حد فكر يركب مصدات على الإكصدام؟

**the_air_devil** · 14-04-2013 09:02 PM

بسم الله الرحمن الرحيم

عندي سؤال يا شباب وهو ممكن يكون غريب ... فكرت في حماية العربية وقت الخطر من الهجمات المباغتة الخلفية من نوع (آسف أصلي ماخدتش بالي - ولا مش تفتح يا أخ انت اللي وقفت مرة واحدة)

وحماية العربية من قدام وقت ماحد يكسر عليك علشان ينزلك من عربيتك ويحاول يتعدى عليك ويسرقك ...

خصوصاً ان في حاجة زي كدة انا عامل حسابي اني هاخسر الاكصدام الأمامي علشان افدي بيه العربية كلها ... لكن فكرت في حل أقوى من كدة

حماية العربية من قدام وورا بمصدات حديدية قدام الاكصدام ...

هل حد من السادة ملاك الصني يقدر يفيدنا؟ وبالأخص هل حد يقدر يعمل حاجة زي كدة في الصني الجديدة ؟؟

وهل بالفعل علشان اركبه لازم يتلحم في الشاسيه ؟ يعني بشكل آخر ... وقت الخطر لا قدر الله الصدمة تأثيرها بيتنقل للشاسيه نفسه بدل الإكصدام؟

ولو فيه إمكانية الواحد يعمل حاجة زي كدة ... هل يستحسن يروح للجاهز زي اللي بيركب للجيب شيروكي والهيونداي ماتركس ولا يتعمل مخصوص؟ وفين ؟ وهل حد عنده فكرة عن التكلفة بشكل مبدأي؟؟

لكم جزيل الشكر جميعاً على قراءة الموضوع

تحياتي

**youssef_u** · 14-04-2013 09:49 PM

متابع و معاك لو موجود ،،، بس وضعه مع المرور ؟؟

**Sehsss** · 14-04-2013 09:53 PM

أولا.. موضوع الديفيندرات ده مخالف مروريا
ثانيا.. أشهر مكان بيعمل الموضوع ده للجيب، شارع شامبليون بوسط البلد

**Sehsss** · 14-04-2013 10:16 PM

المشاركة الأصلية كتبت بواسطة abdulmoniem

أنا نفسي أعرف حاجة واحدة .. ليه مخالف مرورياً .. الفميه مخالف .. والدفندرات مخالفة :d

هو إيه إللي مسموح .. ياريت الناس تفيدنا وتقولنا سبب المخالفة :)؟

سبب المخالفة إن ممكن ناس تأذي بيه عربيات تانية، طبعا مش كل الناس أخلاقها كده، لكن أنا والله شفتها بعيني من كام سنة على المحور، واحد راكب لانوس رمى على عربية فرونتيرا مركبه ديفندرات، قام بتاع الفرونتيرا قعد يخبط فيه من ورا لحد ما وقعله الإكصدام وسابه ومشي

**Sehsss** · 14-04-2013 10:28 PM

المشاركة الأصلية كتبت بواسطة abdulmoniem

أه فهمت

إنتا عارف إن تلت تربع القوانين إللي في البلد دي سببها البشر إللي عايشين فيها.

يعني المعاملة والسلوك هو السبب الرئيسي في معظم القوانين والحواجز والقيود إللي بتتفرض علينا.

أبسط مثال: هنا لو اشتريت حاجة وجربتها بس .. يقولك مينفعش ترجعها حتى لو كان فيها إيه! نادراً جداً متلاقي مكان محترم يتفهم وجهة نظرك.

برة بقا: لما بشتري حاجة من أمازون وتجيلي مصر وأفتح العلبة ومتعجبنيش شكلها بكلمهم على ال live chat بيبعتولي جزء من فلوس السلعة مع اعتذار حار على الخطأ الفادح.

المشكلة فينا والله.

تماااااام.. حضرتك كده وصلت للنقطة الصحيحة، المشكلة في الاستخدام السىء