مش عايز أجيب موتور مياه ممكن أجيب ماكينه مياه ضغط عالي ودي هتسهل عليا المواسير والموتور والمسدس ومتوافر منها الايطالي والالماني .
وكمان حاجة أخيرة المعدات أشتريها من شارع الجمهورية فى القاهرة ولا لاء لأنى شفت تعليق فى أحج المواقع بيقول إنهم نصايب والله اعلم .
ولو المعلومة غلط فين المكان الثقة اللى بيراعى ربنا أشترى منه .
وكمان إية المنتجات اللى أشتغل بيها يعنى إية هيا المنظفات اللى أستخدمها للغسيل من الداخل والخارج .
وإية رأيكم لو أضفت إكسسوارات سيارات بجانب المشروع - إية النصائح الخاصة ورأيكم يهمنى طبعا .
أنا فكرت ونويت وتوكلت على الله بس المشكلة انى معنديش خبرة كافيه فى الموضوع - للعلم أنا إستأجرت المكان خلاص وانا حاليا بجهز المكان .والمفروض الافتتاح أول الشهر
أتمنى حد يكون عنده خبرة يفيدنى فى الموضوع دة . شكرا ليكم وأسف إنى طولت
جزاكم الله كل خير
