تصرفات ايجابيه: اللى عايز يشتغل بيتصرف ... شوف و احكم

**nona_yaris** · 15-04-2013 01:47 AM

مؤمن صاحب مطاعم مؤمن الشهيرة بدأ بفكرة بسيطة كدة وعربية وبعدين محل صغير
ودلوقت ماشاء الله من اكبر مطاعم الشرق الاوسط
اللي بيتعب ويخلص في عمله ربنا بيوفقه ويرزقه
واللي قاعد في بيتهم بيلعن حظه اكيد حظه بيلعنه هو كمان

**AlGazar2** · 15-04-2013 01:59 AM

شباب مجتهد فعلا و يفرح ربنا يباركلهم ان شاء الله

**besso** · 15-04-2013 02:09 AM

حقيقى شباب يفرح
فعلا اللى عنده هدف بيعرف يوصله ازاى حتى لو هايبيع مناديل فى الاشارات
معظم رجال الاعمال والناجحين فى العالم كانو فقراء ومش لاقيين شغل كمان بس علشان كان عندهم هدف عرفوا يوصلوا للى هما فيه دلوقتى

انا ليا واحد قريبى شغال فى الموبايلات ابتدى زمان بكام موبايل على قفص من بتاع الخضار ووقف فى شارع عبد العزيز بيهم وطفح الذل علشان يعرف يعيش وكان كل يوم فى القسم النهارده بسم الله ماشاء الله عليه بقى عنده محل واتنين وفى نفس الشارع كمان

**BESO516** · 15-04-2013 02:58 AM

المشاركة الأصلية كتبت بواسطة friendship7897

ربنا يوفقهم
مرة دكتور الإقتصاد في جامعة عين شمس ( د/ عبد المنعم راضي ) كان في لقاء تليفزيوني - وكانوا بيتكلموا عن البطالة - فقال إن الشباب خريجي الجامعات لو عايزة تتصرف هتتصرف - بس هما كساله ، فالمذيع قال له يعني هيعملوا أيه ! ، الدكتور عبد المنعم راضي قال يشتغلوا اي حاجة لو حتى يبيع بطيخ ، فرد عليه المذيع : يعني أنت ترضى إن إبنك خريج الجامعة يبيع بطيخ ؟
رد عليه الدكتور رد عجبني أوي وقال له :
طبعاً أوافق بس لازم يكون أكبر تاجر بطيخ في الشرق الأوسط بعد كام شهر - وهو دا الفرق اللي لازم يظهر بين التاجر الجاهل والتاجر المتعلم .
ربنا يوفق شبابنا للخير
وشكراً على نقل الصورة المشرفة

درسلى 3سنين الراجل ده
دماغه حلوه اوى بس السن له احكامه بقى

**friendship7897** · 15-04-2013 11:10 AM

المشاركة الأصلية كتبت بواسطة beso516

درسلى 3سنين الراجل ده
دماغه حلوه اوى بس السن له احكامه بقى

وأنا كمان
كان بيعرض المحاضرات بأسلوب فكاهي وكان محببنا في الإقتصاد
الله يرحمه لو كان مات
ويتولاه لو كان حي

**alaa74** · 15-04-2013 12:08 PM

نموذج مشرف لشباب عاوزة تشتغل وتكافح بعيد عن المنظره
معظم (ومش هقول كل طبعا ) الخريجين دلوقتى عاوزين يشتغلوا
ويكونوا فى مركز كويس ومرتب كويس وإمتيازات
وكل ده وبدون خبره وبدون صبر ومش عاوزين يتعلموا

من كام سنه كنت بعمل مقابلات شخصيه لمجموعه من المحاسبين لإختيار
بعضهم للعمل ضمن طاقم الإداره الماليه فى مكان عملى
ومش عاوز اقولكم قابلت ناس عجيبه وكان أشهرهم
واحد خريج نفس السنه يعنى خريج جديد وبدون خيره
وسألنى على المرتب اللى هياخده من أول مقابله
من قبل حتى ما أسأله فى أى حاجه أو حتى نختبره
ورديت عليه إنت بتسأل السؤال ده فى أول مقابله
ومن قبل أساسا حتى ما نختارك .
قالى وبكل ثقه أيوة علشان أنا بشتغل فى مكان دلوقتى
وعاوز اعرف من الاول لو المرتب اكبر من اللى انا فيه
يبقى هقبل ولو اقل يبقى طبعا هرفض .
فرديت عليه بكل هدوء قلت له طيب ممكن تقولى
انت بتقبض كام علشان اقولك المرتب المعروض اكبر
من اللى انت بتاخده او لأ .
رفض يقولى لكن قالى انا مش
هقبل بأقل من 2500 جم مرتب بخلاف الإمتيازات الأخرى
برضو بكل هدوء رديت عليه وإعتذرت له
وقلت له معندناش وظيفه تناسب إمكانياتك
والكلام ده كان سنه 2003
يعنى خريج جديد ونفس السنه وسنه 2003
وعاوز 2500جم مرتب متخيلين ده ؟

اللى عاوز يشتغل وعنده طموح ومعندوش تعالى وتكبر هيشتغل وهيكبر
واللى عاوز يوصل بدون تعب عمره ما هيوصل ولا حتى هيكبر
لأ ده هيتأخر سنين ومش هيلحق حتى الناس اللى فى سنه .

تحياتى لكل شاب مكافح عاوز يحسن من وضعه وظروفه بدون تواكل ....