اصدقائي ووحوش الدايو..مطلوب مشورتكم ايه حل المطبااااااااااااااات

**CaptaiN-AhmeD** · 14-04-2013 06:07 PM

السلام عليكم

ازيكم يا رجاالة

يارب تكونوو تمام

انا عندي استفسار لحضراتكم

دا المقاس بتاع الجنط بالكاوتش الحالي عندي

وخلاص نويت اغير والحمد لله

185/65/14

ينفع اركب كاوتش اعرض دا فهمته عادي

لكن هل ينفع اركب كاوتش يعملي ارتفاع اكبر لاني اتخقت من الرزع مطبات الشوارع صحيح مش كل الشوارع بس لو راكب معايا 3 افراد غيري لازم هسمع مطبات الدنيا كلها بتتخانق مع علبة الشكمان وانا بتعب نفسياً اما بسمع الاصوات بتاعت الحكه والمطبات وانا مليش ف حوار ان اخد المطب اكس ومش اكس والكلام دا لأن ساعات اصلا بيبقى مطب رفيع خالص طوله لا يتعدى ال5 سم اه والله ميلحقش حتى تاخده اكس ولا زد ولا اي حاجه ويقوم مسمعني احلى اصواااااااااااات

+ في اي حل اعلي بيه العربيه منغير مايأثر سلبياً على الثبات ؟؟؟؟

تنصحوني بمقاس ايه بالظبط الي هيريحني من الدوشه دي..للعلم بسافر ف اوقات متقطعه على سرعات 160 - 180
مش هحتاج حاجه اعلى من نقشة الـ r..t يعني

عربيتي نوبيراااا طبعاً

**flarevee** · 14-04-2013 06:48 PM

بس يا باشا لو عايز تعلى العربية عن طريق مقاس الكاوتش يبقى قدامك المقاس الاعلى اللى هو 185\70 او 195\70 بس دة هيعمل حاجتين هيخلى سرعه العربيه الفعلية اكثر من سرعة العداد ب10% يعنى لو العداد قال 100 كيلو فى الساعة هتكون سرعتك الفعلية 110 و دية هتعملك مشكلة عشان الردار لو مش واخد بالك.
الحاجة التانية انة ممكن يحك فى الكارتيرة فا لازم تتاكد الاول

**Dr.Solom** · 14-04-2013 07:02 PM

المشاركة الأصلية كتبت بواسطة flarevee

بس يا باشا لو عايز تعلى العربية عن طريق مقاس الكاوتش يبقى قدامك المقاس الاعلى اللى هو 185\70 او 195\70 بس دة هيعمل حاجتين هيخلى سرعه العربيه الفعلية اكثر من سرعة العداد ب10% يعنى لو العداد قال 100 كيلو فى الساعة هتكون سرعتك الفعلية 110 و دية هتعملك مشكلة عشان الردار لو مش واخد بالك.
الحاجة التانية انة ممكن يحك فى الكارتيرة فا لازم تتاكد الاول

الباشا جابلك من الاخر
انت ممكن تركب علايات ورا بس انا العلايات كانت بترفع العربية جامد في مطبات الهوا وكانت بترعبني

**CaptaiN-AhmeD** · 15-04-2013 03:08 AM

شكرا يا رجاله باركولي انا لسه مغير طقم الكاوتش (كونتنتال اوروبي) نفس المقاس وبصراحه مش مقتنع بحوار العلايات هيخلي الشكل وحش تسلمو للردود والمرور

**swimmer25** · 15-04-2013 01:15 PM

موضوع مهم جدا فعلا..... هل لو خلينا إرتفاع الكاوتش أعلي1-2 سم
أكيد هيأثر علي قرائة العداد...بس السؤال الأهم:

1- هل يأثر علي الثبات لدرجة ملحوظة؟
2- هل هيحل مشكلة المطبات والإنخفاض الملحوظ للعربية؟

بمراعاة إن الطريقة دي أحسن بكتير من العلايات لأن العلايات بتخلي المساعد ميمشيش كامل مشاوره وبكده إنت لعبت في نظام التعليق...لأن أصلا المساعد له مجال محدد للحركة لضمان تعليق فعال + إنك رفعت مركز الثقل 4 سم ارتفاع العلاية
لكن في الطريقة دي رفعت بس مركز الثقل مثلا 2 سم اللي هو اصلا ممكن ينزل تاني لو محمل العربية بسيط فبيلغي التعلية دي بس مجتش جنب نظام التعليق

أرجو من الخبرة محمد ممدوح وطارق الرد

**tarek_2005** · 15-04-2013 03:14 PM

موضوع تعلية العربية ناجح جداً لو مبتتعداش سرعة 100 كم / ساعة
وفاشل جداً جداً جداً لو بتمشي علي سرعة اعلي من 100 كم / ساعة

**swimmer25** · 16-04-2013 01:39 AM

المشاركة الأصلية كتبت بواسطة tarek_2005

موضوع تعلية العربية ناجح جداً لو مبتتعداش سرعة 100 كم / ساعة
وفاشل جداً جداً جداً لو بتمشي علي سرعة اعلي من 100 كم / ساعة

يا طارق باشا أنا بتكلم في نوعين هنا..واحد بيأثر علي التعليق وفي نفس الوقت إرتفاع مركز الثقل
التاني بيرفع مركز الثقل بس..ومشفتش حد جربها فعليا وحكالنا التأثير معاه في ايه