الموضوع: ليه منبدأش بنفسنا !!!وعتاب اللي اعضاء المنتدي

المشاركة الأصلية كتبت بواسطة shnory

احنا ليه مستنيين لما الناس تعمل ونعمل زيهم
ليه احنا معملش والناس تعمل زينا
ليه احنا منعملش واللي عاوز يعمل يعمل واللي مش عاوز يعمل انشاله ما عمل
انا ححترم نفسي وححترم الناس وححترم طريقي وعربيتي وححترم القطه اللي واقفه بتاكل وحقفلها بعربيتي لحد ما تبعد ومش حعدي من فوقها
علشان الاحترام ده ادمان
لما بحترم نفسي بحس بنشوه بحس اني احسن من الناس كلها
علي الاقل لو الشعب كله مش محترم وجه واحد من بره مصر وقابلني حيقول اتعاملت مع واحد محترم هناك وابني حيكون محترم مش عاوزه دكتور ولا مهندس عاوزه قبل ما يكون معاه شهاده عاليه يكون محترم قدام نفسه
فينا ناس كتير اوي لسه بيفكروا بعقليه 200 سنه فاتو
العقليه اللي خلتنا منحفرش القناه غير بالسخره والكرباج
العقليه اللي خلتنا منبنيش مدارس وننور الشوارع ونعلم عليالنا لغات وحتي نكنس قدام بيوتنا غير لما الاستعمار اجبرنا علي كده
اللي عاوز يعيش بالكرباج يعيش والكرباج جايله قريب وممكن يكون علي ايد ظابط ياخد منه مخالفه او مسمار يخرمله فرده كاوتش وهو بيجري
او واحد غلبان بيعدي الشارع وتروح تدفع 55 جنيه غرامه الراجل اللي موتته
وانت فرحان انها ب55 جنيه وحتقول ايه يعني 55 جنيه دا انا بروح اكل بيهم عند مؤمن وممكن برضه تقعد بيهم علي القهوه بس فيه حاجه احنا ناسينها
الضمير راح فين
حتعرف تنام حتعرف تاكل حتقدر تركب العربيه اللي موتت الراجل ده تاني
وفيه حاجه تانيه
ممكن الراجل ده يكون انت نزلت من عربيتك وواحد بيجري ويدفع فيك 55 جنيه
اهلك ربوك وعلموك وعملوا كل ده علشان ياخدوا 55 جنيه بدالك يعني الواحد ينزل ب220 جنيه ويقتله 4 علشان عدوا الشارع غلط ومعاليه بيجري بعربيته في عزبه الباشا
برضه احنا لسه مستنيين الحكومه لما تعمل
ولما الحكومه بتعمل بنسب ونلعن فيها ومش عاجبنا
احنا عاملين زي الطوبه اللي عيل رابطها في دوباره وعمال يلفها
العيل هو الحكومه والدوباره هي القانون
لو الخيط انقطع بننطلق بهمجيه والله اعلم الطوبه حتقع فين
وبنفضل طول عمرنا عاوزين نقطعها ولما تتقطع وتقع بنعيط وبنندم وبنقول لو الزمن يرجع 5 دقايق مكانش حصل اللي حصل
متبصوش للسعوديه ولا لامريكا ولا تستنوا ان الحكومه تيجوا تضربكوا علي ايدكم وتقولكم عيب يا ولاد كده
انا معاكم للاخر ويا حسكت ومش حفتح بقي ومش حتكلم في الموضوع ده تاني يا حكمل للاخر وبرضه ححترم نفسي وحمشي بعربيتي براحه اوي اتفرج علي اللي كان بيجري واللي كان بياخد غرزه واللي واللي واللي وححترم نفسي علشان انا بحب احس اني محترم قبل ما الناس تعرف اني محترم

حضرتك عندك حق في كلامك وانا فعلا بيني وبين نفسي بحاول اطبق الكلام ده بس احيانا وغصب عني الشيطان بيلعب بدماغي واقول مش هاعدي اللي عمال يعمل غرز ده واقول لأ انا اللي اعدي الاول او بكون في مود وحش وغصب عني اغلس علي حد في طريقي بس هو مبيكونش برئ يعني وانا بغلس من الباب للطاق كده
بس ارجع افوق لنفسي واقول لأ احترمي نفسك وفوقي انتي الخسرانة في الاول والاخر وبلاش بلطجة وهمجية ابدئي بنفسك واعملي ده واللي عايز يجري يجري واللي عايز يغرز يغرز سيبيه يعدي اكيد تهوره ده هايوديه ورا مش هايفضل كده علي طول يعني مسيره يخبط ولا عربيته يحصلها حاجة تخليه يتربي ويبطل بلطجة.
عارفين احنا مشكلتنا اننا بنبقي عايزين نعمل الحاجة الكويسة عشان الناس تبقي كويسة معانا وبس لكن لو حطينا في دماغنا اننا نعمل ده ابتغاء مرضاة الله ويتحرقوا الناس حتى لو هما كلهم بايزين
اهم حاجة انا بيني وبين ربنا كويسة وقدام نفسي محترمة ومنتظرش من الناس انها تبقي كويسة زيي واحتسب الأجر والثواب عند الله وهو هايعوضني فعلا حتى لو اتخبطت من واحد متهور مش بيراعي ربنا في طريقة ربنا وقتها هايخفف عليا خبطتي ومتكلفنيش اي حاجة وهو يمكن عربيته تتدمر او يكون اصلا صاجها ضعيف ويتكلف اضعاف اضعاف تصليح عربيتي بلاش ننتظر العدل من اي حد تاني غير ربنا عشان هو العادل (بإضافة الالف واللام تبقي صفة العدل مطلقة فيه) مش مؤقتة زي بعض الناس ساعات تبقي عادلة وساعات تبقي ظالمة.
ياجماعة فعلا كل واحد يحاول يلتزم بنفسه علي قد مايقدر ومش عيب ابدا لو نجحنا مرة وفشلنا مرة مش وحش ابدا
التغيير مبيحصلش مرة واحدة ولا في يوم وليلة يعني ، بس الاجتهاد لوحده انت بتاخد عليه ثواب لإن ربنا بيجازي علي النيات مش النتايج وكلنا فاهمين كده طبعا.
واكيد محدش بيبقي نازل من بيته غاوي يأذي في خلق الله بس ضغوط الحياة والشارع اللي بنشوفها هي اللي بتولد العنف اللي جوانا ده.
بس برده الدين امرنا بالهدوء وضبط النفس وادانا طرق كتيرة وتدريجية عشان نمنع نفسنا من النرفزة والعصبية بتبدأ من الاستعاذة من الشيطان الرجيم ودي فعلا بتجيب نتيجة لإن اول مالواحد بيتنرفز الشيطان بييجي يقعد قدامه ويبقي كل وظيفته انه يسخر غضبه ده ويوصله لأي اذي للنفس او للغير فلو استعذنا بالله خلاص ممكن الموقف يتلم في لحظة

فمعلش الموضوع اينعم مش سهل بس مش مستحيل
وبالنسبة لدور الحكومة بلاش نتخيل الحياة وردية حتى لو الحكومة معملتش دورها كما يجب بس اهم بيحاولوا برده وادينا شوفنا شوية التزام برده اينعم قليل بس اهو حاجة علي الماشي بعد قانون المرور الجديد يارب بس يكملوا هما علي كده وصدقوني مع اول تطبيق لعقوبة الحبس علي حد الناس المؤذية دي هاتتلم وتحترم نفسها (وفعلا اللي مستني كرباج هايجيله). بس احنا كناس مثقفين ومتعلمين ومتدينين لازم نلتزم من نفسنا الانسان رقيب نفسه مش لازم حد يقف على دماغنا وماسكلنا العصاية يعني.
انا عن نفسي بلتزم بالحزام مثلا لوحدي وبقي سلوك فيا مبقاش بس عشان المخالفة لأ لاني عرفت اهميته من المواقف الناس اللي حكتهالي عن الاهمال في ربطه يعني امان لنفسي قبل اي شئ وبرده مبحاولش اجري ولا اغير حارتي الا لما الاقي الحارة اللي انا فيها اتعطلت تماما ووقفت تماما يعني مش عشان اتزحمت شوية اقوم اغير حارتي وارجع الاقي حارتي سلكت فرجع ليها تاني واقعد اتنطط بقي في الطريق مفيهاش حاجة اتأخر شوية بس مغضبش ربنا واخسر نفسي ولا عربيتي عشان ثانية ولا دقيقة ولما بعمل كده بدي اشارة برده وفي ناس برده بتعمل كده حتى بعض سواقين الميكروباص تخيلوا بقي اني شوفتها بعيني(اينعم هو كشافه كان مكسور ولمبة الاشارة منورة بالعافية بس اهو اجتهد برده يشكر يعني ) حتى اللي بيزنق عليا برده بحاول اعديه علي قد ماقدر مع انه ممكن يعملها بطريقة مستفزة بس ربنا موجود وهو هايعوضني خير علي صبري ده.
من يومين كنت سايقة ولاحظت تاكسي سلوكه مش طبيعي بيغرز بهبل كده ومصمم يزنق نفسه في اماكن ضيقة قلت بس ده شكله غبي تجنبيه تماما وفعلا لما جه جنبي سبته يعدي لاني حسيت ان سلوكه متهور مع اللي جنبي وعمال يغرز مع اتوبيس كمان مفيش لحظة سمعت صوت خبطة تقريبا لاقيته خبط عربية يإما قدامه يإما عربية كانت ركنة علي الرصيف فالتزنيق والتغريز ده له اخر وربنا موجود ومنتقم بس بلاش انت اللي تنفذ الانتقام يعني لانك هاتخسر برده حتى لو عربيتك مخبوطة ليه تشوه منظرها زيادة يعني.
احيانا اكون ماشية والاقي ناس عايزة تقطع الطريق عشان تدخل شارع جانبي هما يقفوا عشان يعدوني وانا برده اقف عشان اعديهم صدقوني حتى لو سواق ميكروباص ولا تاكسي يبتسم ويشكرني عشان عديته اهو مخسرتش اي حاجة عديته بسلام وعديت انا كمان بسلام وشكرني كمان ايه المشكلة بقي لما كلنا نعمل كده ونصبر علي بعض شوية.
ونبطل بقي الكلكسات اللي عمال علي بطال دي اينعم انا احيانا بستعملها بس مع اللي بحسه مستعبط لكن لو الطريق واقف خلقة ادي كلكس ليه يعني هاطير من فوقيهم يعني واعدي بعربيتي ولا انا بس اللي مستعجلة وورايا الوزارة والناس كلها عاطلين وغاويين يعطلوا نفسهم. انا مبستعملش الكلاكس الا لما الاقي حد واقف من غير مبرر وبرده كلكس خفيف (بس احيانا برده بنسي نفسي واضغط بشدة عليه) انا مش ملاك يعني بس دي المرات اللي نفسي بتفلت فيها وبفشل في ضبطها بس لما بنجح ببقي مبسوطة اوي وراضية عن نفسي جدا.
وبرده ياجماعة اللي بيعمل خير بيلاقيه مش عشان قلنا اننا نلتزم ابتغاء مرضاة الله ومنتوقعش نفس السلوك من الناس يبقي عمرنا ماهنلاقي خير لأ بتحصل وهانلاقي برده ناس كويسة تعدينا وتسيبنا نمشي بسلام من غير تزنيق ولا كلكسات ولا سخافات ومتنسوش (الخير في امتي الي يوم الدين)
معلش صدعتكوا بس الموضوع قوي وياريت كلنا نتفاعل ونطبق منه اللي نقدر عليه وكل واحد ييجي يقول تجربته بعد مايجرب يضبط نفسه وقولنا النتيجة.
انا قلت شوية مواقف اهي يمكن تحسسكوا ان الدنيا لسة فيها حاجات كويسة بلاش نفضل نقول الوحش بس خلينا نلقي شوية ضوء على المواقف الكويسة اللي بتحصلنا شوية بقي