أولاً أنا ساكن فى الدور الرابع و مركب موتور لوحدى يعنى لشقتى بس، وبالونة وأوتماتيك.
غيرت خلال 4 سنين موتورين وعملت صيانة يمكن خمس مرات والله.
أول موتور كان صينى (1 حصان) قعد سنة واحدة وبعدين اتحرق، نزلت وجبت واحد تانى من شارع الجمهورية قالولى هناك ده ايطالى ولما روحت السباك قاللى ده صينى ومش ايطالى مع انه كان مكتوب عليه صنع فى ايطاليا، وللأسف اتحرق بعد ربع ساعة بسبب إن السباك الله يسامحه وقع وردة جوه الملف، وروحت لفيت الموتور تانى يوم اشتريته فيه، بعدها بكام شهر لقيته بيخر ميه، فغيرت البلى والأولسيه، كام شهر ولقيته ضعف فرحت مغيرله البالونة الكاوتش.
وللأسف إمبارح بقى وأنا مشغله لقيت صوته ارتفع فجأة بطريقة غير طبيعية.. صوت غريب جدًا فقفلته، وكلمت الفنى قاللى هبصلك عليه بس غالبًا كدة الريشة هتتغير، وبصراحة أنا زهقت ومش عاوز أصرف على موتور صينى فلوس تانى.
دلوقتى أنا بفكر أغيره بواحد إيطالى وأريح نفسى ومحتار فى شوية حاجات كدة محتاج نصيحتكم فيها:
1- أشترى الموتور كام حصان لأن فى ناس بيقولولى نص حصان كفاية قوى على شقة فى الدور الرابع ومش محتاج واحد حصان؟
2- أشترى أنهى نوع لأن ناس قالتلى كالبيدا وناس قالولى لينز وناس سييرا ؟؟؟ ويا ريت لو أعرف أسعارهم؟؟؟
3- هل أغير البالونة كمان والأوتماتيك ولا بلاش؟؟ مع العلم إن عندى كمية صدى فى الميه غير طبيعية وده غالبًا لأن البالونة دخلها مية وصدت؟؟
4- فى ناس اتكلمت عن السكس بلف وعن الفلتر البلاستيك اللى بيمنع الشوائب ممكن أعرف فايدتهم ايه وسعرهم؟؟
أخيرً بقى لو هجيب الحاجات دى أجيبها منين لأنى مش عاوز أتخم تانى.
وشكرًا ليكم وآسف على الإطالة
المفضلات